ޕެރިސް (ސެޕްޓެމްބަރު 20) - ފްރެންޗް ލީގުގައި ރޭ ލިޔޯން އަތުން ޕީއެސްޖީ މޮޅުވި މެޗުގެ ދެ ވަަނަ ހާފްގައި ލިއޮނަލް މެސީ ބަދަލުކުރުމުން އޭނާ ހިތްހަމަ ނުޖެހުނުކަން ފާހަގަނުކުރެވޭ ކަމަށް ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނެފި އެވެ.
ރޭގެ މެޗަކީ ބާސެލޯނާ ދޫކޮށް މެސީ ޕީއެސްޖީ އަށް ބަދަލުވި ފަހުން އެ ޓީމުގެ ދަނޑުގައި ކުޅުނު ފުރަތަމަ މެޗެވެ. ރޭގެ މެޗުގެ ފަހު 15 މިނިޓަށް މެސީގެ ބަދަލުގައި ޕީއެސްޖީން ވަނީ އަޝްރަފް ހަކީމީ ކުޅެން އަރުވައިފަ އެވެ. އޭރު ނަތީޖާ 1-1 އިން އެއްވަރުވެފައި އޮތްއިރު، މެސީ ދަނޑުން ފައިބައިގެން ދިޔަ ވަގުތު ޕޮޗެޓީނޯއާ ވާހަކަ ދައްކަން ދެކޮޅު ހަދާ މަންޒަރު ފެނެ އެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި ޕޮޗެޓީނޯ ގާތުގައި މެސީގެ އެ ކަންތައްތަކާ ބެހޭގޮތުން ސުވާލުކުރުމުން އޭނާ ވަނީ ކަންބޮޑުވާން ޖެހޭ ކަމެއް ނެތް ކަމަށް ބުނެފަ އެވެ.
"އަހަރެން މެސީ ގާތުގައި އެހީ އޭނާ އަށް މެޗު ދިޔައީ ކިހިނެއްތޯ. ޖަވާބުގައި އޭނަ ބުނީ ރަނގަޅަށޭ،" ޕޮޗެޓީނޯ ބުންޏެވެ. "މީގެ މައްސަލައެއް ކަމަށް ފާހަގަކުރެވޭ ވަރުގެ ކަމެއް ނުހިނގާ"
ޕީއެސްޖީ އަށް ބަދަލުވި ފަހުން މެސީ އެ ޓީމަށް ކުޅެދިން ތިން މެޗު ނިންމާލީ ގޯލެއް ނުޖެހި އެވެ. ރޭގެ މެޗުގައި މެސީ ފޮނުވާލި ހިލޭ ޖެހުމެއް ގޯލުގެ ދަނޑިއަށް އަމާޒުވިއިރު، ގޯލާ ސީދާކޮށް ފޮނުވާލި ބޯޅަ ލިޔޯންގެ ކީޕަރު އެންތަނީ ލޮޕޭޒް ވަނީ މަތަކޮށްފަ އެވެ.
ޕީއެސްޖީ މޮޅުކޮށްދިނީ ބަދަލެއްގެ ގޮތުގައި އެރި މައުރޯ އިކާޑީ ޖެހި ގޯލުންނެވެ.
ޕޮޗެޓީނޯ ބުނީ ޕީއެސްޖީގައި ފުރަތަަމަ އެގާރަ އަށް ކުޅެވޭނެ ފެންވަރުގެ ގިނަ ކުޅުންތެރިންތަކެއް އެބަތިބި ކަމަށާއި ކޮންމެ މެޗަަކަށް ނަގާ ޓީމާ މެދު ކޮންމެ ވެސް ވަރަކަށް ހިތްހަމަނުޖެހުންތަކެއް އުޅޭ ކުޅުންތެރިން ތިބޭނެ ކަމަށެވެ. އޭނާގެ ވަޒީފާ އަކީ މެޗުން މޮޅުވެވޭނެ ޓީމެއް ނެގުން ކަމަށް ޕޮޗެޓީނޯ ވަނީ ބުނެފަ އެވެ.
ފްރެންޗް ލީގުގެ އެއް ވަނައިގައި ޕީއެސްޖީ އޮތީ ކުޅުނު ހަ މެޗުން ވެސް މޮޅުވެ، ފުރިހަމަ ރެކޯޑަކާ އެކު އެވެ. ޕީއެސްޖީ އަށް 18 ޕޮއިންޓް ލިބިފައިވާއިރު، ދެ ވަނައިގައި އޮތް މާސޭ އަށް ފަސް މެޗުން ވަނީ 13 ޕޮއިންޓް ލިބިފަ އެވެ.
