އެމްއެމްޕީއާރްސީގެ ކޮރަޕްޝަނާ ގުޅޭ ދައުވާއެއް އުފުލާފައިވާ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ ކުރީގެ އިސްވެރިޔާ އާތިފް ޝަކޫރުގެ ވަކީލެއްގެ ގޮތުގައި ކުރީގެ އެސިސްޓެންޓް ޕްރޮސިކިއުޓާ ޖެނަރަލް އައިޝަތު ފަޒުނާ އައްޔަންވެފައިވާތީ, ދައުލަތުން އިއުތިރާޒުކޮށްފި އެވެ.
އާތިފް ޝަކޫރުގެ މައްޗަށް ކުރަނީ މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނާ ހިލާފުވުމުގެ ކުށުގެ ދައުވާ އެވެ.
އެ ދައުވާ ކުރަނީ އެމްއެމްޕީއާރުސީގެ ހިޔާނާތުގައި ބައިވެރިވެރި އެސްއޯއެފް ކުންފުނިން މަނީ ލޯންޑަރިންގެ އަމަލުތައް ހިންގިކަން އެފްއައިޔޫގެ ރިޕޯޓުގައި ބަޔާން ކުރި ނަމަވެސް, އެ މައްސަލައިގައި އެސްއޯއެފްއަށް އެއްވެސް ފިޔަވަޅެއް ނަޅާއި ދޫކޮށްލަން ނިންމީ އާތިފް އަންގައިގެން ކަމަށް ބުނެ އެވެ.
މި މައްސަލައިގައި ކުރިމިނަލް ކޯޓުގައި މިއަދު ބޭއްވި އަޑުއެހުމަށް އާތިފްގެ ވަކީލެއްގެ ގޮތުގައި ވަޑައިގެންނެވީ ކުރީގެ ބަންޑާރަ ނައިބު އާޒިމާ ޝުކޫރާއި އައިޝަތު ފަޒުނާ އެވެ. އަދި, އޭގެއިތުރުން ކުރީގެ ޑެޕިއުޓީ ޕްރޮސެކިއުޓާ ޖެނަރަލް މަރިޔަމް ނިހާޔަތަކީ ވެސް އާތިފްގެ ވަކީލެކެވެ.
އަޑުއެހުން ފެށުމާއެކު, ޕްރޮސިކިއުޓާ ޖެނަރަލްގެ ވަކީލް, އިޖުރާއީ ނުކުތާއެއް ނަންގަވައި, މި މައްސަލައިގައި ދިފާއީ ވަކީލެއްގެ ގޮތުގައި ބައިވެރިވާން ފަޒުނާއަށް ފުރުސަތު ދިނުމަށް އުޒުރުވެރިވާ ކަމަށް ވިދާޅުވެފަ އެވެ.
އޭގެ ސަބަބެއް ކަމަށް ވަކީލް ވިދާޅުވީ އާތިފްގެ މައްސަލަ 2016 ވަނަ އަހަރު ތަހުގީގު ކުރަން ފަށައި, 2017 ވަނަ އަހަރުން ފެށިގެން އެންޓި ކޮރަޕްޝަން ކޮމިޝަނުން ޕްރޮސިކިއުޓާ ޖެނަރަލްގެ އޮފީހާ މަޝްވަރާ ކުރަމުން ގޮސްފައިވާތީ އެވެ.
އެސިސްޓެންޓް ޕްރޮސިކިއުޓާ ޖެނަރަލްގެ މަގާމުގައި އޭރު ފަޒުނާ ހުންނެވިއިރު, އޭނާ އެ މަގާމުން އިސްތިއުފާ ދެއްވީ 2018 ވަނަ އަހަރުގެ އޯގަސްޓް މަހު އެވެ. އެހެންވެ, މި މައްސަލައިގައި ދިފާއީ ވަކީލަކަށް ފަޒުނާއަށް ބައިވެރިވެވޭނެ ކަމަށް ގަބޫލު ނުކުރައްވާ ކަމަށް ވަކީލް ވިދާޅުވި އެވެ.
