ރޯމް (ސެޕްޓެމްބަރު 13) - ހޯސޭ މޮރީނިއޯގެ ކޯޗިން ކެރިއަރުގެ 1000 ވަނަ މެޗުން ރޭ ފަހު ވަގުތު އޭނާ ކޯޗުކޮށްދޭ ރޯމާ މޮޅުވިއިރު، މެޗު ހާއްސަވީ ތަފާތު ސަބަބަކާ ހުރެ ކަމަށް މޮރީނިއޯ ބުނެފި އެވެ.
ކުރިން ޗެލްސީ އާއި ރެއާލް މެޑްރިޑް އަދި މެންޗެސްޓާ ޔުނައިޓެޑަށް ވެސް ކޯޗުކޮށްދިން މޮރީނިއޯ ރޭގެ މެޗުގެ ކުރިން މި މެޗު ހާއްސަވާނެތޯ މީޑިއާ އިން އެހުމުން ބުނީ މެޗުން މޮޅުވެއްޖެނަމަ މިއީ ހާއްސަވެދާނެ މެޗެއް ކަމަށް ބުނެފަ އެވެ.
ސަސުއޯލޯ އަތުން ރޯމާ މޮޅުވީ މެޗުގެ އިތުރު ވަގުތުގައި ސްޓެފަން އެލް ޝަރާވީ ޖެހި ގޯލުންނެެވެ. މޮރީނިއޯ ވަނީ ގޯލު ޖެހުމާ އެކު ދުވެފައި ގޮސް ޓީމުގެ ކުޅުންތެރިންނާ އެކު އުފާފާޅުކޮށްފަ އެވެ. މެޗަށް ފަހު މޮރީނިއޯ ބުނީ 1000 ވަނަ މެޗު މޮޅުވި ގޮތާއި އޭނާ އަށް އުޅެވުނު ގޮތް އަބަދުވެސް ހަނދާނުގައި ހުންނާނެ ކަމަށެވެ.
"މި މެޗުގައި ފެނުނު މަންޒަރަށް ބަލާއިރު އަހަންނަކީ 58 އަހަރުގެ މީހެއް ނޫން. އަހަންނަށް އުޅެވުނު ގޮތުން އިހުސާސް ކުރެވުނީ 10، 12 ނޫނީ 14 އަހަރުގެ ކުޑަކުއްޖެއް ގޮތަށް. އަހަންނަށް ދުއްވައިގަނެވުނީ ވެސް ކުޑަކުއްޖެއް ދުވާހެން،" މެޗަށް ފަހު މޮރީނިއޯ ބުންޏެވެ.
"މެޗުގެ ކުރިން އަހަރެން އަމިއްލަ ނަފްސަށް ވިސްނައިދޭން މަސައްކަތް ކުރިން މިއީ ވަކިން މާ ހާއްސަ މެޗެއް ނޫން ކަމަށް. އެކަމަކު އަހަރެން މުޅި ދިރިއުޅުމުގައި ވެސް މި މެޗު. 1000 ވަނަ މެޗު ހަނދާން ހުންނާނީ އަހަންނަށް އުޅެވުނު ގޮތުން،"
ޖެހިލުންކުޑަ ކޯޗެއްގެ ގޮތުގައި ފާހަގަކުރެވޭ މޮރީނިއޯ ވަނީ ކޯޗިން ކެރިއަރުގައި މިހާތަނަށް 25 ތަށި އުފުލާލައިފަ އެވެ. އޭނާ އެންމެ ފުރަތަމަ ފާހަަގަކުރެވުނީ ޕޯޗުގަލްގެ ޕޯޓޯގެ ކޯޗެއްގެ ގޮތުގަ އެވެ. އެ ޓީމަށް 2004 ގެ ޗެމްޕިއަންސް ލީގު ކާމިޔާބު ކޮށްދިނެވެ.
ޕޯޓޯގައި މަސައްކަތްކުރި ފަހުން މޮރީނިއޯ ވަނީ ތިން ގައުމެއްގައި ލީގު ޗެމްޕިއަންކަން ހޯދި މަދު ކޯޗުންގެ ތެރޭގައި ހިމެނިފަ އެވެ. އޭނާ ސްޕެނިޝް ލީގުގެ ތަށި އުފުލާލީ ރެއާލްގައި ހުރެ އެވެ. އަދި އިންޓަ އަށް އިޓާލިއަން ލީގު ކާމިޔާބުކޮށްދިނެވެ. އަދި ދެ ފަހަރެއްގެ މަތިން ޗެލްސީ އަށް ކޯޗުކޮށްދީ އެ ޓީމަަށް ވެސް ލީގު ހޯދައިދިނެވެ.
މި ސީޒަނުގައި ރޯމާ ކޯޗަކަށް މޮރީނިއޯ ގެނައީ ތިން އަހަރުގެ އެއްބަސްވުމެއްގެ ދަށުންނެވެ. ރޭގެ މޮޅާ އެކު ރޯމާ ވަނީ ލީގުގެ އެއް ވަނަ އަށް ޖެހިލައިފަ އެވެ. އެއް ވަނައިގައި އޮތް ރޯމާ އާއި ދެ ވަނައިގައި އޮތް އޭސީ މިލާން އަދި ތިން ވަނައިގައި އޮތް ނަޕޯލީ އަށް ވެސް ވަނީ ތިން މެޗުން ނުވަ ޕޮއިންޓް ލިބިފަ އެވެ.
