މޮސްކޯ، ރަޝިއާ (ސެޕްޓެމްބަރު 29) - ރަޝިއާ އާއި ތުރުކީ އަކީ އެއް ގައުމު އަނެއް ގައުމަށް ދޫދީގެން ކުރިއަށްދާ ދެ ގައުމު ކަމަށް ރަޝިއާގެ ރައީސް ލެޑިމިއަ ޕޫޓިން ވިދާޅުވެއްޖެ އެވެ.
ރަޝިއާ އާއި ތުރުކީއާ ދެމެދު ފަހަކަށް އައިސް ގިނަ ހިޔާލު ތަފާތުވުން ތަކެއް އުފެދިފައި ވާއިރު އެންމެ ބޮޑު އެއް މައްސަލައަކީ ސީރިއާގެ ދާހިލީ ހަނގުރާމައިގައި ދެ ގައުމުން ވާދަވެރި ދެ ފަޅިއަށް ތާއީދު ކުރުމެވެ.
"މަޝްވަރާ އަކީ ބައެއް ފަހަރު ވަރަށް އުނދަގޫ ކަމެއް. އެ ކަމަކު އެންމެ ފަހުން ނިކުންނަނީ ޕޮޒިޓިވް ނަތީޖާއެއް،" ބްލެކް ސީގެ ރިސޯޓު ސިޓީ ސޯޗީގައި ހުންނަ ގެކޮޅުގައި ހުންނެވި ޕޫޓިން ވިދާޅުވި އެވެ.
އޭނާ އިތުރަށް ވިދާޅުވީ ދެ ގައުމުން ވެސް ދޫދީގެން ދެ ގައުމަށް ފައިދާ ހުރި ގޮތްތަކާ ހަމައަށް ދިޔުމަށް ދަސްކޮށްފައިވާ ކަމަށެވެ.
މި ވަގުތު ޕޫޓިންއާ ބައްދަލުކުރެއްވުމަށް ރަޝިއާގައި ހުންނެވި ތުރުކީގެ ރައީސް ތައްޔިބް އުރުދުގާން ވިދާޅުވީ ތުރުކީ އާއި ރަޝިއާ އިން ވަރުގަދަ ގުޅުމެއް ދެމެހެއްޓުމުގެ ފައިދާ ކޮންމެ ދުވަހަކު ވެސް ފެންނަމުންދާ ކަމަށެވެ.
ޕޫޓިން އާއި އުރުދުގާން އަކީ ވަރަށް ގިނައިން ބައްދަލުކުރައްވާ ދެ ލީޑަރުންނެވެ. މިދިޔަ އަހަރު ތުރުކީ އާއި ރަޝިއާގެ މަސައްކަތުން ސީރިއާގެ ހުޅަނގު ދެކުނު އިދްލިބް ސަރަހައްދުގައި ހަނގުރާމަ މެދުކަނޑާލުމުގެ އެއްބަސްވުމާ ހަމައަށް ދިޔަ އެވެ.
"ސީރިއާއާ ގުޅިގެން ރަޝިއާއާ އެކު އަޅުގަނޑުމެން އަޅާފައިވާ ފިޔަވަޅުތައް ވަރަށް މުހިއްމު. ސީރިއާގައި ސުލްހަގާއިމްވުން ބިނާވަނީ ތުރުކީ އާއި ރަޝިއާގެ ގުޅުން އޮންނަ ގޮތެއްގެ މައްޗަށް، އުރުދުގާން ވިދާޅުވި އެވެ.
