ބެއިޖިން، ޗައިނާ (އޮކްޓޯބަރު 2) - ޗައިނާ ސަރުކާރުން ކޮރަޕްޝަނާ ދެކޮޅަށް ހިންގާ ކެމްޕެއިނުގެ ދަށުން ކުރީގެ ޖަސްޓިސް މިނިސްޓަރުގެ މައްސަލައެއް ތަހުގީގު ކުރަން ފަށައިފި އެވެ.
ރައީސް ޝީ ޖިންޕިން ކޮރަޕްޝަނާ ދެކޮޅަށް ހިންގަވާ ކެމްޕެއިނުގައި ކޮމިއުނިސްޓު ޕާޓީގެ ގިނަ އިސް އޮފިޝަލުންތަކެއްގެ މައްސަލަ ބެލުމަށް ފަހު ފިޔަވަޅު އަޅާފައި ވެ އެވެ.
ނަމަވެސް ފާޑުކިޔާ ބައެއް ފަރާތްތަކުން ތުހުމަތު ކުރާ ގޮތުގައި އެ ކެމްޕެއިނުގެ އެންމެ ބޮޑު ބޭނުމަކީ 2013 ވަނަ އަހަރު ވެރިކަމަށް ވަޑައިގެންނެވި ޝީ ޖިންޕިންގެ ވާދަވެރިން ދުރަށް ޖެއްސުމެވެ.
ފޫ ޝެންގުއާ ވަނީ ޖަސްޓިސް މިނިސްޓަރު ކަމާއި ޕަބްލިކް ސެކިއުރިޓީ ބިޔުރޯގެ ވެރިޔާގެ އިތުރުން ވެސް ސަރުކާރުގެ މުހިއްމު މަގާމުތަކެއް ފުރުއްވާފަ އެވެ.
ކަމާ ބެހޭ އިދާރާތަކުން ނެރުނު ބަޔާނެއްގައި ބުނީ އޭނާއާ ގުޅޭ ތަހުގީގެއް ފެށީ "ގާނޫނާއި ހިލާފުވެފައިވާ ސީރިއަސް" މައްސަލަތަކަކާ ގުޅިގެން ކަމަށެވެ.
މީގެ ކުރިން 2015 ވަނަ އަހަރު ކުރީގެ ސެކިއުރިޓީ ޗީފް ޒޫ ޔޮންގްކަންގް ޖަލަށް ލުމަށް ހިންގި ކޮރަޕްޝަން ތަހުގީގުގައި އެންމެ އިސްކޮށް އުޅުނީ ފޫ އެވެ.
ނަމަވެސް ކޮރަޕްޝަން ތަހުގީގު ކުރާ ސެންޓްރަލް ކޮމިޝަން ފޯ ޑިސިޕްލިން އިންސްޕެކްޝަން (ސީސީޑީއައި) އިން މިހާރު ވަނީ ފޫ ގެ މައްސަލަ ވެސް ބަލަން ފަށާފަ އެވެ.
މި ވަގުތު ފޫ އަކީ ޗައިނީޒް ޕީޕަލްސް ޕޮލިޓިކަލް ކޮންޒަލްޓޭޓިވް ކޮންފެރެންސް (ސީޕީޕީސީސީ) ގެ ސޯޝަލް އަދި ލީގަލް އެފެއާޒް ކޮމިޓީގެ ޑެޕިއުޓީ ޑިރެކްޓަރެވެ.
އޭނާގެ މައްސަލަ ބަލަން ފެށިކަން ސީސީޑީއައި އިން އިއުލާނުކޮށްފައި ވާއިރު، ކުރީގެ ޑެޕިއުޓީ ޕަބްލިކް ސެކުއިރިޓީ މިނިސްޓަރު ސުން ލިޖުން ވަނީ ދާދި ފަހުން ކޮރަޕްޝަނާ ގުޅިގެން ޕާޓީން ވަކިކޮށްފަ އެވެ.
ޝީ ޖިންޕިން ވަރަށް ބޮޑު އިސްކަމެއް ދީގެން ކުރިއަށް ގެންދާ ކޮރަޕްޝަނާ ދެކޮޅު ކެމްޕެއިނުގެ ދަށުން މިހާތަނަށް މިލިއަނަކަށް ވުރެ ގިނަ އޮފިޝަލުންނާ މެދު ފިޔަވަޅު އަޅާފައި ވެ އެވެ.
މިދިޔަ ސެޕްޓެމްބަރު މަހު، ދުނިޔޭގެ އެންމެ ބޮޑެތި ރާ އުފައްދާ ކުންފުނިތަކުގެ ތެރޭގައި ހިމެނޭ ޗައިނާގެ ކްވެއިޗޯ މޫޓައިގެ ކުރީގެ ވެރިޔާ ރިޝްވަތުގެ ގޮތުގައި 17 މިލިއަން ޑޮލަރު ނެގި ކަމަށް ސާބިތުވެ އުމުރަށް ޖަލަށް ހުކުމްކުރި އެވެ.
މިދިޔަ އަހަރު ޗައިނާގެ އިންޝުއަރެންސް ރެގިއުލޭޓަރީ އިދާރާގެ ކުރީގެ ވެރިޔާ ވެސް ރިޝްވަތު ނެގި ކަމަށް ސާބިތުވެ 11 އަހަރަށް ޖަލަށް ހުކުމްކުރި އެވެ.
