ލަންޑަން (ސެޕްޓެމްބަރު 22) - އިނގިރޭސި ލީގު ކަޕްގައި މިރޭ ކުޅުނު މެޗުތަކުން މޮޅުވެ އާސެނަލާއި ޗެލްސީ އަނެއް ބުރުން ފުރުސަތު ހޯދިއިރު، މެންޗެސްޓާ ޔުނައިޓެޑް މުބާރާތުން ކަޓައިފި އެވެ.
އާސެނަލުން 3-0 އިން ވިމްބަލްޑަން ބަލިކުރިއިރު، ޗެލްސީން ވަނީ 1-1 އިން އެއްވަރުވެ، ޕެނަލްޓީ ޖަހައިގެން 4-3 އިން އެސްޓަން ވިލާ ބަލިކޮށްފަ އެވެ. މެންޗެސްޓާ ޔުނައިޓެޑް އަމިއްލަ ދަނޑުގައި ކުޅުނު މެޗުން ވެސްޓް ހޭމް ޔުނައިޓެޑް އަތުން 1-0 އިން ބަލިވެ ވަނީ މުބާރާތުން ކަޓައިފަ އެވެ.
މިދިޔަ އާދިއްތަ ދުވަހު ޔުނައިޓެޑުން ވަނީ އިނގިރޭސި ޕްރިމިއާ ލީގުގައި ވެސްޓް ހޭމް ދަނޑުގައި މޮޅުވެފަ އެވެ. ދެ ޓީމުން ވެސް މިރޭގެ މެޗަށް ނުކުތީ އެ މެޗުގައި ބޭނުންކުރި ޓީމަށް ގިނަ ބަދަލުތަކެއް ގެނެސްގެންނެވެ. މެޗުގައި ފެނިގެން ދިޔަ ހަމައެކަނި ގޯލު ވެސްޓް ހޭމަށް ނުވަ ވަނަ މިނިޓްގައި އޭރިއާތެރެއިން ކާމިޔާބުކުރީ އާޖެންޓީނާގެ މިޑްފީލްޑަރު މެނުއަލް ލަންޒީނީ އެވެ.
ޔުނައިޓެޑުން ނަތީޖާ ހަމަހަމަކުރަން ދެ ވަނަ ހާފްގައި ބްރޫނޯ ފެނާންޑޭސް އާއި މޭސަން ގްރީންވުޑް ކުޅެން އެރުވި ނަމަވެސް ވެސްޓް ހޭމްގެ ގޯލުގައި ހުރި އަލްފަންސޯ އަރެއޯލާ ކައިރިން ގޯލެއް ޖެހޭގޮތެއް ނުވި އެވެ. ވެސްޓް ހޭމަށް ދެ ވަނަ ގޯލެއް ޖަހައިދޭން މާކް ނޯބަލް އާއި އެންޑީ ޔާމޮލެންކޯ އަށް ހުސް ފުރުސަތުތަކެއް ލިބުނުއިރު، ބޭނުމެއް ނުކުރެވުނެވެ.
އަމިއްލަ ދަނޑުގައި ކުޅުނު ޗެލްސީން ޓިމޯ ވާނާގެ ގޯލުން ލީޑުނަގާފައިވަނިކޮށް އެސްޓަން ވިލާ އަށް އެއްވަރުކޮށްދިނީ ޒުވާން ފޯވާޑް ކެމަރަން އާޗާ އެވެ. މެޗު 1-1 އިން ނިމުމުން ނަތީޖާ ނެރެން ޖެހުނީ ޕެނަލްޓީ ޖަހާށެެވެ.
ޗެލްސީން ފޮނުވާލި ފަސް ޕެނަލްޓީގެ ތެރެއިން ނާކާމިޔާބުވީ ބެން ޗިލްވެލްގެ ޕެނަލްޓީ އެވެ. ޗެލްސީގެ ރޮމެލޫ ލުކާކޫ، މޭސަން މައުޓް އަދި ރޮސް ބާކްލޭ ވަނީ ޕެނަލްޓީ ކާމިޔާބު ކޮށްފަ އެވެ. އެސްޓަން ވިިލާއިން ޕެނަލްޓީ ކާމިޔާބުކުރީ އަންވަރު އެލްގާޒީ، އެޒްރީ ކޮންސާ އަދި އެމީ ބުއެންޑީއާ އެވެ. އެ ޓީމުގެ އެޝްލީ ޔަންގާއި ނަކަމްބާ ޖެހި ޕެނަލްޓީ ކާމިޔާބެއް ނުވި އެވެ.
ވިމްބަލްޑަން ކޮޅަށް އާސެނަލްގެ ގޯލުތައް ޖެހީ އަލެކްސަންޑަ ލަކަޒޭޓް، އެމީލް ސްމިތު ރޯވް އަދި އެޑީ އެންކެޓިއޭ އެވެ. ލެސްޓާ އިން ވަނީ އަޑެމޯލާ ލުކްމަން އާއި ކެލެޗީ އިހެނާޗޯގެ ގޯލުތަކުން 2-0 އިން މިލްވޯލް ބަލިކޮށްފަ އެވެ.
ފޯރިގަދަ ކުޅުމަކަށް ފަހު ޕެނަލްޓީ ޖަހައިގެން ވުލްވްސް ބަލިކޮށް ޓޮޓެންހަމް ވެސް ވަނީ އަނެއް ބުރުން ފުރުސަތު ހޯދައިފަ އެވެ.
ޓަންގީ އެންޑޮމްބެލޭ އާއި ހެރީ ކޭންގެ ގޯލުތަކުން ޓޮޓެންހަމް ދެ ގޯލުގެ ލީޑެއް ނަގާފައިވަނިކޮށް ވުލްވްސް އެއްވަރުކުރީ ލެއަންޑޯ ޑެންޑޮންކާ އާއި ޑެނިއަލް ޕޮޑެންސް ޖެހި ގޯލުތަކުންނެވެ. މެޗުގެ ފުރިހަމަ ވަގުތު 2-2 އިން އެއްވަރުވިއިރު، ޕެނަލްޓީގައި ޓޮޓެންހަމް މޮޅުވީ 3-2 އިންނެވެ.
ލީގު ކަޕްގެ ހަތަރު ވަނަ ބުރުގެ މެޗުތައް:
ޗެލްސީ - ސައުތެމްޓަން
އާސެނަލް - ލީޑްސް
ސްޓޯކް - ބްރެންޓްފޯޑް
ވެސްޓް ހޭމް - މެންޗެސްޓާ ސިޓީ
ލެސްޓާ - ބްރައިޓަން
ބާންލީ - ޓޮޓެންހަމް
ކިއުޕީއާރް - ސަންޑަލެންޑް
ޕްރެސްޓަން - ލިވަޕޫލް
