ފްލޮރެންސް (ސެޕްޓެމްބަރު 22) - އިޓާލިއަން ލީގުގެ އެންމެ ފަހުގެ ޗެމްޕިއަން އިންޓަ މިލާނުން ރޭ ފަހަތުން އަރައި 3-1 އިން ފިއޮރެންޓީނާ ބަލިކޮށް ލީގުގެ އެއް ވަނަ އަށް ޖެހިލައިފި އެވެ.
އިންޓަ އެއް ވަނަ އަށް އެރީ ފަސް މެޗުން 13 ޕޮއިންޓް ހޯދައިގެންނެވެ. ދެ ވަނައިގައި އޮތް ނަޕޯލީ އަށް ހަތަރު މެޗުން ވަނީ 12 ޕޮއިންޓް ލިބިފަ އެވެ. މާދަމާރޭ ސަމްޑޯރިއާ އަތުން މޮޅުވެގެން އަލުން ނަޕޯލީ އަށް އެއް ވަނަ އަށް އެރޭނެ އެވެ.
މެޗު ފަށައިގެން ފިއޮރެންޓީނާ އިން ފޮނުވާލި ފުރަތަމަ ދެ ހަމަލާ އިންޓަގެ ގޯލްކީޕަރު ސާމިރް ހަންޑަނޯވިޗް މަތަކުރި ނަމަވެސް މެޗުގެ 23 ވަނަ މިނިޓްގައި ފިއޮރެންޓީނާގެ ނިކޯ ގޮންޒާލޭޒް ހުސްކޮށްލާފައި ދިން ބޯޅަ ރިކާޑޯ ސޮޓީލް ވަނީ ގޯލުގެ ތެރެއަށް ފޮނުވާލައިފަ އެވެ.
އިންޓަ އިން އެއްވަރުކުރީ ދެ ވަނަ ހާފްގެ ކުޅުން ފަށައިގެން ހަތް ވަނަ މިނިޓްގަ އެވެ. މެޗުގެ 52 ވަަނަ މިނިޓްގައި އޭރިއާތެރެއިން އިންޓަގެ ނިކޯލޯ ބަރޭލާ ދިން ބޯޅަ މަޓެއޯ ޑާމިއާން ވަނީ ގޯލުގެ ދުރު ކަނަށް އަމާޒުކޮށްލައިފަ އެވެ. އޭގެ ތިން މިނިޓް ފަހުން ހަކަން ޗަނޮނޮގްލޫ ނެގި ކޯނަރަކުން އެޑިން ޒެކޯ ބޮލުން ގޯލެއް ޖަހައި އިންޓަ އަށް ލީޑުނަގައިދިނެވެ.
ފިއޮރެންޓީނާ އަށް މައްސަލަ ދިމާވީ މެޗުގެ 78 ވަނަ މިނިޓްގައި ގޮންޒާލޭޒަށް ރަތް ކާޑެއް ދެއްކުމުންނެވެ. ގޮންޒާލޭޒަށް ދެ ރީނދޫ ކާޑު ވެސް ދެއްކީ ރެފްރީގެ ނިންމުންތަކާ ތަކުރާރުކޮށް ދެކޮޅު ހަދާ ވާހަކަ ދެއްކުމުންނެވެ. ފިއޮރެންޓީނާގެ ކުޅުންތެރިއަކު މަދުވި ފަހުން މެޗުގެ 87 ވަނަ މިނިޓްގައި އިންޓަގެ ފަހު ގޯލު ޖެހީ އިވާން ޕެރިސިޗް އެވެ. މިއީ ރޮބާޓޯ ގަލިއަޑީނީ ހުސްކޮށްލާފައި ދިން ބޯޅަ އަކުން ޕެރިސިޗް ޖެހި ގޯލެކެވެ.
މިއީ އިންޓަ އިން އިޓާލިއަން ލީގުގައި ކުޅުނު 1500 ވަނަ މެޗެވެ. މި މެޗުން މޮޅުވުމުން އިންޓަގެ ކޯޗު ސިމޯން އިންޒާގީ ހުރީ ވަރަށް ހިތްހަމަ ޖެހިފަ އެވެ. އިންޒާގީ ބުނީ މެޗު ފަށައިގެން އޭނާގެ ޓީމަށް އުނދަގޫތަކެއް ކުރިމަތިވި ނަމަވެސް ހެދުނު ގޯސްތައް ރަނގަޅުކޮށް ދެ ވަނަ ހާފްގައި ދެއްކުނު ކުޅުމާ މެދު ވަރަށް ބޮޑަށް ހިތްހަަމަ ޖެހޭ ކަމަށެވެ.
