އަންނަ ހުކުރު ދުވަހު ފަށާ އުރީދޫ ސާފް ޗެމްޕިއަންޝިޕަށް ގައުމީ ސްކޮޑު އެއްކޮށް ފައިނަލް ކުރާނީ މުހައްމަދު ނާއިމް އާއި އަލީ ހައިޝަމް (ޗުމްޕު)ގެ އަނިޔާގެ ކަންތައްތައް ރަނގަޅަށް ބެލުމަށް ފަހު ކަމަށް ސާފް ޗެމްޕިއަންޝިޕަށް ހަމަޖައްސާފައިވާ ގައުމީ ކޯޗު އަލީ ސުޒޭން ބުނެފި އެވެ.
ޗުމްޕު އަށް އަނިޔާވެފައިވަނީ މި މަހު 21 ވަނަ ދުވަހު ގަތަރުގެ ލުސައިލް އެފްސީ އަތުން 4-3 އިން މޮޅުވި މެޗުގަ އެވެ. ޗުމްޕު ވަނީ އެ މެޗުގައި ދެ ގޯލު ޖަހައި ޕެނަލްޓީއެއް ހޯދައިދީފަ އެވެ. އެ މެޗުގެ ދެ ވަނަ ހާފްގައި ޗުމްޕުގެ އަނިޔާވީ އުކުޅު ވަޅަށެވެ. ނާއިމަށް އަނިޔާވީ ހޮނިހިރު ދުވަހުގެރޭ ގަތަރުގެ އާމީ ނެޝަނަލް ޓީމާ 1-1 އިން އެއްވަރުވި މެޗުގަ އެވެ. ނާއިމްގެ ފަޔަށް އަނިޔާވެގެން ބަދަލުކުރަން ޖެހުނީ ކުޅެން އެރިތާ މާގިނައިރެއް ނުވެ އެވެ.
ގަތަރު ޓްރެއިނިން ކޭމްޕް ނިންމާލިިއިރު، ގައުމީ ޓީމުން ސްކޮޑު 24 ކުޅުންތެރިންނަށް ކުޑަ ކުރި އެވެ. އެ 24 ކުޅުންތެރިންގެ ތެރޭގައި ނާއިމާއި ޗުމްޕު ހިމެނެ އެވެ.
ގައުމީ ޓީމުގެ ކޯޗު ސުޒޭން ބުނީ ކުރިއަށް އޮތް ދުވަސްތަކުގެ ތެރޭގައި މުބާރާތަށް 23 ކުޅުންތެރިން ފައިނަލް ވެގެންދާނެ ކަމަށާއި އެހާތަނަށް ނާއިމާއި ޗުމްޕުގެ އަނިޔާގެ ކަންތައްތައް ބަލަން ކުރަން ޖެހޭ ކަންތައްތައް ނިމޭނެ ކަމަށެވެ.
ގަައުމީ ޓީމުން ގަތަރު ޓްރެއިނިން ކޭމްޕް ނިންމާލުމަށް ފަހު އިއްޔެ ވަނީ އެނބުރި ރާއްޖެ އައިސްފަ އެވެ. ސާފް ޗެމްޕިއަންޝިޕް މެޗުތަކަށް ގައުމީ ޓީމު ކޭމްޕް ޖެހީ ހޮޓެލް ޖެންގަ އެވެ.
މި ފަހަރުގެ މުބާރާތް ރޭވިފައި އޮތީ ފަސް ގައުމުގެ މެދުގައި ފުރަތަަމަ ލީގު ބުރެއް ކުޅެފައި އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށް ދާ ގޮތަށެވެ. މުބާރާތް ކުރިއަށްދާނީ އަންނަ ހުކުރު ދުވަހުން ފެށިގެން 16 ދުވަހުގެ މުއްދަތަށެވެ.
މި ފަހަރުގެ ސާފް ޗެމްޕިއަންޝިޕްގައި ރާއްޖެ ކުޅޭ ފުރަތަމަ މެޗުގައި އަންނަ ހުކުރު ދުވަހުގެރޭ ނޭޕާލާ ކުޅުމަށް ފަހު ދެ ވަނަ މެޗުގައި ހަތް ވަނަ ދުވަހުގެރޭ ބަންގްލަދޭޝްއާ ބައްދަލުކުރާނެ އެވެ. ތިން ވަނަ މެޗުގައި 10 ވަނަ ދުވަހު ހަވީރު ލަންކާއާ ކުޅުމަށް ފަހު ލީގު ބުުރުގެ ފަހު މެޗުގައި އަންނަ މަހު 13 ވަނަ ދުވަހުގެރޭ ކުޅޭނީ އިންޑިއާއާ އެވެ.
