މާލޭގައި މާދަމާ ފަށާ އުރީދޫ ސާފް ޗެމްޕިއަންޝިޕަށް "އަދަދު" އިން ތައްޔާރުކުރި ގައިޑް ފޮތް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް މިއަދު ހަދިޔާކޮށްފި އެވެ.
ރައީސް އޮފީހުގައި މިއަދު މެންދުރުފަހު އޮތް ބައްދަލުވުމެއްގައި ރައީސް އަށް ގައިޑް ހަދިޔާކުރެއްވީ "އަދަދު" ގެ ޗީފް އެގްޒެކެޓިވް އޮފިސަރ ހުސެއިން ފިޔާޒް މޫސާ އެވެ.
މި ބައްދަލުވުމުގައި ރައީސް ވިދާޅުވީ ކުޅިވަރުގެ މިފަދަ ކަންކަމުގައި ޖޯޝް ގެނެސް، ރައްޔިތުން ޝައުގުވެރިކުރުވައި، ފޯރި ގެނައުމަށް މީޑިއާގެ ދައުރު ވަރަށް ބޮޑު ކަމަށެވެ. އެހެންވެ އެ މަގުސަދުގައި "އަދަދު" އިން މިފަދަ ގައިޑެއް ތައްޔާރުކުރީތީ ރައީސް ވަނީ ޝުކުރުއަދާކުރައްވައިފަ އެވެ.
"މި ފަދަ ފޮތްތަކަކީ، އޭގައި ހުންނަ މައުލޫމާތުތައް ތާރީހަށް ރައްކާތެރިކުރުމަށް ވެސް މުހިއްމު އެއްޗެއް،" ރައީސް ވިދާޅުވި އެވެ.
"އަދަދު" ގެ ސާފް ޗެމްޕިއަންޝިޕް ގައިޑް ފޮތް ރައީސް ސޯލިހު ބައްލަވާލައްވަނީ. --ފޮޓޯ: ރައީސް އޮފީސް
ފިޔާޒް ވިދާޅުވީ "އަދަދު" ގެ ކުޅިވަރު ޓީމުން ތައްޔާރުކުރި މިފޮތަކީ ކުޑަދުވަސްކޮޅެއްގެ ތެރޭ ވަރަށް ބުރަކޮށް މަސައްކަތްކޮށްގެން ނެރުނު ފޮތެއް ކަމަށާއި ބޭނުންވީ އަމިއްލަ ގައުމުގައި މިފަދަ ބޮޑު މުބާރާތެއް ބާއްވާއިރު ކިޔުންތެރިންނަށް ހަދިޔާއެއް ދިނުން ކަމަށެވެ.
"މީގައި ހުންނާނެ އެންމެ ފަހުގެ މައުލޫމާތުތައް. އަދި ޝައުގުވެރި ލިޔުންތައް،" އޭނާ ވިދާޅުވި އެވެ.
"އަދަދު" އިން ވަނީ މި ގައިޑް ރައްޔިތުންގެ މަޖިލީހުގެ ނާއިބް ރައީސް އީވާ އަބްދުﷲ އާއި އެކްޓިން ސްޕޯޓްސް މިނިސްޓަރު އަހުމަދު މައުސޫމް އާއި ފިނޭންސް މިނިސްޓަރު އިބްރާހިމް އަމީރު އަދު ކޮމިޝަނާ އޮފް ޕޮލިސް މުހައްމަދު ހަމީދު އަށް ވެސް ހަދިޔާކޮށްފަ އެވެ.
ސަތޭކަ ސަފުހާގެ މި ގައިޑް ރަސްމީކޮށް ނެރެދެއްވީ އިއްޔެ މެންދުރުފަހު ގަލޮޅު ދަނޑުގައި ބޭއްވި ރަސްމިއްޔާތެއްގައި އެފްއޭއެމްގެ ރައީސް ބައްސާމް އަދީލް ޖަލީލް އެވެ.
