ދިވެއްސަކު އެންމެ ފުރަތަމަ ފަހަރަށް އދ. ގެ އާއްމު މަޖިލީހުގެ ރިއާސަތާއި ހަވާލުވެ، އެ މަޖިލީހުގެ އާއްމު ބަހުސް ހުޅުއްވައިދެއްވުމަށް ދެއްވި ހިތާބުގައި މިއަދު އދ. ގެ އާއްމު މަޖިލީހުގެ ރައީސް އަބްދުﷲ ޝާހިދު ދުނިޔެއަށް ދެއްވީ އުއްމީދުގެ ފަސް ދޯދިއެއްގެ މެސެޖެކެވެ.
"މާދަމާއަށް އުންމީދީ ތަސައްވުރަކާއެކު، އަޅުގަނޑު މި އަމާޒުކުރަނީ އުންމީދުގެ ފަސް ދޯދިއަކަށް،" ޝާހިދު ވިދާޅުވި އެވެ.
ދުނިޔެއަށް ކުރިމަތިވެފައިވާ އެންމެ ބޮޑެތި މައްސަލަތަކަށް ސީދާ އަމާޒުކޮށް، ޝާހިދު ރިއާސަތުވައި އިންނަވައިގެން ދެއްވި ފުރަަތަމަ ހިތާބުގައި ދުނިޔޭގެ ލީޑަރުންނަށް ގޮވާލެއްވީ އެބޭފުޅުން ތަމްސީލުކުރައްވާ ހަތް ބިލިއަނަށް ވުރެ ގިނަ މީހުންގެ އުއްމީދުތަކާއިގެން ކުރިޔަށް ގޮސް، ތަފާތެއް ދައްކުވައި ދިނުމަށެވެ.
"މައްސަލަތައް މަދެއް ނޫން، ނާޒުކުކަން، ހަމަނުޖެހުން، ކޮވިޑް-19 އާއި މޫސުމަށް އަންނަ ބަދަލުތައް. މިއީ ހުސް ވެސް އަޅުގަނޑުމެންގެ ރައްޔިތުން ރޭގަނޑު ހޭލާ ބައިތިއްބާ މައްސަލަތައް. މިކަންކަމަށް އެ ރައްޔިތުން ކަންބޮޑުވޭ، އަދި ކަންކަން އިތުރަށް ގޯސްވަމުންދާތީ ހާސްވޭ. އެ ރައްޔިތުން ކަންބޮޑުވޭ، އަޅުގަނޑުމެން އެކަށީގެންވާ މަސައްކަތްތަކެއް މިކަންކަން ހައްލުކުރަން ނުކުރާތީ،" ޝާހިދު ވިދާޅުވި އެވެ.
އެ ކަންބޮޑުވުންތަކުގައި ކޮންމެވެސް ވަރެއްގެ ހަގީގަތެއް ވާ ކަމަށް ވިދާޅުވަމުން ޝާހިދު ވަނީ އެކަންކަން ހައްލުކުރަން އިތުރަށް އެތައް އެތައް ކަމެއް ކުރެވެން އެބަ ހުރިކަން އެންމެން ވެސް ގަބޫލުކުރާނޭކަން ވިދާޅުވެފަ އެވެ.
"ކޮވިޑް-19 އަށް ބަލާއިރު، ވެކްސިން އެބަ ހުރި، ހަދަންވީ ގޮތް ވެސް އެނގޭ، ވެކްސިން ފޯރުކޮށްދޭނެ ގާބިލުކަން ވެސް އެބަ ހުރި، މަދު ވަނީ ހަމައެކަނި ސިޔާސީ މަދަދު،" ޝާހިދު ވިދާޅުވި އެވެ.
ކޮވިޑުގެ އިތުރުން، މޫސުމަށް އަންނަ ބަދަލުގެ ކަންބޮޑުވުންތަކުގައިވެސް، އިންސާނީ އަސާސީ ބޭނުންތަކުގެ މައްސަލައިގަ ވެސް ކަން ކަން ހުރީ މިހެންކަމަށް ޝާހިދު ފާހަގަކުރެއްވި އެވެ.