ދައުލަތުގެ ވަކީލް ފާހަގަ ކުރެއްވި ގޮތުގައި, ވަކީލަކު މަސައްކަތްކުރި އިދާރާއެއް ނުވަތަ މުއައްސަސާއަކުން ވަކިވުމުގެ ކުރިން އެ އިދާރާއަކަށް ނުވަތަ މުއައްސަސާއަކަށް ހުށަހެޅި ނުވަތަ މަޝްވަރާކޮށްފައިވާ މައްސަލައެއްނަމަ އެފަދަ މައްސަލައެއްގައި ދިފާއީ ވަކީލެއްގެ ގޮތުގައި ވަކާލާތު ނުކުރެވޭނެ އެވެ.
ނަމަވެސް, އާޒިމާ އެކަމަށް ރައްދު ދެއްވައި ވާހަކަ ދެއްކެވި އެވެ.
އާޒިމާ ވިދާޅުވީ މައްސަލަ ތަހުގީގުކޮށް ދައުވާކޮށްފައިވަނީ 2020 ވަނަ އަހަރު ކަމުން, ފަޒުނާއަށް މައްސަލާގައި ބައިވެރިނުވެވޭންވީ ސަބަބެއް ނުވިސްނޭ ކަމަށެވެ. ނަމަވެސް, ދައުލަތުން ވަނީ މައްސަލައިގެ ތަހުގީގު 2016 އިން ފެށިގެން ކުރިއަށްދާ ކަމަށް ބުނެ ރައްދު ދީފަ އެވެ.
ދެން އާޒިމާ ވިދާޅުވީ, އެމީހަކު ބޭނުންވާ ވަކީލަކު އައްޔަން ކުރުމަކީ އަސާސީ ހައްގަކަށްވާއިރު, ފަޒުނާއަށް ބައިވެރިނުވެވޭ އަސާސް ދައުލަތުން ސާބިތުކޮށް ދޭން ޖެހޭނެ ކަމަށެވެ. އެގޮތުން, މަޝްވަރާތަކުގައި ފަޒުނާ ބައިވެރިވިކަން ސާބިތުކޮށްދޭން ޖެހޭނެ ކަމަށެވެ.
އެހެންވެ, ދައުލަތުން ވަނީ އެކަމުގައި މަޝްވަރާ ކުރެވުނު ނޯޓްސްތައް ޝަރީއަތަށް ހުށަހަޅަން ނިންމާފަ އެވެ. ދެން އޮންނަ އަޑުއެހުމެއްގައި އެ ނޯޓްސްތަކަށް ރިއާޔަތްކޮށް, ފަޒުނާ ވަކީލެއްގެ ގޮތުގައި އައްޔަންވުމާމެދު ގޮތެއް ނިންމަވާނެ ކަމަށް މައްސަލަ ބައްލަވާ ގާޒީ، ކޯޓުގެ އިސްގާޒީ އަހުމަދު ޝަކީލް ވިދާޅުވި އެވެ.
މީގެކުރިން ވެސް ފަޒުނާ އާއި ނިޔާހަތު, މައްސަލައެއްގައި ދިފާއީ ވަކީލެއްގެ ގޮތުގައި ދިޔުމުން ދައުލަތުން އިއުތިރާޒުކޮށްފައި ވެ އެވެ. އެއީ, 2006 ވަނަ ގއ. މާމެންދޫގައި މުހައްމަދު ޝިހާބު ކިޔާ މީހެއްގެ ގައިގާ ލަކުޑިބުރިތަކަކުން ހަތަރު މީހަކު ވެގެން ތަޅައި މަރާމާރީ ހިންގުމުގެ ސަބަބުން ޝިހާބު މަރުވި ހާދިސާއާ ގުޅޭ މައްސަލައެކެވެ.
