އިމާރާތްކޮށް ނިމި، އެކަމަކު ނުހުޅުވާ ހުރި ކިންގް ސަލްމާން މިސްކިތް ހުޅުވައިދެއްވާނީ ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން ރާއްޖެއަށް ކުރައްވާ ޒިޔާރަތެއްގައިކަމަށް ރާއްޖޭން ސައުދީއަށް ކަނޑައަޅުއްވާފައި ހުންނަވާ ސަފީރު މުހައްމަދު ޚަލީލް ވިދާޅުވެއްޖެ އެވެ.
ރާއްޖެ އާއި ސައުދީ އަރަބިއްޔާއާ ދެމެދުގައި އޮންނަ ގުޅުމާއި، ސައުދީގެ އެހީގައި ރާއްޖޭގައި ހިންގާ އެކި އެކި މަޝްރޫތަކާ ގުޅޭ ގޮތުން ސައުދީގެ އަރަބް ނިއުސް ނޫހަށް ދެއްވި އިންޓަވިއުއެއްގައި ޚަލީލް ވިދާޅުވީ ސަލްމާން މިސްކިތަކީ ދެ ގައުމުގެ ދެމެދުގައި އޮންނަ އަހުވަންތަކަމުގެ ގުޅުން ރަމްޒުކޮށްދޭނެ މިސްކިތެއް ކަމަށެވެ.
"އަދި އަޅުގަނޑުމެން މިތިބީ މިސްކިތް ނިމި، ކްރައުން ޕްރިންސް މުހައްމަދު ބިން ސަލްމާންގެ ޒިޔާރަތެއްގައި އެ މިސްކިތް ރަސްމީކޮށް ހުޅުއްވައިދެއްވާނެ ދުވަހެއްގެ އުންމީދުގައި،" ޚަލީލް ވިދާޅުވި އެވެ.
ސަރުކާރުން ބުނީ ރަސްމީކޮށް ހުޅުވުމުން ރާއްޖޭގައި ހުރި އެންމެ ބޮޑު މިސްކިތުގެ ޝަރަފް ލިބޭ އެ މިސްކިތް އަންނަ ރޯދައިގެ ކުރިން ހުޅުވާނެ ކަމަށެވެ. އެކަމަކު ވަލީ އަހުދު ވަޑައިގަންނަވާނެކަމުގެ އެއްވެސް މައުލޫމާތެއް ދިވެހި ސަރުކާރުން ރަސްމީކޮށް ނުބުނެ އެވެ. އެކަމުގެ މައުލޫމާތު ހޯދަން ކުރި މަސައްކަތް މިއަދު ކާމިޔާބެއް ނުވި އެވެ.
ސަރުކާރުން ކުރިން ބުނެފައި އޮތީ "އެ މިސްކިތް ހުޅުވާނީ ސައުދީ އަރަބިއްޔާގެ ވަފްދެއް ރާއްޖެއަށް ކުރައްވާ ދަތުރުފުޅެއްގައި" ކަމަށެވެ.
އެ މިސްކިތް ހުޅުވުމުގެ މަޝްވަރާއަށް މިދިޔަ މަހު ސައުދީގެ ވަފްދެއް ރާއްޖެ އަ އެވެ. އޭގެ ކުރިން އެ މިސްކިތް މި އަހަރުގެ ރޯދަ މަހަށް ހުޅުވަން ވެސް ސަރުކާރުން ވަނީ މަސައްކަތްކޮށްފަ އެވެ.
ރައީސް ޔާމީންގެ ދައުރުގައި 2018 ވަނަ އަހަރު އަޅަން ފެށި ކިންގް ސަލްމާން މިސްކިތަކީ 25 މިލިއަން ޑޮލަރުގެ މަޝްރޫއެކެވެ. އޭގެ ތެރެއިން 14 މިލިއަން ޑޮލަރަކީ ސައުދީގެ ހިލޭ އެހީ އެވެ. ބާކީ ހަރަދުކުރީ ދިވެހި ސަރުކާރުންނެވެ.
ޖުމްލަ ހަ ފަންގިފިލާގެ އެ މިސްކިތުގެ ފުރަތަމަ ދެ ފަންގިފިލާ ހާއްސަކޮށްފައިވަނީ ނަމާދުކުރުމަށެވެ. ޖާގައަކީ 4000 އެވެ. ތިން ވަަނަ ފަންގިފިލާގައި ހަތަރު ކްލާސްރޫމާއި ފަސް ސެމިނާ ރޫމް ހުންނާނެ އެވެ. ހަތަރުވަނަ ފަންގިފިލާގައި ލައިބްރަރީއެއް އަދި 350 މީހުންގެ ޖާގައިގެ އޮޑިޓޯރިއަމްއެއް ހުންނައިރު ފަސްވަނަ ފަންގިފިލާ ހާއްސަކޮށްފައިވަނީ 300 މީހުންގެ ޖާގައިގެ މަލްޓި ޕާޕަސް ހޯލަކަށެވެ.
