ލެސްޓާ (ސެޕްޓެމްބަރު 17) - ޔުއެފާ ޔޫރޮޕާ ލީގުގައި ރޭ ލެސްޓާ ސިޓީ ކުޅުނު މެޗުން 2-2 އިން ނަޕޯލީއާ އެއްވަރުވިއިރު، ރަށުންބޭރުގައި ޑިނަމޯ ޒަގްރެބް 2-0 އިން ބަލިކޮށް ވެސްޓް ހޭމް ޔުނައިޓެޑް މޮޅަކުން މުބާރާތް ފަށައިފި އެވެ.
ލެސްޓާގެ ކިންގް ޕަވާ ސްޓޭޑިއަމްގައި ރޭ ކުޅުނު މެޗު ފަށައިގެން ނުވަ ވަނަ މިނިޓްގައި އެ ޓީމުން ލީޑުނެގީ ހާވީ ބާންސް ދިން ބޯޅައަކުން އަޔޯޒީ ޕެރޭޒް އެެވެ. ކެލެޗީ އިހެނާޗޯ ތަނަވަސްކޮށްދިން ފުރުސަތެއްގައި މެޗުގެ 64 ވަަނަ މިނިޓްގައި ބާންސް ވަނީ ލެސްޓާގެ ލީޑުފުޅާކޮށްދީފަ އެވެ.
ނަޕޯލީން އެއްވަރުކުރީ ފަހު ވިއްސަކަށް މިނިޓް ތެރޭ ދެ ގޯލު ޖަހައިގެންނެވެ. މެޗުގެ 70 ވަނަ މިނިޓްގައި ފަބިއަން ރުއީޒް ދިން ބޯޅައަކުން ވިކްޓަ އޮސިމްހެން ނަޕޯލީގެ ފުރަތަަމަ ގޯލު ޖެހިއިރު، މެޗު ނިމެން ތިން މިނިޓަށް ވެފައި ހުއްޓައި ނަޕޯލީގެ ދެ ވަނަ ގޯލު ޖެހީ ވެސް އޮސިމްހެން އެވެ. މި ގޯލު ޖަހަން ބޯޅަ ދިނީ މަޓެއޯ ޕޮލިޓާނޯ އެވެ. ލެސްޓާ އިން މެޗު ނިންމާލީ ކުޅުންތެރިއަކު މަދުކޮށެވެ. އެއީ މެޗުގެ އިތުރު ވަގުތުގައި ވިލްފްރެޑް އެންޑީޑީ އަށް ރަތް ކާޑެއް ދެއްކުމުންނެވެ.
ލެސްޓާގެ ސޮޔުންޗޫ (ވ) އާއި ކަސްޓާނިއާ (ކ) ކައިރިން ނަޕޯލީގެ އޮސިމްހެން ބޯޅަ ހިފައިގެންދަނީ.
މި ފަހަރުގެ އިނގިރޭސި ޕްރިމިއާ ލީގު ފަށައިގެން ރަނގަޅު ކުޅުމެއް ދައްކަމުން އަންނަ ވެސްޓް ހޭމް އިން ކްރޮއޭޝިއާގެ ޑިނަމޯ ޒަގްރެބް ބަލިކުރިއިރު، ގޯލުތައް ޖެހީ މިކޭލް އެންޓޯނިއޯ އާއި ޑެކްލަން ރައިސް އެވެ.
ޔޫރޮޕާ ލީގުގައި ރޭ ކުޅުނު އެހެން ފާހަގަކޮށްލެވޭ މެޗުތަކަށް ބަލާއިރު، ރެއާލް ބެޓިސް ވަނީ 4-3 އިން ސެލްޓިކް ބަލިިކޮށްފަ އެވެ. ރޭންޖާސް ދަނޑުގައި ލިޔޯން މޮޅުވީ 2-0 އިންނެވެ. ގަލަސަތަރާއި އިން 1-0 އިން ލާޒިއޯ ބަލިކުރިއިރު، މާސޭ އާއި ލޮކޮމޯޓިވް މޮސްކޯ ވަނީ 1-1 އިން އެއްވަރުވެފަ އެވެ.
ޔުއެފާ އިން އަަލަށް ފެށި ކޮންފަރެންސް ލީގުގައި ރޭ ހޯސޭ މޮރީނިއޯގެ ރޯމާ ވަނީ ފަހަތުން އަރައި 5-1 އިން ސީއެސްކޭއޭ ސޯފިއާ ބަލިކޮށްފަ އެެވެ.
ބަލްގޭރިއާގެ ސޯފިއާ ޓީމަށް ގްރަހަމް ކެރީ ގޯލެއް ޖަހައި ލީޑުނަގައި ދީފައިވަނިކޮށް ރޯމާ މޮޅުވީ ފަހަތުން އަރައި ފަސް ގޯލު ޖަހައިގެންނެވެ. ރޯމާގެ ކެޕްޓަން ލޮރެންޒޯ ޕެލެގްރީނީ ދެ ގޯލު ޖެހިއިރު، އަނެއް ތިން ގޯލު ކާމިޔާބުކުރީ ސްޓެފަން އެލްޝަރާވީ، ޖިއަންލޫކާ މަންޗިނީ އަދި ބަދަލު ކުޅުންތެރިއެއްގެ ގޮތުގައި ކުޅެން އެރި ޓެމީ އަބްރަހަމް އެވެ.
ކޮންފަރެންސް ލީގުގައި ރޭ ޓޮޓެންހަމް ކުޅުނު މެޗުން ވަނީ ފްރާންސްގެ ރެެނެސްއާ 2-2 އިން އެއްވަރުވެފަ އެވެ. ރެނެސްގެ ލޮއިކް ބާލްޑޭ އަތުން ބައިކޮޅަށް ވަން ގޯލުން ޓޮޓެންހަމް ލީޑުނެގި މި މެޗުގައި ރެނެސް އިން ވަނީ ފަހަތުން އަރައި ނަތީޖާ އަނބުރާލައިފަ އެވެ. ރެނެސް އަށް އެއްވަރުކޮށްދިނީ ފްލޭވިއަން ޓައިޓް އެވެ. އަދި ލީޑުނަގައިދިނީ ގައެޓަން ލަބޯޑޭ އެވެ. ޓޮޓެންހަމަށް އެއްވަރުކޮށްދިނީ ޕިއޭ އެމީލް ހޮއިބިއޭ އެވެ.
