އުރީދޫ ސާފް ޗެމްޕިއަންޝިޕްގައި މާދަމާރޭ ދިވެހި ސަޕޯޓަރުންގެ ކުރިމަތީގައި ރާއްޖެއާ ދެކޮޅަށް ކުޅެން ޖެހުނު ކަމުގައި ވިޔަސް ނޭޕާލުން ޖެހިލުންވާން ޖެހޭ ސަބަބުތަކެއް ނެތް ކަމަށް އެ ޓީމުގެ ކެޕްޓަން އަދި ގޯލްކީޕަރު ކިރަން ޝެމްޝޮން ބުނެފި އެވެ.
މުބާރާތުގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގައި ކިރަން ބުނީ ރާއްޖެ އަށް ހޯމް އެޑްވާންޓޭޖް އޮންނާނެކަން ޔަގީން ކަމަށާއި ގިނަވާނީ ދިވެހި ސަޕޯޓަރުން ކަން ވެސް ދަންނާނެ ކަމަށެވެ. އެކަމަކު, އެއީ ނޭޕާލުން ވިސްނާނެ ކަންތައްތަކެއް ނޫން ކަމަށް ކިރަން ބުންޏެވެ.
"އަހަރެމެންގެ އެބަތިބި ވަރަށް ރަނގަޅު ކުޅުންތެރިން. އަހަރެމެންނަށް ގޯކާލީސް ކިޔަނީ ސަބަބެއް އޮތީމަ. އަހަރެމެންނަށް ތާރީހުގައި ލިޔެވޭފަދަ ކާމިޔާބު ހޯދަން އެނގޭ. އަހަރެމެން ޖެހިލުމެއް ނުވޭ ހޯމާއި އަވޭގައި ކުޅުނަސް ފޯކަސް އަކީ މޮޅެއް. އަހަރެން ރާއްޖެ އަށް އިހުތިރާމް ކުރަން. އެކަމަކު، އެއީ މެޗަށް ނުކުންނައިރު ބަލާނެ ކަމެއް ނޫން. ދަނޑު މަތީގައި މޮޅަކަށް ފައިޓްކުރާނީ،" ނޭޕާލާއި އިންޑިއާ އަދި ރާއްޖޭގެ ލީގުގެ މޮޅު ކީޕަރުގެ މަގާމު ހޯދާފައިވާ ކިރަން ބުންޏެވެ.
މިދިޔަ އަހަރުތަކަށް ބަލާއިރު، ނޭޕާލުން ވަނީ އުމުރުފުރާ މުބާރާތްތަކުގައި ރާއްޖޭގެ 23 އަހަރުން ދަށުގެ ޓީމު އަތުން މޮޅުވެފަ އެވެ. އެ ގޮތުން 2016 އާއި 2019 ވަނަ އަހަރުގެ ސައުތު އޭޝިއަން ގޭމްސް އާއި 2016 ވަނަ އަހަރުގެ ބަންގުބަންދު މުބާރާތުގައި ނޭޕާލުން ރާއްޖެ ބަލިކުރި އެވެ. އެކަމަކު، މިހާތަނަށް ސާފްގައި ކުޅުނު އެއްވެސް މެޗަކުން ނޭޕާލަށް ރާއްޖެ ބަލިނުކުރެވެ އެވެ.
ބަންގްލަދޭޝްގެ ނަވަޔުގް ޝްރެސްތާ (ވ) އަތުން ބޯޅަ ހޯދަން ސަމޫހު މަސައްކަތްކުރަނީ.
ކިރަން ބުނީ ތާރީހާއި ހުރިހާ ކަމެއް އޮތީ އެ ޓީމާ ދެކޮޅަށް ނަމަވެސް ރަނގަޅު ނަތީޖާ އަށް ފައިޓްކުރުން ދުލެއް ނުކުރާނެ ކަމަށެވެ.
"އެބަހުރި ފެންވަރު އަހަރެމެންގެ ކިބައިގައި. ޒުވާން ކުުޅުންތެރިންތަކެއް މި ޓީމާ ގުޅިއްޖެ. ވަރަށް ރަނގަޅު ޒުވާން ކުޅުންތެރިންނާއި ސީނިއާ ކުޅުންތެރިންގެ ކޮމްބިނޭޝަނެއް މި އޮތީ. މި އަހަރު އަހަރެމެންގެ އަމާޒަކީ ތާރީހީ ކާމިޔާބެއް ހޯދުން. މުބާާރާތުގައި އޮތް ޓީމުތަކުގެ ތެރެއިން ތަށި ނުހޯދައި ފައިނަލެއް ނުކުޅެ އޮތީ އަހަރެމެން. އެކަން ބަދަލުކުރަން ބޭނުން. އެއްވެސް ޓީމަކާ ކުޅެން ޖެހިލުމެއް ނުވޭ،" ކިރަން ބުންޏެވެ.
މި ފަހަރުގެ ސާފް ޗެމްޕިއަންޝިޕަށް މުބާރާތުގެ ތާރީހުގައި އެންމެ ގިނަ ގޯލު ޖެހި ރާއްޖޭގެ ފޯވާޑް އަލީ އަޝްފާގު (ދަގަނޑޭ) އެނބުރި އަންނާނެ އެވެ.
