އަންނަ މަހު މާލޭގައި ކުރިއަށްދާ ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގަތަރުގައި މިރޭ ގައުމީ ޓީމުން ޓްރެއިނިންތައް ފަށައިފި އެވެ.
ސާފް ޗެމްޕިއަންޝިޕް ޝެޑިއުލްކޮށްފައިވަނީ އަންނަ މަހު 1 އިން 16 އަށެވެ.
ގައުމީ ޓީމު އިއްޔެ، (10 ސެޕްޓެމްބަރު) ގައި ގަތަރަށް އައުމަށް ފަހު ސްކޮޑުގައި ހިމެނޭ ހުރިހާ ކުޅުންތެރިންނާއި ކޯޗިން ސްޓާފުން ވަނީ ކޮވިޑަށް ޕީސީއާރް ޓެސްޓެއް ހަދައިފަ އެވެ. މިރޭ ހުރިހާ ކުޅުންތެރިންނާއި އޮފިޝަލުންގެ ނަތީޖާ ނެގެޓިވްކޮށް ލިބުމުން ވަނީ ފުރަތަމަ ޕްރެކްޓިސް ސެޝަން ބާއްވައިފަ އެވެ.
ސާފް ޗެމްޕިއަންޝިޕަށް ގައުމީ ޓީމާ ހަވާލުވެ ހުރި ތަޖުރިބާކާރު ކޯޗު އަލީ ސުޒޭން މި ވަގުތު ހުރީ ޓީމާ ދުރުގަ އެވެ. އެއީ ކޮވިޑަށް ޕޮޒިޓިވްވުމުން ހޯމް ކަރަންޓީނަށް ދާން ޖެހުމުންނެވެ. ސުޒޭނަށް އެނބުރި އާދެވޭނީ ބަލިން ފަސޭހަ ވުމުންނެވެ. މިހާރު އޮތްގޮތުން މި މަހު 18 ވަނަ ދުވަހު ސުޒޭން ކޮވިޑް ޓެސްޓެއް ކުރާނެ އެވެ.
ސުޒޭން ނެތުމުން ގައުމީ ޓީމު ލީޑުކުރުމުގެ ޒިންމާއާ މި ވަގުތު ހަވާލުވެ ހުރީ އެސިސްޓަންޓް ކޯޗު އިސްމާއިލް މަހްފޫޒް (އިންމަ) އެވެ. އިންމަ އަށް އެހީތެރިވާން ގޯލްކީޕަރު ކޯޗުންގެ ގޮތުގައި އިމްރާން މުހައްމަދާއި އަސްލަމް އަބްދުއްރަހީމް އަދި އެފްއޭއެމްގެ ޓެކްނިކަލް ޑިޕާޓްމަންޓުން އަހުމަދު ޝާކިރު (ޝާކިއްޓެ) ހަރަކާތެރިވާނެ އެވެ.
މި މަހު 28 ގެ ނިޔަލަށް ކުރިއަށް ގެންދަން ނިންމާފައިވާ މި ޓްރެއިނިން ކޭމްޕްގެ ތެރެއިން ރާއްޖޭން ތިން މެޗެއް ކުޅެން މިހާރު އޮތީ ރާވައިފަ އެވެ. އެއީ ސްރީލަންކާ ގައުމީ ޓީމާ ދެކޮޅަށް ކުޅޭ މެޗުގެ އިތުރުން ގަތަރުގެ ދެ ޓީމަކާ ކުޅޭ މެޗެވެ.
ރާއްޖެ އަކީ އެންމެ ފަހުން 2018 ވަނަ އަހަރު ބޭއްވި ސާފް ޗެމްޕިއަންޝިޕްގެ ޗެމްޕިއަނުންނެވެ. މި ފަހަރުގެ މުބާރާތުގައި ވާދަކުރަނީ ފަސް ޓީމެވެ. މުބާރާތް ކުރިއަށްދާނީ ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށް ދާ ގޮތަށެވެ.
މި ފަހަރުގެ ސާފް ޗެމްޕިއަންޝިޕްގައި ރާއްޖެ ކުޅޭ ފުރަތަމަ މެޗުގައި ނުކުންނާނީ ނޭޕާލާ ދެކޮޅަށެވެ. އެއީ އަންނަ މަހުގެ އެއް ވަނަ ދުވަހު އެވެ. އޭގެ ފަހުން އަންނަ މަހު ހަތް ވަނަ ދުވަހުގެރޭ ބަންގްލަދޭޝާ ކުޅޭނެ އެވެ. ސްރީލަންކާއާ ދެކޮޅަށް 10 ވަނަ ދުވަހު ހަވީރު ކުޅޭ މެޗަށް ފަހު ލީގު ބުރުގެ ފަހު މެޗުގައި އިންޑިއާއާ ބައްދަލުކުރާނީ އަންނަ މަހުގެ 13 ވަނަ ދުވަހުގެރޭގަ އެވެ. ފައިނަލް އޮންނާނީ 16 ވަނަ ދުވަހުގެރޭގަ އެވެ.
