ލަންޑަން (ސެޕްޓެމްބަރު 24) - އަންނަ އަހަރު ގަތަރުގައި ބާއްވާ ފީފާ ވޯލްޑް ކަޕަށް އިނގިރޭސި ޕްރިމިއާ ލީގުން ނަގާނީ ހަ ހަފްތާގެ ބްރޭކެއް ކަމަށް ކަނޑައަޅައިފި އެވެ.
ފީފާ އިން އަންނަ އަހަރު ގަތަރުގައި ވޯލްޑް ކަޕް ބާއްވަނީ އާންމުކޮށް އެ މުބާރާތް ބާއްވާ މުއްދަތުގައެއް ނޫނެވެ. ގަތަރު ވޯލްޑް ކަޕް ޝެޑިއުލް ކޮށްފައިވަނީ ނޮބެމްބަރާއި ޑިސެމްބަރަށެވެ. ސަބަބަކީ ގަތަރުގެ ހޫނުމިން ގަދަވުމުން އާންމު ގޮތެއްގައި ވޯލްޑް ކަޕް ބާއްވާ ޖޫން/ޖުލައި މަހު ނުކުޅެވޭނެތީ އެވެ. އެއީ އެ މުއްދަތުގައި ގަތަރުގެ ފިނިހޫނުމިން އުޅޭނީ އެވްރެޖްކޮށް 32 ޑިގްރީ ސެލްސިއަސް އަށް ވުރެ މަތީގައި ކަމަށްވާތީ އެވެ.
ފީފާ އިން ނޮވެމްބަރާއި ޑިސެމްބަރު ވޯލްޑް ކަޕް ކުޅެން ނިންމީ ނޮވެމްބަރާއި ޑިސެމްބަރުގައި ގަތަރުގެ ފިނިހޫނުމިން އުޅޭނީ 15-25 ޑިގްރީ ސެލްސިއަސްގައި އުޅޭތީ އެއީ މެޗުތައް ކުޅެން ބަލާއިރު ރަނގަޅުވާނެ ދުވަސްވަރެއް ކަމަށް ފެންނާތީ އެވެ.
ޔޫރަޕްގެ ފުޓްބޯޅަ ސީޒަނުގެ މެދުތެރެއިން ވޯލްޑް ކަޕް ބޭއްވުމަކީ ބޮޑު ގޮންޖެހުމެއް ކުރިމަތިވާނެ ކަމެއްގެ ގޮތުގައި ޔޫރަޕްގެ ވަރުގަދަ ލީގުތަކުގެ ބޯޑުން ވަނީ ބުނެފަ އެވެ. ނަމަވެސް މިހާރު ވޯލްޑް ކަޕްގެ ޝެޑިއުލަށް ފައްތައިގެން ލީގު ކުރިއަށް ގެންދަން ގިނަ ގައުމުތަކުން އަންނަނީ ކަލަންޑަރެއް އެކުލަވާލަމުންނެވެ.
އިނގިރޭސި ޕްރިމިއާ ލީގުން ނިންމާފައިވަނީ ނޮވެމްބަރު 13 އިން ފެށިގެން ހަ ހަފްތާ އަށް ލީގު މެދުކަނޑާލުމަށެވެ. މާނަ އަކީ ނޮވެމްބަރު 21 ވަނަ ދުވަހު ގަތަރު ވޯލްޑް ކަޕް ފަށާއިރު، ޕްރިމިއާ ލީގުގެ ކުޅުންތެރިންނަށް ލިބޭނީ ގައުމީ ޓީމާ އެކު ނުވަ ވަރަކަށް ދުވަހުގެ މުއްދަތެކެވެ.
އަނެއްކޮޅުން ވޯލްޑް ކަޕް ފައިނަލް މެޗު ޑިސެމްބަރު 18 ވަނަ ދުވަހު ކުޅޭއިރު، ޕްރިމިއާ ލީގު އަލުން ފަށާނީ 26 ޑިސެމްބަރުގަ އެވެ. އެއީ ވޯލްޑް ކަޕް ފައިނަލް ކުޅޭތާ އަށް ދުވަސް ފަހުންނެވެ.
މި ގޮތަށް ނިންމީ ޕްރިމިއާ ލީގުގައި މިހާރު އޮތް 20 ކްލަބްގެ އޮފިޝަލުން ދާދި ފަހުން ބޭއްވި ބައްދަލުވުމުގަ އެވެ. އެ ބައްދަލުވުމުގައި ދެން ނިންމާފައިވަނީ އަންނަ ސީޒަން އަންނަ އަހަރުގެ އޮގަސްޓް ހަ ވަނަ ދުވަހު ފެށުމަށެވެ. އެއީ އާންމުކޮށް ޕްރިމިއާ ލީގު ފަށާ ތާރީހަށް ބަލާއިރު، އެއް ހަފްތާ ކުރިންނެވެ.
ސީޒަން ދިގުލައިދިއުމުގެ ބިރު އޮތް ކަމަށް ގިނަ ކްލަބްތަކުން އެއްބަސްވި ނަމަވެސް ޕްރިމިއާ ލީގުން ނިންމާފައިވަނީ މެއި މަހުގެ ނިޔަލަށް ލަސްވެގެން ޕްރިމިއާ ލީގު ސީޒަން ނިންމާލުމަށެވެ. ދެން ފެންނާނެ ބަދަލަކީ އެފްއޭ ކަޕް ފައިނަލް މެއި މަހުގެ ފަހުކޮޅުގެ ބަދަލުގައި ޖޫން މަހު ކުޅޭ ގޮތަށް ހެދުމަށެވެ.
