ގައުމީ 23 އަހަރުން ދަށުގެ ޓީމުން މިހާރު ޅ އަތޮޅުގައި ޓްރެއިނިން ކޭމްޕެއް ފުރިހަމަކުރަމުން އަންނައިރު، މިހާތަނަށް ކުޅުނު ތިން މެޗުގައި ޖުމްލަކޮށް ސްކޮޑުގައި ހިމެނޭ 30 ކުޅުންތެރިން ޓެސްޓް ކުރަން މަސައްކަތްތަކެއް ކޮށްފައިވާނެ ކަމަށާއި ކުރިއަށް ހުރި މެޗުތަކުގައި އޭގެ ނަތީޖާ އަށް އުއްމީދުކުރާ ކަމަށް ޒުވާން ގައުމީ ޓީމުގެ އެސިސްޓަންޓަކަށް ހުރި ކޯޗު ސޮބާހު މުހައްމަދު (ސޮބާ) ބުނެފި އެވެ.
ޖުމްލަ ހަ މެޗެއް ޅ އަތޮޅު ކޭމްޕްގައި ގައުމީ ޓީމުން ކުޅޭނެ އެވެ. އޭގެ ތެރެއިން ނައިފަރު ޓާފް ސްޓޭޑިއަމްގައި ކުޅޭ ތިން މެޗު ވަނީ ނިމިފަ އެވެ. ފުރަތަމަ މެޗުގައި ޅ. ނައިފަރާއި ދެކޮޅަށް އަދި ދެ ވަނަ މެޗުގައި ނ. ހޮޅުދޫއާ ދެކޮޅަށް ކުޅުނު މެޗު ނިމުނީ 1-1 އިން އެއްވަރު ވެގެންނެވެ. އިއްޔެ، ނ. ކުޑަފަރީ ޓީމާ ދެކޮޅަށް ކުޅުނު މެޗުން ޒުވާން ޓީމު މޮޅުވީ 8-3 އިންނެވެ.
ފުރަތަމަ ތިން މެޗާ ބެހޭގޮތުން ވާހަކަ ދައްކަމުން ސޮބާ، މިއަދު "އަދަދު" އަށް ބުނީ ޒުވާން ގައުމީ ޓީމުން ޅ. އަތޮޅުގެ ޓްރެއިނިން ކޭމްޕް ގެންދަނީ ވެސް ފަރިތަކުރުން ފަށައިގެން އޭގެ އެއްބައިގެ ގޮތުގައި ކަމަށެވެ. އެ ގޮތުން މާލޭގައި ސިލެކްޝަނެއް ކުރިއަށް ގެންގޮސް ތިން ޕްރެކްޓިސް ކުުރުމަށް ފަހު ޅ. އަތޮޅު ކޭމްޕަށް އައީ ޓްރެއިނިން ފަށައިގެން މާގިނަ ދުވަހެއް ނުވެ، ޓީމު އެކުލަވާލުމުގެ މަސައްކަތަށް ކޭމްޕްގެ މެޗުތައް ބޭނުންކުރަން ކަމަށް ސޮބާ ވަނީ ފާހަގަކޮށްފަ އެވެ.
"ފުރަތަމަ ދެ މެޗުގައި ސްކޮޑުގައި މިތިބި 30 ކުޅުންތެރިން ބޭނުން ކޮށް ރޮޓޭޓްކުރެވޭތޯ ބެލީ. ނޫނީ މެޗު މާހައުލުގައި ޓެސްޓް ކުރެވޭނެ ގޮތްތަކެއް ބަލައިގެން ރޭވުމެއްގެ ތެރެއިން ދިޔައީ. އެއީ ކޮންމެ ގޮތެއް ވިޔަސް ކޮންމެ ދުވަހެއްގައި މެޗު ކުޅޭއިރު އެއް 11 ކުޅުންތެރިންނެއް ނޭރުވޭނެ. ފިޒިކަލީ އެ ވަރުގެ ބުރައެއް ދިނުމަށް ވުރެ ހުރިހާ ކުޅުންތެރިންނަށް ފުރުސަތު ދެވޭތޯ މަަސައްކަތްކުރީ. އެކަން ކުރެވުނު،" ސޮބާ ބުންޏެވެ.
"އެކަމަކު ހަމައެކަނި ޗާންސް ދީގެން ވެސް މީގެ ފަރުޖައްސާލެވެން ނެތް. އެބަޖެހޭ ކުޅުންތެރިންނަށް އެދޭ ފުރުސަތުތަކުގެ ނަތީޖާ ވެސް ފެންނަން. އެއީ ގައުމީ ޓީމަށް ކުޅުމަކީ އެހާ ފަސޭހަކަމެއް ގޮތުގައި ދެކިގެން ނުވާނެ. ގައުމީ ޓީމަށް ކުޅެލަން ލިބޭ އެންމެ މިނިޓެއް ވިޔަސް އެބަޖެހޭ 200 ޕަސެންޓް ކޮމިޓްމަންޓް ދޭން. ގައުމީ ކަމެއް މިއީ،"
ސޮބާ ބުނީ ފުރަތަމަ ދެ މެޗުގައި ހިނގާދިޔަ ކަންކަމަށް ބަލައި އިއްޔެ ކުޑަފަރިއާ ދެކޮޅަށް ކުޅެން ނުކުތީ ނަތީޖާ ނެރުން ވެސް އެއީ މިހާރު މި އޮތް ހިސާބުން މުހިއްމު ކަމެއް ކަމަށް ދެކިގެން ކަމަށެވެ. އިއްޔެ ޒުވާން ގައުމީ ޓީމުން ވާދަކުރި ކުޑަފަރި ޓީމަކީ ހަމައެކަނި އެ ރަށަށް ނިސްބަތްވާ ޓީމެއް ނޫން ކަމަށާއި ނ. އަތޮޅުގެ ދެތިން ރަށެއްގެ ކުޅުންތެރިންނާ އެއްކޮށް އޮތް ޓީމެއް ކަން ސޮބާ ވަނީ ފާހަގަކޮށްފަ އެވެ.