މުބާރާތުގެ މީޑިއާ ޕާޓްނަރު "އަދަދު" އިން އެ މީޑިއާގެ ފުރަތަމަ ޕަބްލިކޭޝަނުގެ ގޮތުގައި މި ގައިޑް ނެރުނީ ސަޕޯޓަރުންނަށްދޭ ހަދިޔާއެއްގެ ގޮތުގަ އެވެ. އެގޮތުން ސްޕޮންސަރުންގެ ވަރަށް ބޮޑު އެހީއަކާ އެކު ނެރުނު މި ފޮތް ވިއްކުމުގެ ބަދަލުގައި ހަމަޖައްސަފާއިވަނީ ހިލޭ ބަހާށެވެ.
މި ގައިޑުގައި މުބާރާތުގައި ވާދަކުރާ ޓީމުތަކުގެ އެންމެ ފަހުގެ މައުލޫމާތު ހިމެނެ އެވެ. އަދި ރާއްޖޭން ތަށި ހޯދި ދެ މުބާރާތް ކަމަށްވާ 2008 އާއި 2018 ގެ މުބާރާތާ ބެހޭ ވާހަކަތައް ހިމެނޭނެ އެވެ. އޭގެ ތެރޭގައި އޭރުގެ ކުޅުންތެރިންނާއި އޮފިޝަލުންގެ އިންޓަވިއުތައް ހިމެނެ އެވެ. މީގެ އިތުރުން ވެސް މުބާރާތުގެ ތާރީހާއި މި އަހަރުގެ މުބާރާތާ ބެހޭ ޝައުގުވެރި ލިޔުންތައް ހިމެނެ އެވެ.
"އަދަދު" ގެ ސާފް ޗެމްޕިއަންޝިޕް ގައިޑް ފޮތް ރައީސް ސޯލިހު އަށް ހަދިޔާކުރަނީ. --ފޮޓޯ: ރައީސް އޮފީސް
މި ގައިޑް ލިޔެފައިވަނީ "އަދަދު" ގެ އެސޯސިއޭޓް އެޑިޓަރ، ސްޕޯޓްސް، އައްޒާމް އަލިފުޅާއި "އަދަދު" ގެ މެނޭޖިން އެޑިޓަރ މުހައްމަދު ހަމްދޫން އަދި "ހަވީރު" ގެ ކުރީގެ ކުޅިވަރު ނޫސްވެރިޔާ ހަސަން ޝިފާން އެވެ. ފޮތުގެ ބްރޭންޑިން އާއި ލޭއައުޓް ހެދީ "އަދަދު" ގެ ވިޝުއަލް އެޑިޓަރު އަބްދުﷲ ޝަފީއު (އަބޯ) އެވެ.
މި ގައިޑަށް ދީފައިވާ ނަން ކަމަށްވާ "މަގޭ މަހަލްދީބް" އަކީ މުބާރާތުގެ ތެރޭގައި ސަޕޯޓަރުން ގެންގުޅޭނެ ޝިޔާރެވެ. ރާއްޖެއަށް އަވަށްޓެރި ގައުމުތަކުން ދީފައިވާ އެ ނަން، މި ފަހަރު ސަޕޯޓާސް ޗާންޓުގެ ގޮތުގައި ކަނޑައެޅީ މުބާރާތް މާކެޓްކޮށް ޕްރޮމޯޓްކުރާ ރާއްޖޭގެ އޭޖެންސީ، ނޯވާ އެސޯސިއޭޓްސް އިންނެވެ.
ދެކުނު އޭޝިއާގެ އެންމެ ބޮޑު ފުޓްބޯޅަ މުބާރާތުގެ މީޑިއާ ޕާޓްނަރުކަން "އަދަދު" އަށް ލިބުމާ އެކު އެ މީޑިއާ ވެފައިވަނީ 1993 ވަނަ އަހަރު ފެށި މި މުބާރާތުގެ މިފަދަ ރަސްމީ ހައިސިއްޔަތެއް ލިބުނު ރާއްޖޭގެ ފުރަތަމަ މީޑިއާ އަށެވެ. މިދިޔަ އޭޕްރިލް 3 ވަނަ ދުވަހު ވުޖޫދުވި "އަދަދު" އަކީ އެފްއޭއެމްގެ މީޑިއާ ޕާޓްނަރެއް ވެސް މެ އެވެ.
