އައްޑޫ ސިޓީ ހިތަދޫގައި މާބަނޑު ނަރުހަކަށް ވަޅިން ހަމަލާދީ ޒަހަމް ކޮށްލި މައްސަލައާ ގުޅިގެން ދެ މީހަކު ހައްޔަރުކޮށްފި އެވެ.
މި މާރާމާރީ ހިންގާފައިވަނީ މިދިޔަ ހަފްތާގެ ހުކުރު ދުވަހު އައްޑޫ ހިތަދޫގައި ސައިކަލެއްގައި ދިޔަ ދެ މީހަކަށް ވަޅިން ހަމަލާދީގެންނެވެ.
މި ހާދިސާގައި އުމުރުން 27 އަހަރުގެ ފިރިހެނަކަށާއި އޭނާގެ ފަހަތުގައި އިން 23 އަހަރުގެ އަންހެނަކަށް އަނިޔާވި އެވެ. އެ އަންހެން މީހާއަކީ މާބަނޑު މީހެކެވެ. އަދި އައްޑޫ އިކުއަޓޯރިއަލް ހޮސްޕިޓަލްގައި މަސައްކަތް ކުރަމުންދާ ނަރުހެއްވެސް މެއެވެ.
ފުލުހުން ބުނީ އެ މާރާމާރީއާ ގުޅިގެން 27 އަހަރުގެ ދެ ފިރިހެނަކު ހައްޔަރުކޮށްފައިވާ ކަމަށެވެ.
މި މާރާމާރީގެ ކުރިން އެ ދުވަހުގެ މެންދުރުގެ ވަގުތެއްގައި ވެސް އައްޑޫގައި މާރާމާރީއެއް ހިނގާފައިވެ އެވެ. އެ ހާދިސާގައި އުމުރުން 29 އަހަރުގެ ފިރިހެނެއްގެ ބޮލާއި ކަރަށް ވަޅިން ހަމަލާދީފައިވެ އެވެ.
އެ މާރާމާރީގައި ހައްޔަރު ކުރީ 31 އަހަރުގެ ފިރިހެނެކެވެ. އޭނާ ވަނީ ޝަރީއަތް ނިމެންދެން ބަންދުކޮށްފަ އެވެ.
މައުލޫމާތު ލިބޭ ގޮތުގައި މި ދެ މާރާމާރީވެސް ގުޅެނީ ދެ ގޭންގްއެއްގެ މެދުގައި ޖެހުނު މައްސަލައަކަށެވެ.
titledesc
