ރާއްޖޭގައި ކޮންމެ 10 އަހަރަކުން އެއް އަހަރު ކުރިޔަށް ގެންދާ ބޯހިމެނުން އަންނަ އަހަރުގެ ސެޕްޓެމްބަރު މަހުގެ 17 ވަނަ ދުވަހު ފެށުމަށް ނިންމައި، އެކަން މިއަދު އިއުލާންކޮށްފި އެވެ.

އަންނަ އަހަރަށް ރޭވިފައިވާ ބޯހިމެނުން ކުރިޔަށްގެންދާ ތާރީހު އިއުލާންކުރުމަށް މިނިސްޓްރީ އޮފް ނެޝަނަލް ޕްލޭނިންގް ހައުސިން އެންޑް އިންފްރާސްޓްރާކްޗާ އާއި މޯލްޑިވްސް ބިއުރޯ އޮފް ސްޓެޓިސްޓިކްސްއިން ބޭއްވި ނޫސްވެރިންގެ ބައްދަލުވުމެއްގައި އަންނަ އަހަރުގެ ސެޕްޓެމްބަރު މަހުގެ 17 ވަނަ ދުވަހު ބޯހިމެނުމުގެ މަސައްކަތް ފަށާނެކަން އިއުލާން ކުރެއްވީ ޕްލޭނިން މިނިސްޓަރު މުހައްމަދު އަސްލަމް އެވެ.

ވީޑިއޯ މެދުވެރިކޮށް އެ ބައްދަލުވުމުގައި ދެއްވި މެސެޖެއްގައި މިނިސްޓަރު ވިދާޅުވީ ބޯހިމެނުމަކީ ގައުމު ކުރިއަރާ ދިޔުމަށް ރާވާ ކަންކަމުގައި އާންމުންގެ ބައިވެރިވުން ވަރަށް ބޮޑަށް އޮންނަ މަސައްކަތެއް ކަމަށެވެ. އަދި ބޯހިމެނުމުގައި ލިބޭ މައުލޫމާތުގެ މައްޗަށް ބިނާކޮށް ތަރައްގީގެ ކަންކަން ޕްލޭންކޮށް ހިންގުމަށް ބޭނުންވާ އަސާސީ މައުލޫމާތު ވެސް ލިބޭނެ ކަމަށް އޭނާ ވިދާޅުވި އެވެ.

"މި ފަހަރުގެ ބޯހިމެނުން އަޅުގަނޑުމެން މި ފަށަނީ 17، ސެޕްޓެމްބަރު 2022 ގަ. އަޅުގަނޑުގެ އެދުމަކީ ހުރިހާ ބޭފުޅުންވެސް މިފަހަރުގެ ބޯހިމެނުމަކީ އަހަރެންގެ ބޯހިމެނުން ކަމުގަ، އެ އަޒުމުގަ އަޅުގަނޑުމެން އެންމެން މިކަމުގަ ބައިވެރިވުން،" މިނިސްޓަރުގެ މެސެޖުގައި ވިދާޅުވި އެވެ.

ޕްރެސް ކޮންފަރެންސްގައި މޯލްޑިވްސް ސްޓެޓިސްޓިކްސް ބިއުރޯގެ ޗީފް ސްޓެޓިސްޓިޝަން އައިޝަތު ހަސަން ވިދާޅުވީ މިފަހަރުގެ ބޯހިމެނުމުގައި އެހެން އަހަރުތަކެކޭ ތަފާތުކޮށް ރާއްޖޭގައި އިކޮނޮމިކް ސެންސަސް އެއްވެސް ކުރިޔަށް ގެންދާނެ ކަމަށެވެ.

އަދި އެއީ ރާއްޖޭގެ އެކި ރަށްރަށުގައި ކުރެވޭ މަސައްކަތްތަކާއި އެ މަސައްކަތްތަކުގައި ހަރަކާތެރިވާ ފަރާތްތަކާއި މަސައްކަތްތެރިންގެ އަދަދު ފަދަ މައުލޫމާތު އެއްކުރާނޭ ދިރާސާއެއް ކަމަށް ވެސް އައިޝަތު ހަސަން ވިދާޅުވި އެވެ.

އަންނަ އަހަރުގެ ސެޕްޓެމްބަރު 17 ވަނަ ދުވަހު ފަށަން ހަމަޖެހިފައިވާ ބޯހިމެނުން ނިންމާލެވޭނެ ކަމަށް ލަފާކުރެވެނީ ސެޕްޓެމްބަރު 30، ގައި ކަމަށް މިއަދުގެ ނޫސްވެރިންގެ ބައްދަލުވުމުގައި ބައިވެރިވެވަޑައިގަތް ސްޓެޓިސްޓިކްސް ބިއުރޯގެ ޕޮޕިއުލޭޝަން އެންޑް ސޯޝަލް ސްޓެޓިސްޓިކްސްގެ ހެޑް ފާތިމަތު ނިޔާޒާ ވިދާޅުވި އެވެ. އަދި ބޯހިމެނުމުގެ ރަސްމީ ތަފާސްހިސާބުތަކާއި މައުލޫމާތު އާންމު ކުރެވޭނީ އޮކްޓޯބަރު 20، 2022 ވަނަ ދުވަހުކަމަށް ވަނީ ލަފާކޮށްފަ އެވެ.