އެފަދަ މައްސަލަތައް ހައްލުކޮށް، އަދަށްވުރެ ބާއްޖަވެރި މާދަމާއަކަށްޓަކައި އުންމީދުގެ ފަސް ދޯދިއެއް ހަގީގަތަކަށް ހެދުމަށްޓަކައި، މި އަހަރުގެ އާއްމު މަޖިލީހުގެ އަމާޒު ބެހެއްޓުމަށް ގަސްދުކުރައްވާކަމަށް ޝާހިދު ވިދާޅުވި އެވެ.
"އެންމެ ފުރަތަމަ ކަމަކަށް، އަޅުގަނޑު މިހުރީ ވެކްސިންގެ ހަމަހަމަކަން ޔަގީންކޮށްދިނުމުގެ ފަހަތުގައި ފުރިހަމައަށް. މުޅި ދުނިޔެ ވެކްސިން ޖެހުވުމަށް! އދ. ގެ އާއްމު މަޖިލީހުގެ ރައީސްގެ ހައިސިއްޔަތުން، އަޅުގަނޑު ގަސްދުކުރަން ހަމައެކަނި މި މައްސަލައަށް ހާއްސަކޮށް މަތީ ފަންތީގެ ބައްދަލުވުމެއް ބާއްވައި، ސަޕްލައިއާ ރައްކާކުރުން އަދި ފޯރުކޮށްދިނުމުގައި ހުރި ހުރަސްތައް ހައްލުކުރަން މަސައްކަތްކުރުމަށް،" ޝާހިދު ވިދާޅުވި އެވެ.
ދެވަނަ އަމާޒުގެ ގޮތުގައި ޝާހިދު ވިދާޅުވީ ކޮވިޑުގެ ހާލަތުން ދުނިޔެ އެނބުރި ރުޖޫއަވާއިރު، ކުރިޔަށްވުރެ ވަރުގަދަ، ތިމާވެއްޓާއި ރައްޓެހި ބަދަލެއް ގެނައުމަށް މަސައްކަތް ކުރެއްވުމެވެ. އަދި ތިން ވަނަ އަށް އަމާޒު ހިއްޕަވާނީ ކޮވިޑުގެ ސަބަބުން އިސްކަން ނުދެވިފައި އޮތް މޫސުމަށް އަންނަ ބަދަލުތަކުގެ މައްސަލަ އަނެއްކާ ވެސް އެންމެ އިސްކަމެއް ދީގެން ހައްލުކުރަންކަމަށް ޝާހިދު ވިދާޅުވި އެވެ.
"އަޅުގަނޑުމެން މިހާރު މިތިބީ ފަރުބަދައިގެ ކޮޅުގައި، ގޯސް މަގުގައި ނޫންކަން، އައިޕީސީސީ ރިޕޯޓާއި އެފަދަ އެހެން ރިޕޯޓްތަކުން އެކަން އެބަ ދައްކުވައިދޭ،" ޝާހިދު ވިދާޅުވި އެވެ.
މޫސުމަށް އަންނަ ބަދަލުތަކާއި ދެކޮޅަށް ކުރައްވަން ނިންމަވާފައިވާ މަސައްކަތްތައްވެސް ޝާހިދު ހިއްސާކުރެއްވި އެވެ. އެގޮތުން ކޮޕް-26 އަށް ވާއިރަށް މޫސުމީ ކަންކަމުގައި ގައުމުތަކުން ކާމިޔާބުކުރަން ހިފާ ލަނޑުދަނޑިތަކަށް އަމަލުކުރުމަށް ބާރުއަޅާ އެޖެންޑާއެއް ކަނޑައެޅުމަށް މަސައްކަތްކުރައްވާނެ ކަމަށް ވިދާޅުވި އެވެ.
ޝާހިދުގެ ހިތާބުގައި ދެން ފާހަގަކުރެއްވި ހަތަރުވަނަ އަމާޒަކީ އިންސާނީ ހައްގުތައް ރައްކާތެރިކުރުމުގެ އަމާޒެވެ.
