އިއްޔެގެ ވަގުތެއްގައި ހުޅުމާލޭ ޖަލުގައި ހުރި ގައިދީއަކު ކުއްލި ގޮތަކަށް މަރުވި ހާދިސާ ހިނގައިދިޔަ ގޮތް ތަފްސީލުކޮށްދޭ ގޮތުގެ ޓައިމްލައިންއެއް މިނިސްޓްރީ އޮފް ހޯމް އެފެއާޒްއިން އާންމުކޮށްފި އެވެ.
އެ ޓައިމްލައިން ބިނާކޮށްފައިވަނީ ސީސީޓީވީ ފުޓޭޖާއި ޖަލު އޮފިސަރުންނާއި ގައިދީން ދިން މައުލޫމާތު ތަކުގެ މައްޗަށް ކަމަށް ހޯމް މިނިސްޓްރީން ބުނެ އެވެ. އެ ހާދިސާގައި މަރުވެފައިވަނީ މަސްތުވާތަކެތީގެ މައްސަލައެއްގައި ތިން އަހަރު ދުވަހުގެ ޖަލު ހުކުމެއް ތަންފީޒުކުރަމުން ދިޔަ ގދ. ވާދުއަށް ނިސްބަތްވާ މުހައްމަދު އަސްލަމް އެވެ.
އަސްލަމް، 40، މަރުވުމާއެކު، ހުޅުމާލެ ހޮސްޕިޓަލަށް ގެންގޮސްފައިވާއިރު، ހޮސްޕިޓަލު ތެރޭގައި ހަމަނުޖެހުމެއް ވެސް ވަނީ ރޭ ހިނގާފަ އެވެ. އާއިލާއިން ވާހަކަދެއްކި މީހަކު "އަދަދު" އަށް ބުނީ އަސްލަމް މަރުވި ހަބަރު ކަމާބެހޭ އިދާރާތަކުން އާއިލާއާ ހިއްސާކޮށްފައިވަނީ ހާދިސާ ހިނގިތާ ދެ ގަޑިއިރު ފަހުން ކަމަށެވެ. އަދި ހަމަނުޖެހުން ހިނގީ އެކަމާ ގުޅިގެންކަމަށެވެ.
އެހެން ނަމަވެސް ހޯމް މިނިސްޓްރީން އާންމުކުރި ޓައިމްލައިންއަށް ބަލާލާއިރު ހާދިސާ ހިނގިތާ އެއް ގަޑިއިރުތެރޭ އެ މައުލޫމާތު ވަނީ އާއިލާއާ ހިއްސާކޮށްފަ އެވެ.
ހޯމް މިނިސްޓްރީން ބުނި ގޮތުގައި ސީސީޓީވީ ފުޓޭޖް ބެލުމުން އަސްލަމް އެންމެ ފުރަތަމަ މޭޒެއް މަތީ އިށީނދެ އިންނަތަން 17:55 ހާއިރު ފެނެ އެވެ. އަދި އޭގެ ހަތަރު މިނެޓް ފަހުން އަސްލަމް މޭޒުމަތިން އަބުރައިގަނެގެން ވެއްޓޭތަން ފެނިގެންދެ އެވެ.
އެވަގުތުން ވަގުތަށް އެހެން ގައިދީއަކު އަސްލަމްއަށް ސީޕީއާރު ދޭތަން ސީސީޓީވީން ފެންނަކަމަށް ހޯމް މިނިސްޓްރީއިން ބުނެ އެވެ.
އަދި ގައިދީއަކު ހޭނެތިފައި އޮތުމުން އެ ސަރަހައްދަށް ޖަލު އޮފިސަރުން އެޓެންޑްވިކަމަށް އެ މިނިސްޓްރީން ބުނީ 18:02 ގަ އެވެ. އަދި 18:10 ހާއިރު އަސްލަމް ހޮސްޕިޓަލަށް ގެންދިއުމުން ވަގުތުން ޑޮކްޓަރުން އަސްލަމްއަށް އެޓެންޑްވި އެވެ.
އަދި 18:30 ހާއިރު އާއިލާއަށް މައުލޫމާތު ފޯރުކޮށްދިނުމަށް ޖަލު އޮފިސަރުން މަސައްކަތް ފެށިކަމަށް ޓައިމްލައިންގައި ވެ އެވެ. އޭގެ 12 މިނެޓު ފަހުން އާއިލާ މެމްބަރުންނާ ގުޅި، އެ ހާދިސާގެ މައުލޫމާތު ހިއްސާކޮށްފައިވަނީ 18:42 ގަ އެވެ.
