ކޮވިޑު ފަތުރާ ވައިރަހުގެ އާ ވޭރިއެންޓެއް ކަމަށްވާ "މޫ" އަކީ ކަންބޮޑުވާން ޖެހޭ ވޭރިއެންޓަކަށް ވެދާނެ ކަމަށް ޔޫރަޕިއަން މެޑިސިންސް އެޖެންސީން (އީއެމްއޭ) ބުނެފި އެވެ.
ނަމަވެސް މިހާރު އެންމެ ބޮޑަށް ފެތުރިފައިވާ ޑެލްޓާ ވޭރިއެންޓަށް ވުރެ މޫގެ ނުރައްކާ ބޮޑުވެދާނެ ކަމަށް ބެލެވޭ ދިރާސާއެއް ނުވަތަ ތަފާސްހިސާބެއް ވެސް މިހާތަނަށް ހޯދިފައެއް ނުވެ އެވެ.
މޫ ވޭރިއެންޓު އެންމެ ފުރަތަމަ ފެނުނީ މިދިޔަ ޖެނުއަރީ މަހު ކޮލޮމްބިއާ އިންނެވެ. އޭގެ ސައިންޓިފިކް ނަމަކީ ބީ.621.1 އެވެ. މި މަހުގެ ކުރީކޮޅު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ "ޝައުގުވެރިކަން ހުރި" ވޭރިއެންޓުގެ ލިސްޓުގައި އޭތި ހިމަނާފަ އެވެ.
"އީއެމްއޭ އިން އެންމެ ބޮޑަށް ސަމާލުކަމެއް ދެނީ ހަލުވިކަމާއެކު ފެތުރޭ ޑެލްޓާ ވޭރިއެންޓަށް. އެކަމަކު ޕެރޫ އިން ފެނުނު ލަމްބްޑާ ވޭރިއެންޓާއި އޭގެ ފަހުން ފެނުނު މޫ ވޭރިއެންޓު ފަދަ ވޭރިއެންޓުތައް ވެސް މި ދަނީ މޮނީޓާ ކުރަމުން،" އީއެމްއޭގެ ވެކްސިންސް ސްޓްރެޓެޖީ ޗީފް މާކޯ ކަވަލެރީ ވިދާޅުވި އެވެ.
"މޫ އާ މެދު އިތުރަށް ބަލަމުން މި ދަނީ އެ ވޭރިއެންޓު ޖެހުމުން ވެކްސިނުން ލިބޭ ރައްކާތެރިކަން ކުޑަވެދާނެ ކަމަށް ބެލެވޭތީ."
އެމްސްޓެޑަމްގައި ހުންނަ އީއެމްއޭ އަކީ ޔޫރަޕިއަން ޔޫނިއަން (އީޔޫ) ގެ 27 ގައުމުގެ ބޭސްތައް ރެގިއުލޭޓު ކުރާ އިދާރާ އެވެ. ކަވަލެރީ ވިދާޅުވީ މިހާރު ލިބެން ހުރި ކޮވިޑް ވެކްސިންތަކުން މޫ ވޭރިއެންޓާ ދެކޮޅަށް މަސައްކަތް ކުރަނީ ކިހާ މިންވަރަކަށްތޯ ބެލުމަށް ކުންފުނިތަކާއެކު މަޝްވަރާ ކުރާނެ ކަމަށެވެ.
"ނަމަވެސް މޫ ވޭރިއެންޓު މާ ބޮޑަށް ފެތުރޭ ކަމަށް ބެލެވޭ ޑޭޓާއެއް އަދި ނެތް. އަދި މި ވޭރިއެންޓު ޑެލްޓާގެ މައްޗަށް ކުރި ހޯދާނެ ކަމަށް ބެލެވޭނެ ޑޭޓާއެއް ވެސް އަދި ނެތް."
ކޮންމެ ވައިރަހެއް ވެސް ގިނައިން ފެތުރޭ ވަރަކަށް މިއުޓޭޓްވެ، އާ ވޭރިއެންޓުތައް އުފެދެން މެދުވެރިވެ އެވެ. ބައެއް މިއުޓޭޝަންތަކުގެ ސަބަބުން ވައިރަހުގެ އަސަރު ކުރާ ގޮތާއި ފެތުރޭ ހަލުވި މިނަށް އަދި ވެކްސިނަށް ގުޑާ މިންވަރަށް ބަދަލު އާދެ އެވެ.
މި ވަގުތު "ކަންބޮޑުވާން ޖެހޭ" ވޭރިއެންޓުގެ ގޮތުގައި ޑަބްލިއުއެޗްއޯ އިން ފާހަގަކޮށްފައި ވަނީ ހަތަރު ވޭރިއެންޓެކެވެ. އޭގެ ތެރޭގައި ހިމެނޭ އަލްފާ ވޭރިއެންޓު 193 ގައުމަކުން ފެނިފައި ވާއިރު، ޑެލްޓާ ފެނިފައި ވަނީ 170 ގައުމަކުންނެވެ.
މޫ ހިމެނޭ ގޮތަށް ފަސް ވޭރިއެންޓެއް އޮތީ މޮނީޓާ ކުރާ ކެޓެގަރީގަ އެވެ. ކޮލޮމްބިއާ އިން އެންމެ ފުރަތަމަ ފެނުނު އެ ވޭރިއެންޓު މިހާރު ވަނީ ދެކުނު އެމެރިކާގެ ގައުމުތަކާއި ޔޫރަޕަށް ފެތުރިފަ އެވެ.
