ޕެރިސް (ސެޕްޓެމްބަރު 19) - ފްރެންޗް ލީގުގައި މިރޭ އިތުރު ވަގުތުގައި މައުރޯ އިކާޑީ ޖެހި ގޯލުން ފަހަތުން އަރައި 2-1 އިން ލިޔޯން ބަލިކޮށް، މި ފަހަރުގެ ލީގުގައި ޕީއެސްޖީން ދަމަހައްޓަމުން އަންނަ ސައްތަ އިން ސައްތަ ރެކޯޑާ އެކު އެއް ވަނަ މަގާމުގައި ލީޑެއް ނަގައިފި އެވެ.
ޕީއެސްޖީ ލީގުގެ އެއް ވަނައިގައި އޮތީ ކުޅުނު ހަ މެޗުން ވެސް މޮޅުވެ 18 ޕޮއިންޓާ އެކު އެވެ. ދެ ވަނައިގައި އޮތީ ފަސް މެޗުން 13 ޕޮއިންޓާ އެކު މާސޭ އެވެ.
މެޗު ފަށައިގެން ފުރަަތަަމަ ހާފުގައި ޕީއެސްޖީގެ ލިއޮނަލް މެސީ ވަނީ ގޯލެއް ޖަހަން ނުރައްކާތެރި ދެ ހަމަލާއެއް ފޮނުވާލައިފަ އެވެ. އެގޮތުން ފުރަތަމަ ހާފުގައި ހިލޭ ޖެހުމަކުން މެސީ ޖެހި ބޯޅަ ހުރަސްދަނޑިއަށް އަމާޒުވިއިރު، ގޯލާ ސީދާކޮށް މެސީ ޖެހި ބޯޅަ ލިޔޯންގެ ގޯލްކީޕަރު އެންތަނީ ލޮޕޭޒް ވަނީ މަތަކޮށްފަ އެވެ.
މެޗުގެ ފަހު ކޮޅުގައި މެސީ ބަދަލުކުރުމުން އޭނާ ހުރީ ހިތްހަމަނުޖެހިފަ އެވެ. ބަދަލުކުރި ވަގުތު މެސީ ވަނީ ޕީއެސްޖީގެ ކޯޗު މައުރީސިއޯ ޕޮޗެޓީނޯ ދެއްކި ވާހަކަތަކަށް މާ ބޮޑު ސަމާލުކަމެއް ނުދީ ބެންޗަށް ގޮސްފަ އެވެ.
މެސީ (ވ) ބަދަލުކުރި ވަގުތު ހިތްހަމަނުޖެހުން ފާޅުކުރަނީ.-- ފޮޓޯ: އޭއެފްޕީ
މެސީ ޕީއެސްޖީ ޖޯޒީގައި މިހާތަނަށް ތިން މެޗު ކުޅުނުއިރު އަދި ގޯލެއް ނުޖެހެ އެވެ. މިރޭގެ މެޗަކީ ޕީއެސްޖީ ދަނޑުގައި މެސީ ކުޅުނު ފުރަތަމަ މެޗެވެ.
ޕީއެސްޖީ ގޯލުގައި މި ފަހަރުގެ ޔޫރޯގެ މޮޅު ކުޅުންތެރިޔާގެ މަގާމު ހޯދި އިޓަލީގެ ޖިއަންލުއީޖީ ޑޮންނަރުންމާ ކުޅުނު މި މެޗުގައި ފުރަތަމަ ގޯލު ޖެހީ ލިޔޯނުންނެވެ. މެޗުގެ 54 ވަނަ މިނިޓްގައި ޓޯކޯ އެކަމްބީ ނެގި ހުރަހަކުން އޭރިއާތެރޭގައި ހުރި ލޫކަސް ޕަކޭޓާ ވަނީ ކައިރީ ކަނަށް ބޯޅަ އަމާޒުކޮށްލައިފަ އެވެ.
ނަތީޖާ ހަމަހަމަކުރަން ޕީއެސްޖީން ކުރި މަސައްކަތް ކާމިޔާބުވީ މެޗުގެ 66 ވަނަ މިނިޓްގަ އެވެ. ޕެނަލްޓީ އަކުން މި ގޯލު ޖެހީ ނޭމާ އެެވެ. މި ޕެނަލްޓީ އަކީ ލިޔޯންގެ ޑިފެންޑަރަކު ނޭމާ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
މެޗުން މޮޅުވާން ޕީއެސްޖީން ކުރި ބަދަލުތަކުގެ ތެރޭގައި މެސީގެ ބަދަލުގައި އަޝްރަފް ހަކީމީ ކުޅެން އެރިއިރު، އެންޑަ ހެރޭރާގެ ބަދަލުގައި ޖިއޮޖީނިއޯ ވައިނަލްޑަމް ވެސް ވަނީ ކުޅެން ނުކުމެފަ އެވެ. ވައިނަލްޑަމް އޭރިއާތެރެއިން ޖެހި ބޯޅައެއް ލިޔޯން ޑިފެންޑަރުން ވަނީ ބްލޮކްކޮށްފަ އެވެ.
ޕީއެސްޖީ މޮޅުކޮށްދިން ގޯލު ޖެހި އިކާޑީ ކުޅެން އެރީ އެންހެލް ޑި މާރިއާގެ ބަދަލުގަ އެވެ. އިތުރު ވަގުތުގެ ގޮތުގައި ދެއްކި ހަތަރު މިނިޓްގެ ތެރެއިން ފަހު މިނިޓްގައި އިކާޑީ މި ގޯލު ޖެހީ ކީލިއަން އެމްބާޕޭ ނެގި ހުރަހަކުން ބޮލުންނެވެ.
