ލަންޑަން (ސެޕްޓެމްބަރު 19) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑްގެ ގޯލްކީޕަރު ޑޭވިޑް ޑެހެއާ ފަހު ވަގުތު ޕެނަލްޓީއެއް މަތަކުރިއިރު، ވެސްޓް ހޭމް ޔުނައިޓެޑް ދަނޑުގައި މެންޗެސްޓާ ޔުނައިޓެޑް 2-1 އިން މޮޅުވެއްޖެ އެވެ.
މި މޮޅާ އެކު ޔުނައިޓެޑް ވަނީ ލީގުގެ އެއް ވަނައިގައި އޮތް ލިވަޕޫލާ ޕޮއިންޓްގެ ގޮތުން ހަމަކޮށްފަ އެވެ. އެއް ވަނައިގައި އޮތް ލިވަޕޫލާއި ދެ ވަނައިގައި އޮތް ޔުނައިޓެޑަށް ވަނީ ފަސް މެޗުން 13 ޕޮއިންޓް ލިބިފަ އެެވެ. ލިވަޕޫލަށް ކުރި ލިބެނީ ލަނޑުގެ ތަފާތުންނެެވެ.
މެޗަށް ނުކުތްއިރު ވެސްޓް ހޭމް އަށް އޮތް ކަންބޮޑުވުމަކީ އެ ޓީމު އެންމެ ފަހުން ކުޅުނު މެޗުގައި ރަތް ކާޑެއް ދެއްކުމުގެ ސަބަބުން ޓީމުގެ އެއް ވަނަ ފޯވާޑް މިކޭލް އެންޓޯނިއޯ ސަސްޕެންޑްވެފައި ވުމެވެ. މި މެޗުގައި ވެސްޓް ހޭމްގެ އެންމެ ކުރިއަށް ކުޅުނީ ކްރޮއޭޝިއާގެ ފޯވާޑް ނިކޯލަ ވްލަސިޗް އެވެ.
ލަންޑަން އޮލިމްޕިކް ސްޓޭޑިއަމްގައި މިއަަދު ކުޅުނު މެޗު ފަށައިގެން ވެސްޓް ހޭމްގެ ޖެރާޑް ބޮވެން ފޮނުވާލި ބޯޅައެއް ޔުނައިޓެޑް ޑިފެންޑަރުން ވަނީ ބްލޮކްކޮށްފަ އެވެ. ޔުނައިޓެޑްގެ ބްރޫނޯ ފެނާންޑޭސް ޖެހި ބޯޅަ ބޭރުވީ ދަނޑީގައި ޖެހިފަ އެވެ.
ވެސްޓް ހޭމް ލީޑުނެގީ މެޗުގެ 30 ވަނަ މިނިޓްގައި ސައީދު ބެންރަހްމާ ޖެހި ގޯލުންނެވެ. އޭރިއާބޭރުން ބެންރަހްމާ ޖެހި ބޯޅަ ގޯލަށް ވަނީ ޔުނައިޓެޑްގެ ރަފައެލް ވަރާން ގައިގައި ޖެހިފަ އެވެ. ޔުނައިޓެޑަށް އޭގެ ފަސް މިނިޓް ފަހުން އެއްވަރުކޮށްދިނީ ކްރިސްޓިއާނޯ ރޮނާލްޑޯ އެވެ. ފެނާންޑޭސް ނެގި ހުރަހަކުން ރޮނާލްޑޯ ފުރަތަމަ ޖެހި ބޯޅަ ވެސްޓް ހޭމް ކީޕަރު ލޫކަސް ފަބިއާންސްކީ އަތުގައި ޖެހިފައި ނުކުތް ވަގުތު ރޮނާލްޑޯ ވަނީ ގޯލުގެ ތެެރެއަށް ބޯޅަ ފޮނުވާލައިފަ އެވެ. މިއީ އަލުން ޔުނައިޓެޑާ ގުޅުނު ފަހުން ރޮނާލްޑޯ ޖެހި ހަތަރު ވަނަ ގޯލެވެ.
ގޯލު ޖެހުމަށް ފަހު ރޮނާލްޑޯ (ކ) އާއި ޕޮގްބާ އުފާފާޅުކުރަނީ.
ޔުނައިޓެޑުން ލީޑުނަގަން ކުރި މަސައްކަތް ކާމިޔާބުވީ މެޗުގެ 89 ވަނަ މިނިޓްގަ އެވެ. ބަދަލު ކުޅުންތެރިއެއްގެ ގޮތުގައި ދެ ވަނަ ހާފްގައި ކުޅެން އެރި ޖެސީ ލިންގާޑް އޭރިއާތެރެއިން ޖެހި ބޯޅަ އަމާޒުވީ ގޯލުގެ މަތީ ކަަނަށެވެ.
ލިންގާޑަކީ މިދިޔަ ސީޒަންގެ ފަހުކޮޅުގައި ލޯން އެއްބަސްވުމެއްގެ ދަށުން ވެސްޓް ހޭމަށް މޮޅު ކުޅުމެއް ދެއްކި ކުޅުންތެރިއެކެވެ. ލިންގާޑް ލަނޑު ޖަހަން ބޯޅަ ދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ނަމަންޏާ މަޓިޗް އެވެ.
ތިން ވަނަ ލަނޑެއް ޖަހަން ޔުނައިޓެޑުން ކުރި މަސައްކަތުގައި އެ ޓީމުގެ ރޮނާލްޑޯ އަށް ވެސްޓް ހޭމް އޭރިއާތެރެއިން އެ ޓީމުގެ ކާޓް ޒޫމާ ފައުލުކުރި ނަމަވެސް ރެފްރީ ނިންމީ ޕެނަލްޓީއެއް ދޭން ނުޖެހޭ ކަމަށެވެ. އެކަމަކު، އިތުރު ވަގުތުގެ ފަހު މިނިޓްގައި ޔުނައިޓެޑްގެ ލޫކް ޝޯ އަތުގައި އޭރިއާތެރެއިން ޖެހި ބޯޅަ އަށް ޕެނަލްޓީއެއް ދިނެވެ. އެއީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ.
ވެސްޓް ހޭމް އިން ޕެނަލްޓީ ޖަހަން ކުޅެން އެރުވީ އެ ޓީމުގެ ތަޖުރިބާކާރު މިޑްފީލްޑަރު މާކް ނޯބަލް އެވެ. ނޯބަލް ފޮނުވާލި ޕެނަލްޓީ ޔުނައިޓެޑްގެ ކީޕަރު ޑެހެއާ ވަނީ ހުށިޔާރުކަމާ އެކު މަތަކޮށްފަ އެވެ. މިއީ 2016 ވަނަ އަހަރުގެ ފަހުން ޑެހެއާ ޕެނަލްޓީއެއް މަތަކުރި ފުރަތަމަ ފަހަރެވެ.
ލީގުގައި މިރޭ ބްރައިޓަން އިން ވަނީ އަމިއްލަ ދަނޑުގައި 2-1 އިން ލެސްޓާ ސިޓީ ބަލިކޮށް ތިން ވަނަ އަށް ޖެހިލައިފަ އެވެ.
