ސްކޫލުތަކުގައި ކިޔަވައިދޭން ބޭނުންކުރާ ބައެއް ޓެކްސްޓް ފޮތްތަކުގައި އެއްވެސް ކަހަލަ ކުށެއް ފާހަގަކުރެވިފައިވާނަމަ އެކަން އެޑިއުކޭޝަން މިނިސްޓްރީގެ ސަމާލުކަމަށް ގެނެސްދިނުމަށް އެ މިނިސްޓްރީއިން އެދިއްޖެ އެވެ.
އެ މިނިސްޓްރީއިން މިއަދު ނެރުނު އިއުލާނެއްގައި ބުނެފައިވަނީ ސްކޫލުތަކުގައި މިހާރު ބޭނުންކުރަމުންދާ އިސްލާމް އަދި ގުރުއާން ފޮތްތަކުގައި ހުރި ކުއްތަކެއް ފާހަގަކުރެވިފައިވާތީ އެކަން އިސްލާހު ކުރަމުންދާކަމަށެވެ.
އަދި އެ ފޮތްތަކާ ގުޅިގެން އިތުރު ކުށެއް އެއްވެސް ފަރާތަކަށް ފާހަގަކުރެވިއްޖެނަމަ އެކަން މިނިސްޓްރީގެ ސަމާލުކަމަށް ގެނައުމަށް curriculum@nie.gov.mv އަށް އީމެއިލް ކުރުމަށް އެ މިނިސްޓްރީން އެދެ އެވެ.
ސްކޫލްތަކުގައި ކިޔަވައިދިނުމަށް ބޭނުން ކުރާ ގުރުއާނާއި އިސްލާމް ފޮތްތަކުގައި ކުށް ގިނަވުމުގެ މައްސަލަ ބޮޑުވެ އެ ދެ މާއްދާގެ ފޮތްތައް ރިވިއު ކުރަން އެޑިއުކޭޝަން މިނިސްޓްރީން ފެށީ މިދިޔަ އާދިއްތަ ދުވަހު އެވެ.
އެގޮތުން ގްރޭޑް އެކެއް ގެ ގުރުއާން ފޮތުގައި ލިޔެފައިވާ ދެ ސޫރަތެއް މަސްހުނި ވެފައި އޮތް މައްސަލައަކާއި ގްރޭޑް 12 ގެ އިސްލާމް ފޮތުގައި އާޔަތެއް ނުބައިކޮށް ލިޔެފައިވާ މައްސަލައެއް ވަނީ ފެންމަތިވެފަ އެވެ. އަދި އޭގެ ފަހުން ގްރޭޑް 11 ގެ އިސްލާމް މައްދާގެ ފޮތުގައި ވެސް އާޔަތެއް ނުބައިކޮށް ލިޔެފައިވާ މައްސަލައެެއް ވެސް ވަނީ ފާހަގަ ކުރެވިފަ އެވެ.
އެޑިއުކޭޝަން މިނިސްޓްރީން ވަނީ ގްރޭޑް އެކެއްގެ ފޮތް ފިޔަވައި ދެން ހުރި ހުރިހާ ފޮތެއްގަވެސް ހުރި ކުށަކީ 2015 ވަނަ އަހަރުން ފެށިގެން ހުރި ކުށްތަކެއްކަމަށް ބުނެފަ އެވެ. އެކަމާ ގުޅިގެން އޭރުގެ އެޑިއުކޭޝަން މިނިސްޓަރު ޑރ. އައިޝަތު ޝިހާމް، އަދި އިސްލާމިކް މިނިސްޓްރީން ފޮތްތައް ރިވިއު ކުރިއިރު މިނިސްޓަރުގެ މަގާމުގައި ހުންނެވި ޑރ. އަހުމަދު ޒިޔާދު ބާގިރުގެ ފަރާތުން ބަހެއް ލިބޭ ގޮތް ވަނީ ނުވެފަ އެވެ.