ކިރަން ބުނީ ދަގަނޑޭ އަކީ ރާއްޖޭގެ އިތުރުން ސަރަހައްދުގެ ފުޓްބޯޅައިގެ ވެސް ލެޖެންޑެއް ކަމަށެވެ. އެހެން ނަމަވެސް މި ފަހަރުގެ މުބާރާތުގައި ދަގަނޑޭ އަކީ އެންމެ ގިނަ ލަނޑު ޖަހާނެ ކުޅުންތެރިޔާއޭ ބުނަން ނޭނގޭނެ ކަމަށް ކިރަން ބުންޏެވެ.
"ފޭވަރިޓަކީ އިންޑިއާ، ދެން އެންމެ ވަރުގަދަ ވާނީ ރާއްޖެ"
ސާފް ޗެމްޕިއަންޝިޕަށް ތައްޔާރުވާން ނޭޕާލުން ވަނީ ހަތަރު މެޗު ކުޅެފަ އެވެ. އެއީ މިދިޔަ މަހު ކުރީކޮޅުގައި އިންޑިއާއާ ދެކޮޅަށް އަމިއްލަ ގައުމުގައި ކުޅުނު ދެ މެޗާއި ގަތަރު ޓްރެއިނިން ކޭމްޕްގެ ތެރެއިން އެ ގައުމުގެ ދެ ވަނަ ޑިވިޝަނުގެ އަލް ބިދާ ސްޕޯޓްސް ކްލަބްގެ އިތުރުން އޮމާނާ ދެކޮޅަށް ކުޅުނު މެޗުތަކެވެ.
އިންޑިއާ އާއި ނޭޕާލް ފުރަތަމަ މެޗު 1-1 އިން އެއްވަރުވިއިރު، ދެ ވަނަ މެޗުން އިންޑިއާ އަތުން 2-1 އިން ބަލިވީ އެވެ. ގަތަރުގެ ބިދާ އަތުން 2-0 އިން ނޭޕާލް މޮޅުވި ނަމަވެސް އެންމެ ފަހު މެޗުގައި އޮމާން އަތުން ވަނީ 7-2 އިން ބަލިވެފަ އެވެ.
ނޭޕާލްގެ އެސިސްޓަންޓް ކޯޗު ކިރަން ޝްރެސްތާ.-- ފޮޓޯ: ހުސެއިން ވަހީދު/ އަދަދު
ނޭޕާލްގެ ކޯޗު ކުވޭތުގެ އަލް މުތައީރީގެ ބަދަލުގައި މިއަދު ބޭއްވި ނޫސްވެރިންގެ ބައްދަލުވުމުގައި ބައިވެރިވީ އެސިސްޓަންޓް ކޯޗު ކިރަން ޝްރެސްތާ އެވެ. ޝްރެސްތާ ބުނީ މުބާރާތަށް ތައްޔާރުވާން ނޭޕާލުން ރާއްޖެ އަށް ވުރެ ގިނަ މެޗު ކުޅެފައިވުމުގެ ފައިދާ ކުރާނެ ކަމަށެވެ.
"އެ ފައިދާ މި މެޗާއި މުޅި މުބާރާތުގައި ވެސް ކުރާނެ،" ގިނަ ދުވަސްތަކެއް ވަންދެން ގައުމީ ޓީމުގެ އެސިސްޓަންޓް ކޯޗަކަށް މަސައްކަތްކުރި ޝްރެސްތާ ބުންޏެވެ.
މި ފަހަރުގެ މުބާރާތް ނޭޕާލުން ފަށަން ޖެހުނީ އެންމެ ފަހުގެ ޗެމްޕިއަން، ރާއްޖެއާ ދެކޮޅަށް އެ ޓީމުގެ ހޯމްގައި ކަމަށްވާއިރު، މިއީ ޝްރެސްތާގެ ނަޒަރުގައި ޗެލެންޖެކެވެ. ޝްރެސްތާ ބުނީ ނޭޕާލް އޮތީ މި ޗެލެންޖާ ކެރިގެން ކުރިމަތިލާން ތައްޔާރަށެވެ.
"ޑިފެންޑިން ޗެމްޕިއަނާ ދެކޮޅަށް އެ މީހުންގެ ހޯމްގައި ކުޅުމަކީ އަހަރެމެންނަށް ޗެލެންޖެއް ވިޔަސް މިއީ ރަނގަޅު ކަމެއްގެ ގޮތުގައި ދެކެނީ. އިންޑިއާ އަކީ ފޭވަރިޓުން. ދެ ވަނަ އަށް އެންމެ ރަނގަޅީ ރާއްޖެ. އިންޑިއާ ހަތް ފަހަރު ހޯދައިފި. ރާއްޖޭން ދެ ފަހަރު ހޯދިއިރު އެ މީހުންނަކީ ޑިފެންޑިން ޗެމްޕިއަން،" ޝްރެސްތާ ބުންޏެވެ.
ރާއްޖޭން 2008 ވަނަ އަހަރު ރާއްޖެ އާއި ލަންކާގައި ހޯސްޓްކުރި ސާފް ޗެމްޕިއަންޝިޕްގައިވަނީ ނޭޕާލް އަތުން 4-1 އިން މޮޅުވެފަ އެވެ. އެންމެ ފަހުން 2018 ވަނަ އަހަރު ބަންގްލަދޭޝްގައި ބޭއްވި ސާފް ޗެމްޕިއަންޝިޕްގައި ނޭޕާލް ކެޓީ ސެމީ ފައިނަލުގައި ރާއްޖެ އަތުން 3-0 އިން ބަލިވުމުންނެވެ. ރާއްޖެ އާއި ނޭޕާލް ކުޅޭ މެޗު ފަށާނީ މާދަމާރޭ ރާއްޖެ ގަޑިން 21:00 ގަ އެވެ.