"އަދަދު" އިން އަންނަނީ މުބާރާތަށް ހާއްސަ ކަވަރޭޖެއް ގެނެސްދެމުންނެވެ. އަދި މުބާރާތް ފެށުމާ އެކު މެޗުތަކުގެ ހަބަރާއި ރިޕޯޓްތަކާއި ކުޅުންތެރިންނާއި ކޯޗުންގެ އިންޓަވިއުތައް ގެންނާނެ އެވެ. އޭގެ ތެރޭގައި މަލްޓިމީޑިއާ ކޮމްޕޯނަންޓް ވެސް ހިމެނޭނެ އެވެ. ކަވަރޭޖް ގެނެސްދޭނީ އެކަމަށްޓަކައި "އަދަދު" ގެ ވެބްސައިޓުގައި ގާއިމްކުރާ ހާއްސަ ސެކްޝަނެއްގަ އެވެ.
ސާފް ޗެމްޕިއަންޝިޕުގެ ފެށުމަކީ 1993 ވަނަ އަހަރު ޕާކިސްތާނުގައި ބޭއްވި ސާކް ގޯލްޑް ކަޕެވެ. މުބާރާތް ސާފް ޗެމްޕިއަންޝިޕުގެ ނަމުގައި ބާއްވަން ފެށީ 1997 ވަނަ އަހަރު އެވެ. މިހާތަނަށް 12 ފަހަރު ބާއްވާފައިވާއިރު ރާއްޖޭން ވަނީ ދެ ފަހަރު ޗެމްޕިއަންކަން ހޯދައިފަ އެވެ. އެންމެ ކާމިޔާބު ގައުމަކީ ހަތް ފަހަރު ތަށި ހޯދާފައިވާ އިންޑިއާ އެވެ. ބަންގްލަދޭޝް، އަފްގާނިސްތާން އަދި ސްރީ ލަންކާ، މީގެ ތެރެއިން ކޮންމެ ގައުމަކުން ވަނީ އެއް ފަހަރު ޗެމްޕިއަންކަން ހޯދައިފަ އެވެ.
"އަދަދު" ގެ ސާފް ޗެމްޕިއަންޝިޕް ގައިޑް ފޮތް ރައީސް ސޯލިހު ބައްލަވާލައްވަނީ. --ފޮޓޯ: ރައީސް އޮފީސް
މި އަހަރުގެ މުބާރާތުގައި ވާދަކުރާނީ ރާއްޖޭގެ އިތުރުން އިންޑިއާ، ލަންކާ، ބަންގްލަދޭޝް އަދި ނޭޕާލް އެވެ. ފައިނަލަށް ހޮވޭނީ ލީގު އުސޫލުން އެއް ބުރު ކުޅެ އެންމެ ގިނަ ޕޮއިންޓް ހޯދާ ދެ ޓީމެވެ.
މިއީ ރާއްޖޭގައި މި މުބާރާތް ބާއްވާ ދެ ވަނަ ފަހަރެވެ. މީގެ ކުރިން 2008 ގައި ބޭއްވި ލަންކާއާ ގުޅިގެންނެވެ. މުބާރާތް ހުޅުވި މެޗު މާލޭގައި އޮތްއިރު ފައިނަލް ކުޅެ ރާއްޖެ ތަށި ނެގީ ކޮލަމްބޯގަ އެވެ.
މި މުބާރާތް ވެގެންދާނީ ރާއްޖޭން ހޯސްޓްކުރާ ބައިނަލްއަގްވާމީ ހަތަރު ވަނަ މުބާރާތަށެވެ. އަނެއް ތިން މުބާރާތަކީ ސާފް ޗެމްޕިއަންޝިޕުގެ އިތުރުން 2000 ވަނަ އަހަރުގެ ގޯލްޑަން ޖުބިލީ މުބާރާތާއި 2014 ވަނަ އަހަރުގެ އޭއެފްސީ ޗެލެންޖް ކަޕެވެ.
