ޕެރިސް (23 ސެޕްޓެމްބަރު) – މެޗުގެ އިތުރު ވަގުތު ތެރޭގައި އަޝްރަފް ހަކީމީ ޖެހި ލަނޑާއެކު، ފްރާންސް ލީގުގައި ރޭ މެޓްޒް އަތުން 2-1 އިން ޕީއެސްޖީ މޮޅުވެއްޖެ އެވެ.
މެޓްޒްގެ ދަނޑުގައި ކުޅުނު މެޗުގެ ފަސް ވަނަ މިނިޓުގައި ޕީއެސްޖީގެ ފުރަތަމަ ލަނޑުވެސް ޖެހީ ހަކީމީ އެވެ. އެކަމަކު މެޗުގެ 39 ވަނަ މިނިޓުގައި މެޓްޒްގެ ޑިފެންޑަރު ބޫބަކަރް ކުޔާޓޭ ވަނީ ލަނޑު ޖަަހައި މެޗުގެ ނަތީޖާ އެއްވަރުކޮށްފަ އެވެ.
މެޗުގެ އިތުރު ވަގުތުގައި މެޓްޒްގެ ކެޕްޓަން ޑިލަން ބްރޯން އަށް ރަތްކާޑު ދެއްކުމުން އެ ޓީމު ދިހަ މީހުންނަށް މަދުވެފައިވަނިކޮށް، ޕީއެސްޖީން މެޗުގެ ނަތީޖާ އަނބުރާލީ އިތުރު ވަގުތުގައި ހަކީމީ ޖެހި ލަނޑުންނެވެ.
މި ސީޒަންގެ ފްރާންސް ލީގުގައި މިހާތަނަށް ކުޅުނު ހަތް މެޗުން ވެސް މޮޅުވެ، ޕީއެސްޖީ ތާވަލްގެ އެއްވަނައިގައި އޮތީ 21 ޕޮއިންޓާއެކު އެވެ.
ލީގުގައި މިދިޔަ އާދިއްތަ ދުވަހުގެ ރޭ ކުޅުނު މެޗުގައި ކަކުލަށް ލިބުނު އަނިޔާއަކާ ގުޅިގެން އާޖެންޓީނާ ފޯވަޑް ލިއޮނެލް މެސީ ރޭގެ މެޗުގައި ނުކުޅެ އެވެ. އަދި ލީގުގައި ހޮނިހިރު ދުވަހު މޮންޕެލިއޭއާ ދެކޮޅަށް ކުޅޭ މެޗާއި، އަންނަ ހަފުތާގައި ޗެމްޕިއަންސް ލީގުގައި މެންޗެސްޓާ ސިޓީއާ ދެކޮޅަށް ޕީއެސްޖީ ކުޅޭ މެޗަށް އޭނާ ފިޓުވާނެކަމުގެ ޔަގީންކަމެއް ނެތެވެ. – ބީބީސީ
