ޖޮހަނެސްބާގް، ދެކުނު އެފްރިކާ (ސެޕްޓެމްބަރު 29) - ކޮވިޑު ފަންޑުން 10 މިލިއަން ޑޮލަރު ވަގަށް ނެގި ކަމަށް ތުހުމަތު ކުރެވޭ މައްސަލައެއްގައި ދެކުނު އެފްރިކާގެ ކުރީގެ ހެލްތު މިނިސްޓަރާއި އިސް އޮފިޝަލަކު ހައްޔަރު ކުރަން ގޮވާލައިފި އެވެ.
ސްޕެޝަލް އިންވެސްޓިގޭޝަން ޔުނިޓް (އެސްއައިޔޫ) އިން ނެރުނު ތަހުގީގީ ރިޕޯޓެއްގައި ބުނީ ޑިޖިޓަލް ވައިބްސް ކުންފުނިންޏާ ޕްރޮޖެކްޓުތައް ހަވާލުކުރުމުގެ މަސައްކަތުގައި އިސްކޮށް އުޅުނީ ކުރީގެ ހެލްތު މިނިސްޓަރު ޒްވެލީ މިކީޒޭ ކަމަށެވެ. ޑިޖިޓަލް ވައިބްސް އަކީ މިކީޒޭގެ ކުރީގެ ތަރުޖަމާނު އަދި ހާއްސަ އެސިސްޓެންޓު ހިންގާ ކުންފުންޏެކެވެ.
ބަލިމަޑުކަމުގައި ރައްކާތެރިވުމުގެ ގޮތުން ކުރެވޭނެ ކަންކަމާ ގުޅޭ ގޮތުން އާއްމުން ހޭލުންތެރި ކުރުވުމަށް ކަނޑައެޅި ފަންޑުން މިކީޒޭގެ ދަރިފުޅު، ޑެޑާނީ، ވަނީ ލޭންޑް ކްރޫޒާ އުޅަނދެއް ގަނެ، ގިނަ އަދަދެއްގެ ނަގުދު ފައިސާ އަތަށް ނަގާފައި ކަމަށް ރިޕޯޓުގައި ބުންޏެވެ.
އެސްއައިޔޫ އަކީ ގާނޫނު ތަންފީޒު ކުރަން ހާއްސަ މިނިވަން އެޖެންސީ އެކެވެ. އެ ތަނުން ކުރި ތަހުގީގަށް ފަހު ރިޕޯޓުގައި އިތުރަށް ބުނީ ހެލްތު މިނިސްޓްރީގެ ކުރީގެ ޑިރެކްޓަރު ޖެނެރަލް އެންޓޮން ޕިލޭ އަށް ވެސް ދައުވާ ކުރަން ޖެހޭ ކަމަށެވެ.
އެންމެ ފަހުން ހެލްތު މިނިސްޓްރީގެ ޑިރެކްޓަރު ޖެނެރަލަކަށް ހުރި ސެންޑިލް ބުތެލެޒީ މަގާމުން ސަސްޕެންޑު ކުރީ މިދިޔަ ހަފުތާ ބަންދުގަ އެވެ.
އެ ރިޕޯޓުގައި ރައީސް ސިރިލް ރަމަފޯސާ އަށް ގޮވާލާފައި ވަނީ މިދިޔަ އޯގަސްޓު މަހު އިސްތިއުފާ ދެއްވި ކުރީގެ ހެލްތު މިނިސްޓަރު މިކީޒޭ އާއި އިތުރު ހަ އޮފިޝަލަކާ ދެކޮޅަށް ފިޔަވަޅު އެޅުމަށެވެ. އަޅަން އެދޭ ފިޔަވަޅުތަކާ ގުޅޭ ތަފްސީލް ފަހުން ހާމަކުރާނެ ކަމަށް އެސްއައިޔޫ އިން ބުންޏެވެ.
ފަންޑުން ވަގަށް ނެގި ފައިސާތައް ހޭދަކުރި ގޮތާ ގުޅޭ މާ ބޮޑު ތަފްސީލެއް ރިޕޯޓުގައި ނެތެވެ. ނަމަވެސް ދެކުނު އެފްރިކާގެ ނޫސްތަކުން ބުނާ ގޮތުގައި ޑިޖިޓަލް ވައިބްސް ކުންފުނީގެ އިސް އޮފިޝަލަކު ވަނީ ކޮވިޑުގެ ދެ ވަނަ ރާޅުގެ ތެރޭގައި މުޅި އާއިލާ ގޮވައިގެން ތުރުކީގައި މަސްތަކަކަށް ދެމިގެން ދިޔަ ޗުއްޓީއެއް ހޭދަކޮށްފަ އެވެ.
އޭގެ އިތުރުން ލަގްޒަރީ މުދާ ގަންނަން ވެސް ފައިސާ ހޭދަކުރި ކަމަށް ނޫސްތަކުން ރިޕޯޓުކޮށްފައި ވެ އެވެ. އެސްއައިޔޫ އިން ވަނީ ގެއްލުނު ފައިސާތައް އަނބުރާ ހޯދުމަށް ބައެއް ފިޔަވަޅުތައް އަޅާފަ އެވެ.
