ވޮޝިންޓަން، އެމެރިކާ (އޮކްޓޯބަރު 2) - ސައުދީ އަރަބިއްޔާގެ ނޫސްވެރިޔާ ޖަމާލް ހަޝޮގްޖީ އަނިޔާވެރި ގޮތަކަށް މަރާލިތާ ތިން އަހަރު ފާއިތުވެ ދިޔައިރު ވެސް، ސައުދީ އަރަބިއްޔާއާ މެދު ފިޔަވަޅެއް އެޅިފައި ނުވާތީ އޭނާގެ ލޯބިވެރިޔާ އެމެރިކާ އަށް ފާޑުކިޔައިފި އެވެ.
ހަޝޮގްޖީ މަރާލިތާ ތިން އަހަރު ފުރުނީ ހުކުރު ދުވަހު އެވެ. އޭނާ މަރާލީ ލޯބިވެރިޔާ ހަތީސޭ ސެންގިޒްއާ ކައިވެނި ކުރަން ނިންމާފައި ވަނިކޮށެވެ. ހަޝޮގްޖީގެ ހަނދާނުގައި ހުކުރު ދުވަހު ވޮޝިންޓަނުގައި ހުންނަ ސައުދީ އެމްބަސީގެ ބޭރުގައި އެއްވުމެއް އޮތެވެ.
ތުރުކީގެ ރައްޔިތެއް ކަމަށްވާ ހަތީސޭ ވަނީ އެމެރިކާ އަށް ގޮސް އެ އެއްވުމުގައި ބައިވެރިވެފަ އެވެ. އޭގެ އިތުރުން އެމެރިކާގެ މަޖިލިސް ބާއްވާ ކެޕިޓޮލް އިމާރާތް ކައިރީގައި އޮތް އެއްވުމެއްގައި ވެސް އޭނާ ބައިވެރިވި އެވެ.
އެއްވުންތަކުގައި ވާހަކަދައްކަމުން ހަތީސޭ ކަންބޮޑުވުން ފާޅުކުރީ އެމެރިކާގެ ރައީސް ޖޯ ބައިޑެންގެ ނޭޝަނަލް ސެކިއުރިޓީ އެޑްވައިޒަރު ޖޭކް ސަލިވަން ސައުދީ ވަލީ އަހުދު މުހައްމަދު ބިން ސަލްމާންއާ ބައްދަލުކުރައްވާފައި ވާތީ އެވެ. ހަޝޮގްޖީ މަރާލަން އަމުރު ކުރެއްވީ ސައުދީ ވަލީ އަހުދު ކަމަށް އެމެރިކާގެ ޖާސޫސީ އިދާރާ އިން ވަނީ ބުނެފަ އެވެ.
"ޖަވާބުދާރީ ކުރުވާނެ ކަމަށް ބައިޑެން ވައުދުވެވަޑައިގެންނެވީ މި ގޮތަށް ކަންކަން ކޮށްގެން ތޯ؟،" އެއްވުމުގައި ހަތީސޭ ބުންޏެވެ.
"[ސައުދީ ވަލީ އަހުދު] އެމްބީއެސް ވަނީ އަހަރެންގެ އަތުން ހަޝޮގްޖީ ނިގުޅައިގެންފައި. އޭނާ ޖަވާބުދާރީ ކުރުވާނީ ތޯ ނުވަތަ މި ޖަރީމާ ހިންގީ މުޖުރިމުންގެ އަގު ވަޒަން ކުރާނީ ތޯ؟،" އުމުރުން 36 އަހަރުގެ ސައުދީ ވަލީ އަހުދަށް ނިސްބަތް ކުރާ ވަނަން ބޭނުންކޮށްގެން އޭނާ ބުންޏެވެ.
ހަޝޮގްޖީ އަކީ އަމިއްލަ އަށް ގައުމުން އަރުވާލެވިގެން އެމެރިކާގައި ދިރިއުޅެމުން ދިޔަ ސައުދީ ނޫސްވެރިއެކެވެ. އޭނާ ވަނީ ސައުދީ ވަލީ އަހުދަށް ވަރަށް ބޮޑަށް ފާޑުކިޔައި ކޮލަމްތައް ދަ ވޮޝިންޓަން ޕޯސްޓު ނޫހުގައި ޝާއިއުކޮށްފަ އެވެ.
އޮކްޓޯބަރު 2، 2018 ގައި ހަޝޮގްޖީ ތުރުކީގައި ހުންނަ ސައުދީ ކޮންޒިއުލޭޓުގެ ތެރެއަށް ވަނީ ހަތީސޭ އާ ކައިވެނި ކުރަން ބޭނުންވާތީ އެކަމުގެ ލިޔެކިޔުންތައް ހުށަހެޅުމަށެވެ.
އެމެރިކާ އާއި ތުރުކީގެ އޮފިޝަލުން ބުނީ ކޮންޒިއުލޭޓު ތެރޭގައި އޭނާގެ އިންތިޒާރުގައި ތިބި ގްރޫޕަކުން، އޭނާގެ ކަރުގައި ހިފައި މަރާލުމަށް ފަހު، ހަށިގަނޑުގެ ގުނަވަންތައް ވަކިކުރި ކަމަށެވެ. އޭނާގެ ހަށިގަނޑުގެ ބައިތައް މިއަދާ ހަމައަށް ވެސް ފެނިފައެއް ނުވެ އެވެ.
އޭރު އެމެރިކާގެ ރައީސްކަމުގައި ހުންނެވި ޑޮނަލްޑް ޓްރަމްޕް އެކަމަށް މާ ބޮޑު ސަމާލުކަމެއް ނުދެއްވި އެވެ. އޭގެ ބަދަލުގައި ޓްރަމްޕް ބޭނުންވެވަޑައިގެންނެވީ ސައުދީ އަރަބިއްޔާ އިން އެމެރިކާގެ ހަތިޔާރު ގަންނާނެކަން ޔަގީން ކުރުމާއި އިރާނާ ދެކޮޅަށް އޮންނާނެކަން ޔަގީންކުރުމެވެ.
ނަމަވެސް އޭގެ ފަހުން ވެރިކަމަށް ވަޑައިގެންނެވި ބައިޑެން ވައުދުވެވަޑައިގެންނެވީ ސައުދީ އަރަބިއްޔާއާ މެދު ހަރުކަށި ވާނެ ކަމަށެވެ. އެގޮތުން ޖާސޫސީ މައުލޫމާތު އާއްމު ކުރާނެ ކަމަށާއި ސައުދީ ބައެއް ފަރާތްތަކާ ދެކޮޅަށް ދަތިކުރުމުގެ ފިޔަވަޅު އަޅާނެ ކަމަށް ވިދާޅުވި އެވެ.
އެމެރިކާގެ އޮފިޝަލުން ބުނީ ސެކިއުރިޓީ އެޑްވައިޒަރު ސަލިވަން ސައުދީ އަރަބިއްޔާ އަށް ވަޑައިގެންނެވީ ޔަމަނު ހަނގުރާމައިގެ މަޝްވަރާތައް ކުރުމަށް ކަމަށެވެ.
