އެމެރިކާގެ ޖަސްޓިސް ޑިޕާޓްމަންޓުން ރާއްޖެއަށް ކަނޑައަޅާފައި ހުންނަ ކައުންޓާ ޓެރަރިޒަމް ލީގަލް އެޑްވައިޒަރު ޖޯޖް ޕެންސާ ދިވެހިރާއްޖޭގެ ބަންޑާރަ ނައިބު އިބްރާހިމް ރިއްފަތު މިއަދު ބައްދަލު ކުރައްވައިފި އެވެ.
ބަންޑާރަ ނައިބުގެ އޮފީހުގައި މިއަދު ބޭއްވި އެ ބައްދަލުވުމުގައި ޖޯޖް ޕެންސްގެ އިތުރުން ޖަސްޓިސް ޑިޕާޓްމަންޓުގެ ރެސިޑެންޓް ލީގަލް އެޑްވައިޒަރު ޔޭ-ޓިންގް ވޫ ވެސް ބައިވެރިވެވަޑައިގެންނެވި އެވެ.
މިއަދުގެ އެ ބައްދަލުވުމުގައި ދިވެހިރާއްޖެއިން ކުރަމުން އަންނަ ކައުންޓާ ޓެރަރިޒަމްގެ މަސައްކަތާ ގުޅޭ ގޮތުން މަޝްވަރާ ކުރި ކަމަށް ބަންޑާރަ ނައިބުގެ އޮފީހުން ބުންޏެވެ. އަދި ޓެރަރިޒަމްގެ އަމަލުތައް ކުރިއާލާ ހުއްޓުވޭނެ ގޮތްތަކާ ގުޅޭ ގޮތުން ވެސް މަޝްވަރާ ކުރި ކަމަށް އެ އޮފީހުން ބުނެފައިވެ އެވެ.
ކައުންޓާ ޓެރަރިޒަމް އެޑްވައިޒަރު ޖޯޖް ޕެންސް އާއި ޔޭ-ޓިންގް ވޫ ވަނީ ބަންޑާރަ ނައިބުގެ އޮފީހުގެ އިތުރުން އިސްލާމިކް ޔުނިވާސިޓީ އޮފް މޯލްޑިވްސް އަދި ދިވެހިރާއްޖޭގެ ބާ ކައުންސިލާ ބައްދަލު ކުރައްވައިފަ އެވެ.
ޖޯޖް ޕެންސް ރާއްޖޭގައި ބައްދަލުވުންތަކެއް ކުރިއަށްގެންދާ މި ދަނޑިވަޅުގައި ރާއްޖޭގެ އެންމެ ބޮޑު ޓެރަރިސްޓު ކަމަށް ތުހުމަތު ކުރެވޭ މުހައްމަދު އަމީން ވަނީ މިދިޔަ ބުރާސްފަތި ދުވަހު ޖަލުން މިނިވަންވެފަ އެވެ.
މުސްލިމުންނާ ދެކޮޅަށް ވަރަށް އަނިޔާވެރި ހަމަލާތަކެއް ދީފައިވާ އައިސިސްގެ ލީޑަރު ގޮތުގައި ރާއްޖޭގައި ހަރަކާތްތެރިވި ކަމަށް ތުހުމަތު ކުރެވޭ އަމީން ޖަލުން މިނިވަންވީ އޭނާގެ މައްޗަށް އުފުލި ޓެރަރިޒަމްގެ ދެ ދައުވާ އުފުލާފައި ވަނީ ޖިނާއީ އިޖުރާއަތުގެ ގަވާއިދާ ހިލާފަށް ކަމަށް ހައި ކޯޓުން ކަނޑައެޅުމުންނެވެ.
ވެރިކަން ހިންގާ މާލޭ ބަންދަށް އަމީން ދޫކޮށްލުމަށްފަހު، އޭނާގެ ހަރަކާތްތައް މޮނީޓާކޮށް ކޮންޓްރޯލް ކުރުމަށް ހައި ކޯޓުން އޮތީ މޮނިކޮން އަމުރެއް ނެރެފަ އެވެ. އެ އަމުރުގެ ދަށުން އަމީންގެ ފޯނުތައް އަޑުއެހުމުގެ އިތުރުން ގެއަށް ވެސް ފާރަލެވޭނެ ކަމަށް ފުލުހުން ބުނެ އެވެ.
