ޕެރިސް (ސެޕްޓެމްބަރު 16) - ފްރާންސްގެ ގަދަބާރު ޕީއެސްޖީން އަދިވެސް އެ ކްލަބްގެ ޕްލޭންތައް ހަދަނީ ކީލިއަން އެމްބާޕޭ ހިމަނައިގެން ކަމަށް އެ ޓީމުގެ ސްޕޯޓިން ޑިރެކްޓަރު ލިއޮނާޑޯ ބުނެފި އެވެ.
ޕީއެސްޖީއާ އެކު އެމްބާޕޭ ހަދާފައިވާ ކޮންޓްރެކްޓްގައި ބާކީ 10 ވަރަކަށް މަސް އޮތްއިރު، އެ ކްލަބުން ވަނީ ނިމިދިޔަ ޓްރާންސްފާ މާކެޓްގައި ރެއާލުން އެމްބާޕޭ ގަންނަން ހުށަހެޅި ތިން ބިޑް ވެސް އަނބުރާ ފޮނުވާލައިފަ އެވެ.
ރިޕޯޓްތައް ބުނާގޮތުން ޖެނުއަރީ މަހު އެމްބާޕޭ، ރެއާލާ އެެކު ޕްރީ އެގްރިމެންޓެއްގައި ސޮއިކުރުމުގެ ފުރުސަތު ބޮޑެވެ. އެއީ ޖުލައި އެއް ވަނަ ދުވަހު އެ ޓީމާ ގުޅޭ ގޮތަށެވެ.
ކެނަލް ޕްލަސް އަށް ދިން އިންޓަވިއުއެއްގައި ލިއޮނާޑޯ ބުނީ ޕީއެސްޖީގައި ހުރި ކޮންމެ މީހަކު ވެސް އެ ޓީމުގެ މުސްތަގުބަލުގެ ވާހަކަތައް ދައްކަނީ އެމްބާޕޭ ހިމަނައިގެން ކަމަށެވެ.
"އަހަރެމެން އުއްމީދުކުރަނީ އެމްބާޕޭ މި ކްލަބްގައި މަޑުކުރާނެ ކަމަށް. އަހަރެމެން މި ކްލަބްގެ ކޮންމެ މީހެއް ގާތުގައި އެހިޔަސް ކޮންމެ މީހަކު ވެސް މުސްތަގުބަލުގެ ޕްލޭންތައް ހަދަނީ އެމްބާޕޭ ހިމަނައިގެން. އެ ވަރުގެ ކުޅުންތެރިއަކު ދާނެހެން ހިއެއްނުވޭ،" ލިއޮނާޑޯ ބުންޏެވެ.
ރެއާލުން އެންމެ ފުރަތަމަ ކުރީ 188 މިިލިއަން ޑޮލަރު (160 މިލިއަން ޔޫރޯ)ގެ ބިޑެކެވެ. އަދި ދެ ވަނަ އަށް ކުރީ 226 މިލިއަން ޑޮލަރުގެ (180 މިލިއަން ޔޫރޯގެ) ބިޑެކެެވެ. ޕީއެސްޖީން 2018 ވަނަ އަހަރު އެމްބާޕޭގެ ކޮންޓްރެކްޓް ދާއިމީ ކުރަން މޮނާކޯ އަށް ދެއްކި ދެއްކީ ރެއާލުން ދެ ވަނަ އަށް ހުށަހެޅި ބިޑާ ދާދި އެއްވަރެއްގެ ފީ އެކެވެ.
ޓްރާންސްފާގެ ފަހު ވަގުތު ރެއާލުން ހުށަހެޅީ ބޯނަހާ އެކު 267 މިލިއަން ޑޮލަރު (226 މިލިއަން ޔޫރޯ)ގެ ބިޑެކެވެ. މިއީ ދުނިޔޭގެ ރެކޯޑް އަގެއް ނަމަވެސް ޕީއެސްޖީން އެ ހުށަހެޅުމަށް އިޖާބަ ނުދިނެވެ.
ލިއޮނާޑޯ ބުނީ ރެއާލުން ދެ ވަނަ ބިޑެއް ނުކުރާ ކަމަށާއި ޕީއެސްޖީގެ ވިސްނުން އޮތީ އަބަދުވެސް އެއް ގޮތަށް ކަމަށެވެ. އެއީ ކޮންމެ އަގެއް ހުށަހެޅި ނަމަވެސް އެމްބާޕޭ ނުވިއްކާ ގޮތަށް ކަމަށް ލިއޮނާޑާ ބުނެފައިވެ އެވެ.
ޕީއެސްޖީން އެންމެ ފުރަތަމަ އެމްބާޕޭ ގެނައީ 2017 ވަނަ އަހަރު ލޯން އެއްބަސްވުމެއްގެ ދަށުންނެވެ. އޭގެ އެއް އަހަރު ފަހުން ޕީއެސްޖީން ދާއިމީ ކޮންޓްރެކްޓެއްގައި އެމްބާޕޭ މަޑުކުރުވީ އެވެ.
އެމްބާޕޭ ވަނީ މި ސީޒަނުގައި މިހާތަނަށް ހަތަރު ގޯލު ޖަހައިފަ އެވެ. ޗެމްޕިއަންސް ލީގުގައި ރޭ ބެލްޖިއަމްގެ ކްލަބް ބްރޫޖްއާ ދެކޮޅަށް ކުޅުނު މެޗުގައި އެމްބާޕޭ އަށް އަނިޔާވެގެން ބަދަލުކުރަން ޖެހުނެވެ.
