ތ. ހިރިލަންދޫ ސްކޫލުގެ ބައެއް ގްރޭޑްތަކުގެ ދަރިވަރުން ބޭނުންކުރާ އިމާރާތް ބާވެފައިވާއިރު، ސަރުކާރުން އަލަށް އަޅައިދޭން ބުނި އިމާރާތުގެ މަސައްކަތް ލަސްވާތީ ބެލެނެވެރިން މުޒާހަރާކުރަން ފަށައިފި އެވެ.
ގްރޭޑް އަށެއްގެ އޭ، ބީ އަދި ގްރޭޑް ހަތަކާއި ފަހެއްގެ އެ ދަރިވަރުން 2007 އިން ފެށިގެން ބޭނުންކުރަމުން އަންނަނީ 1989 ވަނަ އަހަރު އިމާރާތްކުރި ހޯލެކެވެ. އެއީ އަރިމަތީގައި އެއްވެސް ދޮރެއް ކުޑަދޮރެއް ނުހުންނަ ގޮތަށް، ކުރީ ޒަމާނުގެ ފަރުމާއަކަށް ހަދާފައިވާ ތަނެކެވެ. އެއްވެސް ނިވަލެއް ނެތުމުން ދޫނިސޫފާސޫފި ވަދެ ހޯލުގެ ތެރޭ އުދުހި އުޅެ އެވެ. ވިއްސާރަ ދުވަސްވަރެއް ނަމަ ޖެހެނީ އިތުރު ތަކުލީފެކެވެ.
"ވަޔާ އެއްކޮށް ވާރޭ އަންނަންޔާ ވައި ވަންނަ އިރު ކުޑަ ދޮރެއް ބޮޑު ދޮރެއް ނެތީމަ އެންމެ އެތެރޭގަ ތިބޭ ކުދިންނަށްވެސް ކެރީގެ އަސަރު ކުރޭ. ފޮތްތައް ތެމި، ޑެސްކުތައް ވެސް ތެމޭ،" އެ ސްކޫލު މިވަގުތު ހިންގުމާ ހަވާލުވެ ހުންނެވި، ލީޑިން ޓީޗަރު އަހުމަދު ހުސެއިން މަނިކު ވިދާޅުވި އެވެ.
"ކިޔަވައި ނުދެވޭ އަސްލު ވާރޭ ވެހެންޏާ."
ހިރިލަންދޫ ސްކޫލް އިިމާރާތް.
އެ ހޯލަކީ ކިޔަވައިދިނުމުގެ އިތުރުން ޖީސީއޯ ލެވެލް އިމްތިހާނަށާއި ސްކޫލުގެ އެހެން ހަރަކާތްތަކަށް ވެސް ބޭނުންކުރާ ތަނެކެވެ. މީގެ އިތުރުން ރަށުގެ އިޖްތިމާއީ ކަންކަމަށް ވެސް ބޭނުންކުރަނީ އެތަނެވެ.
"އެ އިމާރާތް ބޭނުން ކުރަނީ ސްކޫލުގެ މައި އިމާރާތުގައި އެކަށީގެންވާ ވަރަށް ކްލާސްރޫމް ނެތުމުން،" އޭނާ ބުންޏެވެ.
"ކްލާސްރޫމް ތަކެއްގެ ގޮތުގައި ވެސް ހަމަ މި ރޫމް މި ބޭނުން ކުރަނީ ޕާޓިޝަން ޖަހައިގެން. ކޮންމެ ގްރޭޑެއްގަ 20 ވަރަކަށް ކުދިން ތިބޭނެ."
މަނިކު ވިދާޅުވީ ސަރުކާރުން އޮތީ މަލްޓި ޕާޕޯސް ހޯލަކާއި އޮފީސް އިމާރާތެއް ދެއްވާނެ ކަމަށް ވައުދުވެފައި ކަމަށެވެ.
"ފިނޭންސާ ހަމައަށް ގޮއްސަ އޮތް ކަމަށް އަޅުގަނޑުމެންނަށް މައުލޫމާތު ލިބެނީ،"
ހިރިލަންދޫ ސްކޫލުގެ ކްލާހެއް.
މިހާނަތަނަށް ވެސް ވާރޭ ވެހޭ ނަމަ ހަދާ ގޮތަކީ ކްލާސްތައް މެދުކަނޑާލައި ސެޝަންތައް ކުރުކޮށްލަނީ އެވެ. އެގޮތަށް ވެސް މިދިޔަ ދެ އަހަރު ކިޔަވައިދިނެވެ.
"އަޅުގަނޑުމެން މިއަދު ކުރިއަށް ގެންދިޔައީ ސެޝަންތައް ކުރު ނުކޮށް ހަމަ. އަޅުގަނޑަށް ބޮޑަށް ލަފާކުރެވެނީ ބެލެނިވެރިން މިއަދު މުޒާހަރާ އެ ކުރަނީ އިމާރާތްތައް ލަސްވާތީ ކަމަށް،" މަނިކު ވިދާޅުވި އެވެ.
އެޑިއުކޭޝަން މިނިސްޓްރީގެ މީޑިއާ އޮފިޝަލް ވިދާޅުވީ މިކަމުގައި ބެލެނެވެރިންނާ މަޝްވަރާކޮށްފައިވާ ކަމަށާއި އެކަންކަން ރަނގަޅުކޮށް އަލުން ސްކޫލަށް ދަރިވަރުން ފޮނުވައިގެން ކިޔަވައި ދޭވޭނެ ކަމަށް ދެކޭ ކަމަށެވެ.
"ސްކޫލުގެ އާ އިމާރާތް އެޅުން ލަސްވަނީ ކުރެހުމަށް ބަދަލު ގެނައުންފަދަ ބައެއް ކަންކަން ހުރުމުން. ނަމަވެސް މާ ލަސްތަކެއް ނުވެ އެ ކަންކަން ހައްލު ކުރެވުމުން އިމާރާތް އަޅަން ފެށޭނެ،" އޭނާ ވިދާޅުވި އެވެ.
އާބާދީގައި 12،00 އެއްހާ މީހުން ތިބި އެ ރަށު ސްކޫލުގައި ގްރޭޑް 1-10 އަށް 200 އަށް ވުރެ ގިނަ ދަރިވަރުން ކިޔަވަ އެވެ.
