މެންޗެސްޓާ (2 އޮކްޓޯބަރު) - މެޗުގެ ދެ ވަނަ ހާފުގައި އެންޑްރޮސް ޓައުންސެންޑް ޖެހި ލަނޑާ އެކު، އިނގިރޭސި ޕްރިމިއާ ލީގުގައި މިއަދު އެވަޓަން އާއި މެންޗެސްޓާ ޔުނައިޓަޑް ބައްދަލުކުރި މެޗު 1-1 އިން އެއްވަރުވެއްޖެ އެވެ.
ޔުނައިޓެޑަށް އެވަޓަން ބަލިކޮށްގެން އެއް ވަނަ އަށް އެރެން އޮތެވެ. އެކަމަކު، ޕޮއިންޓެއް ލިބުމުން އެ ޓީމު އޮތީ ދެ ވަނައިގަ އެވެ. އެއް ވަަނައިގައި އޮތް ލިވަޕޫލާއި ދެ ވަނައިގައި ޔުނައިޓެޑް އަދި ތިނެއްގައި އޮތް އެވަޓަން އަށް ވަނީ 14 ޕޮއިންޓް ލިބިފަ އެވެ. ޔުނައިޓެޑާއި އެވަޓަން ވަނީ ލިވަޕޫލަށް ވުރެ އިތުރަށް މެޗެއް ކުޅެފަ އެވެ.
ޔުނައިޓަޑްގެ ދަނޑުގައި ކުޅުނު މެޗުގެ ފުރަތަމަ ހާފު ނިމެނިކޮށް، ޔުނައިޓަޑުން ލީޑު ނެގީ ފްރާންސް ފޯވަޑް އެންތަނީ މާޝިއާލް ޖެހި ލަނޑުންނެވެ. އެ ލަނޑުގެ ކުރިން އެވަޓަން އިން ޔުނައިޓެޑްގެ ގޯލަށް ނުރައްކާކޮށް ނުރައްކާތެރި ހަަލާތައް ފޮނުވާލިއިރު، ޔުނައިޓެޑްގެ ކީޕަރު ޑެހެއާ ވަނީ މަތަކޮށްފަ އެވެ.
އެކަމަކު މެޗުގެ 65 ވަނަ މިނިޓުގައި އެވަޓަން އިން އުފެއްދި ކައުންޓާ އެޓޭކެއްގައި ލިބުނު ފުރުސަތުގެ ބޭނުން ހިފައި، ޓައުންސެންޑް ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފަ އެވެ. ފްރެޑް އަތުން ހޯދި ބޯޅައެއް އެވަޓަންގެ ޑަމަރާއި ގްރޭ ޖައްސާލީ އެ ޓީމުގެ އަބްދުﷲ ޑޮކޫރޭ އަށެވެ. އޭނާ ހުސްކޮށްލާފައި ޓައުންސެންޑަށް ދިން ބޯޅަ އޭނާ ވަނީ ތިރިތިރިން ގޯލުގެ ތެރެއަށް ބޯޅަ ފޮނުވާލައިފަ އެވެ.
މެޗުގެ ފުރިހަމަ ވަގުތު ހަމަވާން ހަތަރު މިނިޓަށްވެފައި ވަނިކޮށް، އެވަޓަންގެ ޑިފެންޑަރު ޔެރީ މީނާ ޔުނައިޓަޑްގެ ގޯލަށް ބޯޅަ ވައްދާލި ނަމަވެސް، ވީއޭއާރް އިން ބެލުމަށް ފަހު ނިންމީ އެ ލަނޑު އޮފްސައިޑް ކަމަށެވެ.
މި މެޗަށް ޔުނައިޓަޑް އިން ނެރުނު ފުރަތަމަ 11 ގައި ކްރިސްޓިއާނޯ ރޮނާލްޑޯ ނުހިމެނުނު ނަމަވެސް، ދެ ވަނަ ހާފުގައި އޭނާ ކުޅެން އެރި އެވެ. ރޮނާލްޑޯ އާއި ޖޭޑަން ސަންޗޯ އެކުގައި ކުޅެން އެރިއިރު، ސަންޗޯ ދިން ބޯޅައަކުން އޭރިއާތެެރެއިން ރޮނާލްޑޯ ޖެހި ޝޮޓް ދިޔައީ އަރިމަތިން ބޭރުންނެވެ. މިއީ ރޮނާލްޑޯ ޕްރިމިއާ ލީގުގައި ކުޅުނު 200 ވަނަ މެޗެވެ.
މި މެޗުގެ ނަތީޖާއާއެކު، ޔުނައިޓަޑްގެ ކޯޗު އޮލޭ ގަނާ ސޯލްޝެއާ އަށް ވަނީ އިތުރު ޕްރެޝަރެއް ކުރިމަތިވެފަ އެވެ. ލީގުގައި އެންމެ ފަހުން ކުޅުނު މެޗުގައި އެސްޓަން ވިލާ އަތުން ޔުނައިޓަޑް ބަލިވިއިރު، ލީގު ކަޕްގައި ވެސްޓް ހޭމް އަތުން ބަލިވެ، އެ މުބާރާތުން ވެސް ވަނީ ކަޓައިފަ އެވެ. މި މެޗުގެ ކުރިން ސޯލްޝެއާ އަށް ހިތްހަމަޖެހުމެއް ލިބުނީ ޗެމްޕިއަންސް ލީގުގައި ވިޔަރެއާލް އަތުން މޮޅެއް ލިބުމުންނެވެ. -- ބީބީސި