ސްޓެޓިސްޓިކްސް ބިއުރޯގެ ޑެޕިއުޓީ ޗީފް ސްޓެޓިސްޓިޝަން އައިޝަތު ޝަހުދާ ވިދާޅުވި ގޮތުގައި މިފަހަރުގެ ބޯހިމެނުން ކުރިޔަށް ގެންދާނީ ތިމާވެއްޓާއި ރައްޓެހި ގޮތެއްގައި އިލެކްޓްރޯނިކް ޓެބްލެޓް ބޭނުންކޮށްގެންނެވެ.

"ދެން މައުލޫމާތު ނަގާއިރުގަ އަޅުގަނޑުމެން މިފަހަރު... ކަރުދާހުގެ މިދިޔަ ފަހަރުތަކުގެ ބޯހިމެނުން ގެންގުޅެފަ، މިހާރު ތަފާސްހިސާބުގެ ނިޒާމު ވެސް މޮޑަނައިޒްވެ، އާ ޓެކްނޮލޮޖީގެ ރައްޓެހިގޮތަށް މިފަހަރު ޓެބްލެޓުން ބޭނުންކޮށްގެން ނަގާތީވެ، އެކަމަށްވެސް [ތައްޔަރީ] ތަކެއް ކުރަން ޖެހޭނެ،" ޝަހުދާ ވިދާޅުވި އެވެ.

މިއަދުގެ ބައްދަލުވުމުގައި ވަނީ ބޯހިމެނުން ފަށަން ނިންމާފައިވާ ތާރީހާ ހަމަޔަށް ތައްޔާރުވުމުގެ ގޮތުން ކުރިޔަށްގެންދަން ނިންމާފައިވާ މަސައްކަތްތަކުގެ މައުލޫމާތު ވެސް އާންމުކޮށްފަ އެވެ.

އެ މަސައްކަތުގެ ޓައިމްލައިން އަކީ:

• އޮކްޓޯބަރު 20، 2021: ސުވާލު ކަރުދާހަަށް އާންމުންގެ މަޝްވަރާ ހޯދަން ހުޅުވާލުން
• ނޮވެމްބަރު، 2021: ޖެނުއަރީ 2022: ސުވާލު ކަރުދާހުގެ ޕްރީޓެސްޓު
• މާޗް، 2022: ޕައިލެޓް ސެންސަސް: (މާލެއާ ބައެއް އަތޮޅު ތަކުގައި)
• ޖޫން - ޖުލައި، 2022: ލިސްޓިންގް މަސައްކަތް (އިމާރާތްތަކާއި ގޭބީސީތަކުގެ މައުލޫމާތު އެއްކުރުން)
• ޖުލައި- ސެޕްޓެމްބަރު، 2022: އިގްތިސޯދީ ސެންސަސްގެ މަސައްކަތް
• ޖުލައި - ސެޕްޓެމްބަރު، 2022: ބޯހިމެނުމުގެ މަސައްކަތަށް ބޭނުންވާ މަސައްކަތްތެރިން ހޯދުން
• ޖުލައި - އޯގަސްޓު، 2022: މަސައްކަތްތެރިންނަށް ބޭނުންވާ ތަމްރީނު ދިނުން
• ސެޕްޓެމްބަރު 17، 2022: ބޯހިމެނުން ފެށުން

އަންނަ އަހަރުގެ ބޯހިމެނުމަށް މިހާރުން ފަށައިގެންވެސް ތައްޔާރުުވުމުގެ މަސައްކަތްތައް ކުރިޔަށްދާއިރު، ބޯހިމެނުމަށް 4،300 އެއްހާ މަސައްކަތްތެރިން ބޭނުންވާނެ ކަމަށް ސްޓެޓިސްޓިކްސް ބިއުރޯއިން ލަފާ ކުރެ އެވެ. އަދި އެއް ފަހަރާ ރާއްޖޭގެ ހުރިހާ ސަރަހައްދެއްގައި ބޯހިމެނުން ކުރިޔަށްގެންދާއިރު، އެއީ އުނދަގޫ މަސައްކަތެއް ކަމަށާއި އެހެންކަމުން އެއީ ގައުމީ ކަމެއްގެ ގޮތުގައި ދެކުމަށް އެންމެންގެ އެއްބާރުލުން ދިނުމަށް ޗީފް ސްޓެޓިސްޓިޝަން އައިޝަތު އެދިލެއްވި އެވެ.

މިފަހަރުގެ ބޯހިމެނުމުގެ ޝިއާރަކީ "މީ އަހަރެމެންގެ ބޯހިމެނުން، އަހަރެމެންވެސް ބައިވެރިވާނަން،" އެވެ.