މެންޗެސްޓާ (ސެޕްޓެމްބަރު 24) - މެންޗެސްޓާ ޔުނައިޓެޑަށް ފަހަކަށް އައިސް ޕެނަލްޓީ މަދުން ލިބޭ ސަބަބަކީ މިދިޔަ ސީޒަނުގައި ލިވަޕޫލްގެ ކޯޗު ޔާގެން ކްލޮޕް ދެއްކި ވާހަކަތަކާ ހެދި ކަމަށް ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނެފި އެވެ.
މިދިޔަ ޖެނުއަރީ މަހު ކްލޮޕް މީޑިއާ އަށް ދިން އިންޓަވިއުއެއްގައި ބުނީ ލިވަޕޫލަށް މިދިޔަ ފަސް އަހަރާއި ބައި ތެރޭ ޕެނަލްޓީ ލިބުނު ވަރަށް ވުރެ ގިނައިން ޔުނައިޓެޑަށް މިދިޔަ ދެ އަހަރު ތެރޭ ޕެނަލްޓީ ލިބިފައިވާ ކަމަށެވެ.
ކްލޮޕް އެ ވާހަކަ ދެއްކި ފަހުން ޔުނައިޓެޑަށް ހުރިހާ މުބާރާތެއްގައި ހަތް ޕެނަލްޓީ ދިންއިރު، ލިވަޕޫލަށް ލިބުނީ ތިން ޕެނަލްޓީ އެވެ. މި ސީޒަނަށް ބަލާނަމަ ލިވަޕޫލަށް ވަނީ ޗެމްޕިއަންސް ލީގާއި ޕްރިމިއާ ލީގުގައި ޕެނަލްޓީއެއް ލިބިފަ އެވެ. ޔުނައިޓެޑަށް އަދި މި ސީޒަނުގައި ޕެނަލްޓީއެއް ނުލިބެ އެވެ.
އިނގިރޭސި ޕްރިމިއާ ލިގާއި ލީގު ކަޕްގައި ޔުނައިޓެޑުން އެންމެ ފަހުން ކުޅުނީ ވެސްޓް ހޭމްއާ އެވެ. ޕްރިމިއާ ލީގުގައި ޔުނައިޓެޑުން ވަނީ ވެސްޓް ހޭމް ދަނޑުގައި 2-1 އިން މޮޅުވެފަ އެވެ. އެކަމަކު، ލީގު ކަޕްގައި ޔުނައިޓެޑް ދަނޑުގައި ވެސްޓް ހޭމް 1-0 އިން މޮޅުވީ އެވެ. ވެސްޓް ހޭމް ދަނޑުގައި އޭރިއާތެރެއިން ޔުނައިޓެޑްގެ ކްރިސްޓިއާނޯ ރޮނާލްޑޯ އަށް ދެ ފައުލެއް ކުރިއިރު ޕެނަލްޓީ ނުދެ އެވެ. އަދި ލީގު ކަޕްގައި ވެސް ޕެނަލްޓީ ދޭން ޖެހޭ ފައުލެއް ވެސްޓް ހޭމް އިން ކުރިއިރު ޕެނަލްޓީ ނުދެ އެވެ.
ސޯލްޝެއާ މިއަދު ބުނީ ޝަކުވާއެއް ކުރަން ބޭނުންނުވާ ކަމަށާއި އެދެނީ އެ ޓީމަށް ހައްގުވާ ޕެނަލްޓީ ދޭން ކަމަށެވެ.
"މިދިޔަ އަހަރު ކޮންމެ ވެސް އެއް ކޯޗަކު އުޅުނު ޔުނައިޓެޑަށް ގިނައިން ޕެނަލްޓީ ދޭތީ ކަންބޮޑުވެގެން. އެ އަށް ފަހު އަހަރެމެންނަށް ޕެނަލްޓީ ދިނުން ވެފައި އޮތީ އުނދަގޫ ކަމަކަށް. ޔަގީނުން ވެސް އެ ވާހަކަ ތަކަށް ފަހު (ޕެނަލްޓީގެ ކަންތައްތަކުގައި އަހަންނަށް ފެންނަ މަންޒަރު ވަރަށް ތަފާތު. އުއްމީދަކީ ވީހާ ވެސް އަވަހަށް ރެފްރީން ރަނގަޅު ނިންމުންތައް ނިންމަން ފެށުން،" ޕެނަލްޓީ ނުދޭ މައްސަލައިގައި ކްލޮޕަށް އިޝާރާތްކޮށް ސޯލްޝެއާ ބުންޏެވެ.
ސޯލްޝެއާ، 2018 ވަނަ އަހަރުގެ ޑިސެމްބަރު މަހު ޔުނައިޓެޑާ ހަވާލުވި ފަހުން ހުރިހާ މުބާރާތެއްގައި ޔުނައިޓެޑަށް ވަނީ 49 ޕެނަލްޓީ ލިބިފަ އެވެ. އެ މުއްދަތުގެ ތެރޭގައި ލިވަޕޫލަށް ލިބިފައިވަނީ 22 ޕެނަލްޓީ އެވެ.
ޔުނައިޓެޑް އެންމެ ފަހުން ކުޅުނު މެޗުތަކުގައި އެ ޓީމަށް ރަނގަޅު ކުޅުމެއް ނުދެއްކޭތީ ސޯލްޝެއާ އަށް ޔުނައިޓެޑްގެ ކޯޗުގެ މަގާމުގައި މި ސީޒަން ނިމެންދެން ދެމިހުރެވިދާނެތޯ މީޑިއާތަކުން އަންނަނީ ސުވާލު އުފައްދަމުންނެވެެ. ސޯލްޝެއާ ބުނީ މުސްތަގުބަލުގެ ވާހަކަ ދައްކަން ބޭނުންނުވާ ކަމަށާއި ދާދި ފަހުން ޔުނައިޓެޑާ އެކު އާ ކޮންޓްރެކްޓެއް ހެދީ ޕްލޭނެއް އޮވެގެން ކަމަށެވެ.