"ޔުނިވާސަލް ޑިކްލެރޭޝަން އޮފް ހިއުމަން ރައިޓްސް، އެހެން ހުރިހާ އެއްޗަކަށްވުރެ އިސް ކަމެއް ދީގެން ނެގެހެއްޓުން، އަދި ވަކިން ހާއްސަކޮށް ހަމަނުޖެހުމާއި ނުތަނަވަސްކަމުގެ ވަގުތުތަކުގައި، އެއީ އަޅުގަނޑުމެން ކުރަން ޖެހޭ ކަމެއް،" ޝާހިދު ވިދާޅުވި އެވެ.
އެންމެ ހާލުގައި ދިރިއުޅޭ، އަދި އެހީ ނުލިބި ތިބި ފަރާތްތަކަށް އެހީއާއި މަދަދު ދޭން އަބަދުވެސް އަޅުގަނޑުމެން މަސައްކަތް ކުރަން ޖެހޭ."
ޝާހިދުގެ އެންމެ ފަހު އަމާޒުގެ ގޮތުގައި ކަނޑައަޅުއްވާފައިވަނީ އދ. އިތުރަށް ހަރުދަނާކުރަން ކުރާ މަސައްކަތް މަޑުނުޖައްސާ ކުރިއަށް ގެންދެވުމެވެ.
"މިއީ ބާރުގެ ހަމަހަމަކަމާއި ގުޅިފައިވާ ކަމެއް ނޫން، އެކަމަކު އެދެވޭ ގޮތަށް މަސައްކަތްކުރުމާ ގުޅޭ. އދ. ގެ ކޮންމެ ގުނަވަނެއްވެސް އެންމެ ފުރިހަމައަށް މަސައްކަތްކޮށް، އެ ގުނަވަނުގެ މަގުސަދު ހާސިލުކުރެވެން ޖެހޭނެ،" ޝާހިދު ވިދާޅުވި އެވެ.
ޝާހިދުގެ ހިތާބު ނިންމަވާލެއްވީ ހާޒިރުވެވަޑައިގެން ތިއްބެވި ހުރިހާ ގައުމެއްގެ އިސްވެރިންނަށް އދ. ގެ އާއްމު މަޖިލީހުގެ ހަދާންތައް އާ ކޮށްދެއްވަމުންނެވެ.
އިންސާނީ ތާރީހުގައި ހިނގައިދިޔަ އެންމެ ބިރުވެރި ކަންކަމުގައިވާ ދެވަނަ ބޮޑު ހަނގުރާމައަށްފަހު، މުޅި ދުނިޔެ ގުޅިގެން ކުރިމަތިވެފައިވާ އެންމެހާ ގޮންޖެހުންތައް ހައްލުކުރަން މަސައްކަތްކުރަން އެއްބަސްވިކަން ގައުމުތަކަށް ޝާހިދު ހަދުމަފުޅު އެރުއްވި އެވެ. އަދި މިއީ ޓެކްނޮލޮޖީގެ ގޮތުން އެންމެ ކުރިއަރާފައިވާ، އެންމެ މުއާސަލާތީ ގުޅުން ރަނގަޅު، މުއްސަނދި، ވަސީލަތްތައް ގިނަ ޒަމާންކަން ވެސް ޝާހިދު މެމްބަރު ގައުމުތަކަށް ހަދުމަފުޅު އެރުއްވި އެވެ.
"އަޅުގަނޑުމެންގެ ކުރިމަތީގައި އަޅުގަނޑުމެން ހުއްޓުވޭނެ ހަމައެކަނި އެއްޗަކަށް ހުރީ ހަމަ އަޅުގަނޑުމެން. ރައްޔިތުން އެދޭ އދ. އަކަށް ވުމަށް މަސައްކަތް ކުރަމާ،" ޝާހިދުގެ ހިތާބު ނިންމަވާލައްވަމުން ވިދާޅުވި އެވެ.
