އެއް އަހަރު ދުވަސްވީ މައްސަލައެއް ސެކްޝަނުގައި ނުބޭއްވުމުގައި މަގުސަދުގައި އެ މައްސަލައިގެ ދައުވާ ފޯމް ބާތިލުކުރިކަން ސިވިލް ކޯޓުގެ ގާޒީ އަލީ ނަސީރަށް ސާބިތުވުމުން ސުލޫކީ ފިޔަވަޅެއްގެ ގޮތުގައި މެޖިސްޓްރޭޓްގެ މަގާމަށް ދަށްކުރަން ޖުޑިޝަލް ސާވިސް ކޮމިޝަނު (ޖޭއެސްސީ) އިން ނިންމައިފި އެވެ.
ޖޭއެސްސީން މިރޭ ނެރުނު ބަޔާނުގައި ބުނީ ސިވިލް ކޯޓުގައި އޮތް ގިނަ ދުވަސްވެފައިވާ މައްސަލައެއް ގާޒީ ނަސީރުގެ ސެކްޝަނުގައި ނުބޭއްވުމުގައި މަގުސަދުގައި ދައުވާ ފޯމު ބާތިލުކޮށްފައިވާކަން ތަހުގީގަށް ސާބިތުވެފައިވާ ކަމަށެވެ.
ބަޔާނުގައި ބުނީ އެ މައްސަލައިގައި ހިމެނޭ ފަރާތްތައް މައްސަލަ އެއްކޮށް ނިންމައިދޭން އެދިފައިވަނިކޮށް، އެ މައްސަލަ އިތުރަށް ކުރިޔަށް ގެންދިޔުމުގެ މަސްލަހަތެއް ނެތް ކަމަށް ގާޒީ ނަސީރު ނިންމާފައިވާ ކަމަށެވެ.
އަދި ގާޒީ ނަސީރު އެ މައްސަލައިގެ ދައުވާ ފޯމު ބާތިލްކޮށް ހުކުމްކޮށްފައި ވަނީ އެ މައްސަލައިގެ މައުޟޫއަށް ހުކުމްކުރުމުގެ ބަދަލުގައި، އަހަރު ދުވަސްވެފައިވާ މައްސަލައެއް ގާޒީ ނަސީރުގެ ސެކްޝަނުގައި ނުބޭއްވުމުގެ ނިޔަތުގައިކަން ތަހުގީގަށް ސާބިތުވެފައިވާ ކަމަށް ޖޭއެސްސީން ބުނެ އެވެ.
ޖޭއެސްސީން ބުނި ގޮތުގައި ކޯޓަށް ހުށަހެޅިފައިވާ މައްސަލައެއްގައި ގިނަ ދުވަސްވަންދެން މައްސަލައެއް ސެކްޝަނުގައި ނުބޭއްވުމުގެ މަގުސަދުގައި، މައްސަލައިގެ ހިމެނޭ ފަރާތްތަކުގެ އެދުމާއި އިދިކޮޅަށް މައްސަލައިގައި ހުކުމްކުރުމަކީ އަދުލު އިންސާފު ގާއިމުކުުރުމުގެ އުސޫލުތަކާއި ހިލާފް ކަމެކެވެ.
އަދި ގާޒީ ނަސީރުގެ އެ އަމަލަކީ ފަނޑިޔާރުގޭގެ މުގައްދަސްކަމާއި އިތުބާރަށް އެކަމުގެ ސަބަބުން އަސަރުކުރާނޭ ކަމެއް ކަމަށާއި އެކަމުގެ ސަބަބުން ނާޖާއިޒު ގޮތުގައި ކޯޓުގެ ނިންމުންތަކުގެ ބޭނުން ހިފުމުގެ ފުރުސަތު މައްސަލައިގައި ހިމެނޭ ފަރާތްތަކަށް ހުޅުވިގެންދާފަދަ ކަމެއްކަމުގައި ޖޭއެސްސީން ފާހަގަކުރި އެވެ.
އަދި ގާޒީ ނަސީރު އެގޮތަށް އަމަލުކުރެއްވުމުން ފަނޑިޔާރުންގެ ގާނޫނުގެ 32 ވަނަ މާއްދާގެ (ހ) ގެ 5 ވަނަ ނަންބަރާއި، ފަނޑިޔާރުންގެ ސުލޫކީ މިންގަނޑުގެ 3.1 ވަނަ ނަމްބަރާއި ހިލާފުވެފައިވާ ކަމަށް ޖޭއެސްސީއިން ވަނީ ނިންމާފަ އެވެ.
ޖޭއެސްސީން ބުނި ގޮތުގައި އެ މައްސަލައިގައި ތަހުގީގުގެ ހޯދުންތަކަށް ރިއާޔަތްކޮށް އަޅަން ނިންމި ސުލޫކީ ފިޔަވަޅުގެ ގޮތުން ގާޒީ ނަސީރު މިހާރު ހުރި މަގާމަށްވުރެ ދަށު ދަރަޖައިގެ މަގާމަކަށް ބަދަލުކުރަން ވަނީ ނިންމައިފަ އެވެ. އެގޮތުން ގާޒީ ނަސީރު ބަދަލުކުރާނީ މެޖިސްޓްރޭޓެއްގެ މަގާމަށެވެ.
ގާޒީ އަލީ ނަސީރުގެ އިތުރު މައްސަލައެއްވެސް ޖޭއެސްސީން ދަނީ ބަލަމުންނެވެ. އެގޮތުން ރިހިވެލި ބީޗް ރިސޯޓްގެ ސްބްލީސް އެއްބަސްވުމާ ގުޅޭ ގޮތުން ގާޒީ އަލީ ނަސީރު އިއްވި ހުކުމެއްގެ މައްސަލަ ވެސް ޖޭއެސްސީން ދަނީ ބަލަމުންނެވެ. އެއީ އެ މައްސަލައިގައި އިއްވި ހުކުމް ކުރިއާލާ އެ މައްސަލައިގަ ހިމެނޭ ފަރާތަކަށް އެނގިފައިވާ ކަމަށް ބުނެ ކުރެވޭ ތުހުމަތަކާ ގުޅިގެންނެވެ.
