މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ މުވައްޒަފުންގެ މުސާރަ ފަސް ޕަސެންޓާ 20 ޕަސެންޓާ ދޭތެރޭގެ އަދަދަކަށް ބޮޑުކުރަން އެ ކުންފުނިން ނިންމައިފި އެވެ.
އެއާޕޯޓް ކުންފުނީގެ މުވައްޒަފުންގެ މުސާރަ ބޮޑުކުރުމާ ގުޅިގެން ނެރުނު ބަޔާނުގައި ބުނީ މުސާރަ އިތުރުކުރާއިރު 20 ޕަސެންޓު އިތުރު ވާނީ އެންމެ ކުޑަ މުސާރަ ލިބޭ ގިންތިތަކަށް ކަމަށެވެ. އަދި އެ ގިންތިން މަތިން މުސާރަ ލިބޭ މީހުންގެ މުސާރައަށް އިތުރުވާނީ ފަސް ޕަސެންޓު ކަމަށް ބުންޏެވެ.
މުސާރަތައް ބޮޑުކުރަން ނިންމި ސަބަބާ ގުޅިގެން އެމްއޭސީއެލްއިން ބުނި ގޮތުގައި، މިއީ ކޮވިޑުގެ އެންމެ ދަތި ހާލުގައި ވެސް ކުންފުނީގެ މަސައްކަތްތަކަށް ބުރޫނާރާނެހެން މުވައްޒަފުން ކުރި ބުރަ މަސައްކަތުގެ އަގުވަޒަން ކުރަން ނިންމު ނިންމުމެކެވެ.
އެގޮތުން ރާއްޖޭގައި އެންމެ ގިނަ ބަޔަކު ވަޒީފާ އަދާކުރާ ކުންފުނީގެ ހައިސިއްޔަތުން އެ ކުންފުނިން އަބަދުވެސް މާކެޓު އަގުތަކާ އެއްވަރަށް މުވައްޒަފުންގެ މުސާރަތަކާއި އިނާޔަތްތައް މުރާޖާކުރާ ކަމަށް ބުންޏެވެ. އަދި މި ބަދަލަކީ ވެސް އެގޮތުގެ މަތިން ގެނައި ބަދަލެއް ކަމަށް ވެސް ބުންޏެވެ.
އެ ކުންފުނީގެ މުވައްޒަފުންނަށް ލިބޭ އިނާޔަތްތަކުގެ ތެރޭގައި، ހެލްތް އިންޝުއަރެންސާއި، ހިލޭ ދަތުރުފަތުރާއި، ސްޓާފް ލޯން ސްކީމާއި، ސްޓާފް ޗިލްޑްރަން ލޯން ސްކީމާއި، ސްޓާފް ޑިވެލޮޕްމަންޓް ސްކީމް ހިމެނެ އެވެ.
އެމްއޭސީއެލްއިން ކުންފުނީގެ މުވައްޒަފުންގެ މުސާރަ ބޮޑުކުރީ، މުވައްޒަފުންގެ މުސާރަތައް ހާމަކުރަން އެ ކުންފުނިން އިންކާރުކޮށްފައިވާ ދަނޑިވަޅެއްގަ އެވެ.
މި މުސާރަތައް ހޯދަން އާރްޓީއައި އެކްޓިވިސްޓް އައިމަން އިސްމާއިލް ހުށަހެޅި މައްސަލައިގެ ޖަވާބުގައި އެ ކުންފުނިން ބުނީ، އާރްޓީއައި ގާނޫނުގެ ދަށުން އެ ކުންފުނިން އެ މައުލޫމާތު ހާމަކުރަން ނުޖެހޭ ކަމަށެވެ.
