ލިޔެކިޔުން ހޯދަން ދަތިވެ ބައެއް މީހުންނަށް ދަތުރުނުކުރެވޭތީ, މުއްދަތު ހަމަވެފައިވާ ރަސްމީ ލިޔެކިޔުންތައް މިއަދުން ފެށިގެން އެތެރޭގެ އުދުހުންތަކުގައި ބޭނުންކުރެވޭ ގޮތަށް ޑިފެންސް މިނިސްޓްރީން ހަމަޖައްސައިފި އެވެ.
އެ މިނިސްޓްރީގެ ދަށުން ހިންގާ ޑިޕާޓްމަންޓް އޮފް އޭވިއޭޝަން އެޑްމިނިސްޓްރޭޝަނުން މި ގެނައި ބަދަލާ ގުޅިގެން ބުނީ، ކޮވިޑުގެ ހާލަތުގެ ސަބަބުން އައިޑެންޓިފިކޭޝަނުގެ ގޮތުގައި ބޭނުންކުރާ ލިޔެކިޔުން ހޯދުމުގައި ދަތިތައް މެދުވެރިވާ ކަމުގެ ޝަކުވާ ލިބެމުންދާ ކަމަށެވެ.
މިކަން ހައްލުކުރުމުގެ ގޮތުން އޭވިއޭޝަން އެޑްމިނިސްޓްްރޭޝަނުން ވަނީ މުއްދަތު ހަމަވެފައިވާ ލިޔެކިޔުންތަކުގައި ހުރި މައުލޫމާތު ސާފުކޮށް އެނގޭނަމަ، އެތެރޭގެ ވައިގެ ދަތުރުތަކުގައި ބޭނުންކުރެވޭ ގޮތަށް ހަމަޖައްސާފަ އެވެ.
އަދި މި އުސޫލަށް އަމަލުކުރުމަށް އެއާޕޯޓް އޮޕަރޭޓަރުންނަށާއި، އެއާލަންތަކަށާއި އޭވިއޭޝަން ސެކިއުރިޓީ ކޮމާންޑަށް ވަނީ އަންގާފަ އެވެ.
މިގޮތުން ގެނައި ބަދަލާ ގުޅިގެން ދިވެހިންނަށާއި ރާއްޖޭގައި އުޅޭ ބިދޭސީންނަށް ވެސް ފަސޭހަތަކެއް ވަނީ ލިބިފަ އެވެ.
އެތެރޭގެ އުދުހުންތަކުގައި ބޭނުންކުރެވޭ ލިޔެކިޔުން
- ޕާސްޕޯޓް
- ދިވެހި ރައްޔިތެއްކަން އަންގައިދޭ ކާޑު
- ވާކް ވީސާ ކާޑް
- ލައިސަންސް ކާޑް
- އެއާޕޯޓް ސެކިއުރިޓީ ޕާސް
- ސަރުކާރުގެ އިދާރާއަކުން ދޫކޮށްފައިވާ ފޮޓޯ އަދި އައިޑީ ކާޑު ނަމްބަރު ޖެހި ރަސްމީ ލިޔުމެއް
މިއީ ވަގުތީ ގޮތުން ގެނައި ބަދަލެއް ނަމަވެސް، މި އުސޫލަށް އަމަލުކުރާނީ ކިހާ މުއްދަތަކަށް ކަމެއް ޑިފެންސް މިނިސްޓްރީގެ ބަޔާނުގައި ބުނެފައެއް ނުވެ އެވެ.
ހަމައެކަނި ބުނީ އެ ނޫން ގޮތަކަށް އަންގަން ދެން މިހާރު ގެނައި ބަދަލުތަކަށް އަމަލު ކުރުމަށެވެ.