އަސްލަމް މަރުވިކަމަށް ހޮސްޕިޓަލުން ނިންމާފައިވަނީ 18:55 ގަ އެވެ. އެހެން ނަމަވެސް ޑޮކްޓަރުން އެ މައުލޫމާތު ކަރެކްޝަންސްގެ އޮފިސަރުންނަށް އަންގާފައިވަނީ 20:23 ގަ ކަމަށް ކަރެކްޝަންސްއިން ވަނީ މި ނޫހަށް މައުލޫމާތު ދީފަ އެވެ. އެ ހިސާބުން އެ މައުލޫމާތު އާއިލާއަށް ވަނީ ފޯރުކޮށްދީފަ އެވެ.
ހުޅުމާލެ ޖަލުގައި ހުރި ގައިދީއަކު މަރުވުމާ ގުޅިގެން، އާއިލާގެ މެމްބަރުން ހޮސްޕިޓަލުގައި. ފޮޓޯ: އަދަދު
އެ ހާދިސާއާއެކު ހުޅުމާލެ ހޮސްޕިޓަލަށް ދިޔަ އަސްލަމްގެ ގާތް އެކުވެރިންނާއި އާއިލާގެ ބައެއް މެމްބަރުން "އަދަދު" އަށް ކިޔައިދިން ގޮތުގައި އަސްލަމް އަކީ ކުރިން ވަރަށް ރަނގަޅަށް އުޅެމުން އައި މީހެކެވެ. އެކަމަކު މަސްތުވާތަކެތީގެ ވަބާގައި ޖެހި މީހާ ކުށުގެ ވެއްޓަށް ހުށަހެޅުނީކަމަށް އެ އާއިލާއިން ބުންޏެވެ.
ހުޅުމާލޭގައި ދިރިއުޅޭ އެ އާއިލާއަށް އަސްލަމްގެ މަރުގެ މައުލޫމާތު ލިބުނު ވަގުތު ލަސްވުމުން ރޭ ހޮސްޕިޓަލު ތެރޭގައި ކޮންމެވެސް ވަރެއްގެ ހަމަނުޖެހުންމެއް ހިނގައިދިޔަ އެވެ. އެއާއެކު ފަހުން ގިނަ އަދަދެއްގެ ފުލުހުން ވަނީ ހޮސްޕިޓަލުގެ ތެރޭގައި ހަރަކާތްތެރިވެފަ އެވެ. އަދި އާއިލާގެ ގިނަ މެމްބަރުންތަކެއް ވަނީ ފަހުން ވެސް ހޮސްޕިޓަލަށް ގޮސްފަ އެވެ.
އާއިލާ މެމްބަރެއް ކިޔައިދިން ގޮތުގައި ހޮސްޕިޓަލުން ހަށިގަނޑު ފެނުނުއިރު އަސްލަމްގެ ބޮލުގެ ފުއްކިބައިން ފަޅައިގެން މަށައިގެން ގޮސްފައިވާތީ ބެންޑޭޖު އަޅާފައި ހުއްޓެވެ. ބެލެވޭ ގޮތުގައި އެއީ އަނބުރައިގަނެގެން ވެއްޓުނުއިރު ލިބުނު އަނިޔާއެއްކަމަށް އެ މީހާ ބުންޏެވެ.
އަސްލަމްއަކީ ސިއްހީ ބޮޑު ބައްޔަކަށް ފަރުވާކުރަމުންދިޔަ މީހެއް ނޫންކަން ކަރެކްޝަންސް އަދި އާއިލާއިންވެސް ވަނީ ޔަގީންކޮށްދީފަ އެވެ. އެ ހާދިސާ އިންސްޕެކްޓާ އޮފް ކަރެކްޝަނަލް ސާވިސް، ފުލުހުން އަދި ހިއުމަން ރައިޓްސް ކޮމިޝަންއަށް އެންގި އެވެ.
އަސްލަމްގެ މަރު އިންސްޕެކްޓާ އޮފް ކަރެކްޝަނަލް ސާވިސަސްއިން ދަނީ ތަހުގީގުކުރަމުންނެވެ.
