ލާމަރުކަޒީ ގާނޫނުގެ ދަށުން މާލޭ ސިޓީ ކައުންސިލްގެ އިހުތިސޯސްގެ ތެރޭގައި ހިމެނޭ މަސައްކަތްތަކުގެ މައްސަލަ ހައްލުނުވެގެން އެންމެ ފަހުން ރައްޔިތުންގެ މަޖިލީހާ ހަމައަށް ގެންގޮސްފި އެވެ.
މަޖިލީހުގެ މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ މާލޭ ސިޓީ ކައުންސިލުން މަޖިލީހުގެ މާލޭ ދާއިރާގެ މެމްބަރުންނާ ބައްދަލުކުރައްވައި، ކައުންސިލަށް ދިމާވަމުންދާ މައްސަލަތައް ހިއްސާކޮށްފައިވާ ކަމަށެވެ.
އެގޮތުން އެ މަޝްވަރާތަކުގައި އެއްބަސްވެވުނީ، އަންނަ އަހަރުގެ ދައުލަތުގެ ބަޖެޓު ހުށަހަޅައި މަޖިލީހުން ފާސްކުރުމުގެ ކުރިން އެ ކަންބޮޑުވުންތަކާއި މައްސަލަތަކަށް ހައްލެއް ހޯދައި ދިނުމަށް މަޖިލީހުން ވެސް މަސައްކަތްކޮށް ދިނުމަށް ކަމަށެވެ.
އީވާ ވިދާޅުވި ގޮތުގައި، އެ މަޝްވަރާތަކަށް ދިމާވެފައިވާ މައިގަނޑު ހަތް މައްސަލައެއް ފާހަގަކޮށް ސިޓީ ކައުންސިލުން މަޖިލީހަށް ސިޓީއެއް ވަނީ ފޮނުވައިފަ އެވެ.
"މަޝްވަރާތަކުން ވެސް އަދި މި ސިޓީން ވެސް އަޅުގަނޑަށް ފާހަގަކުރެވޭނީ އިހުތިސޯސާބެހޭ މައްސަލަތަކެއް،" އީވާ ވިދާޅުވި އެވެ.
އެއާއެކު ސަރުކާރާއި ސަރުކާރުގެ ކުންފުނިތަކާ ގުޅިގެން މަޖިލީހުން އިސްވެ އެ މައްސަލަތައް ހައްލުކޮށްދޭން ޖެހޭކަމަށް، އެ ސިޓީ މަޖިލީހުގެ ލާމަރުކަޒީ ކޮމިޓީއަށް ފޮނުއްވަމުން އީވާ އިތުރަށް ވިދާޅުވި އެވެ.
އެންމެ ބޮޑު މައްސަލައަކީ ހުޅުމާލެ
އިހުތިސޯސާ ގުޅޭ ގޮތުން ސިޓީ ކައުންސިލުން އެންމެ ބޮޑަށް ފާހަގަކުރަމުންދަނީ ހުޅުމާލޭގެ މައްސަލަ އެވެ.
ގާނޫނުން ކައުންސިލުގެ މައްޗަށް މުނިސިޕަލް ހިދުމަތްތަކުގެ އިތުރުން ތަރައްގީގެ މަޝްރޫއުތައް ހިންގުމަށް ލާޒިމުކޮށްފައިވީ ނަމަވެސް، ހުޅުމާލޭގައި އެ ހިދުމަތްތަކާއި މަސައްކަތްތައް ކުރުމުގެ ފުރުސަތު ސަރުކާރުން ފަހިކޮށްދީފައިނުވާ ކަމުގެ ޝަކުވާ މާލޭ ސިޓީ ކައުންސިލުން ދަނީ ތަކުރާރުކޮށް ކުރަމުންނެވެ.
ހުޅުމާލޭގައި މުނިސިޕަލް ހިދުމަތްތައް ދިނުމަށް ސިޓީ ކައުންސިލުގައި ބަޖެޓުނެތް އިރު، އެތަނުން އެދިފައިވަނީ އެކަމަށް އެޗްޑީސީގައި އޮތް ބަޖެޓު ދިނުމަށެވެ.
އެކަމަށް ކުރިއެރުމެއް ލިބިފައިނުވާއިރު، މިއަހަރުގެ ބާކީ އޮތް ތަނުގައި މުނިސިޕަލް ހިދުމަތްތައް ދިނުމަށް އެޗްޑީސީ އާއި ސިޓީ ކައުންސިލާ ދެމެދު އެއްބަސްވުމަކަށް ދިޔުމަށް، ވަގުތީ ހައްލެއްގެ ގޮތުގައި އަލީ ނިޔާޒް ވަނީ ހުށަހަޅުއްވައިފަ އެވެ.
އަދި އެ ހުށަހެޅުމަށް އަމަލުކުރުމަށް ސަރުކާރާއެކު މަޝްވަރާކުރެވެމުންދާ ކަމަށާއި، އެ މައްސަލައަށް ވަރަށް އަވަހަށް ހައްލެއް ލިބިގެންދާނެ ކަމަށް އޭނާ މިދިޔަ މަހުގެ 25 ވަނަ ދުވަހު މަޖިލީހުގައި ވަނީ ވިދާޅުވެފަ އެވެ.
އެ މައްސަލައިގައި އިކޮނޮމިކް ކައުންސިލުގައި މިދިޔަ ހަފްތާގެ ތެރޭގައި މަޝްވަރާ ކުރެވުނުކަމަށް ރައީސް އޮފީހުގެ ތަރުޖަމާނު މުހައްމަދު މަބްރޫކު އަޒީޒް "އަދަދު" އަށް ޔަގީންކޮށްދެއްވި އެވެ.
ނަމަވެސް، އެކަމުގައި އަދި ވަކި ގޮތެއް ނިންމާފައިވާ ނުވާ ކަމަށާއި، ގާނޫނީ ގޮތުން ހުރި ހުރަސްތައް ބެލުމަށް ބަންޑާރަ ނައިބުގެ އޮފީހުގެ ލަފައަކަށް އެދިފައިވާކަމަށް މަބްރޫކު ވިދާޅުވި އެވެ.