"ހަގީގަތުގައި މީގެ އެބަތިބި މި ވަގުތު ވެސް ސީނިއާ ޓީމަށް އަރާނެ ފެންވަރުގެ ފޯކަސް ބަހައްޓައިގެން މޮޅަށް ކުޅޭނެ ކުޅުންތެރިން. އެ ކުޅުންތެރިންނަށް އިއްޔެގެ މެޗުގެ ކުރިން ވިސްނައިިދިނިން ޕްރެކްޓިސް މެޗެއް ވިޔަސް ލީޑުކޮށްގެން މި ހިސާބުން ހުރިހާ ކަމެއް ރަނގަޅަށް ގެންދަން، އެ ވިސްނުމަށް ބަލާއިރު ރަނގަޅު ފެށުމެއް އެއީ،" ސޮބާ ބުންޏެވެ.
ޓްރެއިނިން ކޭމްޕުން ފާހަގަކުރެވޭ ކުޅުންތެރިންނަށް ގައުމީ ޓީމުން ފުރުސަތު ދޭނެ ކަމަށް ސޮބާ ވަނީ މީގެ ކުރިން ބުނެފަ އެވެ. ސޮބާ ބުނީ އެ ގޮތަށް ފާހަގަކުރެވޭ ކުޅުންތެރިންނާ ވާހަކަ ދައްކަމުން އަންނަ ކަމަށާއި ޓްރެއިނިން ކޭމްޕަށް ފަހު ސްކޮޑުން ބަދަލުތަކެއް ފެންނާނެ ކަމަށެވެ.
"ހަމައެކަނި ގައުމީ ޓީމުގައި ހިމެނުމެއް ނޫން މި އޮތީ. ޓާގެޓަށް ދާން މަގާމަށް ފައިޓްކުރަން ވެސް ޖެހޭނެ. އެހެން މަަސައްކަތް ކޮށްގެން ވަރަށް ރަނގަޅު ޓީމެއް ހެދެން އޮތީ. އެންމެ ރަނގަޅަށް މަސައްކަތް ކުރާ ޓީމެއް ލައިގެން. އެކަން ކުރެވޭނެ،" ސޮބާ ބުންޏެވެ.
ސޮބާ ބުނީ ގައުމީ ޒުވާން ޓީމު ލީޑުކުރަން ހުރި ކުޅުންތެރިންނަށް ބަލާއިރު، އަބްދުﷲ ޔާމީން (ޔާން)، މުހައްމަދު ޖައިލަމް (އޮގީ)، އަހުޝަމް މޫސާ (ތިއްތޭ)، ޒައިން ޒަފަރު އަދި ހުސެއިން ފައިސަލް (ފައިޓޯ) ފަދަ ކުޅުންތެރިންނަށް ސީނިއާ ލެވަލްގައި ވެސް ރަނގަޅު ކުޅުމެއް ދެއްކިދާނެ ކަމަށެވެ. މި ވަގުތު ސީނިއާ ޓީމުން ޒުވާން ޓީމަށް އަންނަން ތިބި ކުޅުންތެރިންނަށް ބަލާއިރު، ހަސަން ނަޒީމް (ޗޯޓު)، ކީޕަރު ނާޖިހު އަލީ (ނާޖީ) އާއި ހައިޝަމް ހަސަން (ބިޑި) ހިމެނެ އެވެ.
ޒުވާން ގައުމީ ޓީމު ވަރުގަަދަ ކުރަން ޓީމުގެ ހުރިހާ މަގާމެއްގައި ވެސް ތަފާތު ދައްކާ ނަމަ ސޮބާގެ ނަޒަރުގައި އަދިވެސް ވަރުގަދަ ކުޅުންތެރިންތަކެއް ބޭނުން ވެ އެވެ. އެއީ ބެންޗުން ވެސް އަރަން ޖެހޭނީ ރަނގަޅު ލެވަލްގެ ކުޅުންތެރިން ކަމަށްވާތީ އެވެ.
"އެއީ ބޮޑު ޓާގެޓެއްގައި މަސައްކަތް ކުރެވޭނީ ރަނގަޅު ބެންޗެއް ވެސް އޮވެގެން. އަދި ރަނގަޅު ލެވަލްގެ ފަސް ވަރަކަށް ކުޅުންތެރިން އެބަ ބޭނުންވޭ،" ސޮބާ ބުންޏެވެ.
ސޮބާ ވަނީ ފުރަތަމަ ތިން މެޗު ކުޅުނު ނައިފަރުގައި ހޭދަވި މުއްދަތުގެ ތެރޭގައި އެ ރަށުގެ ފަރާތުން ދޭ ހިދުމަތަށް ޝުކުރު އަދާކޮށްފަ އެވެ. އަދި ނައިފަރުން މި ފަހަރު ފެނުނު މަންޒަރުތަކަށް ބަލާއިރު، ކްލަބެއް ވެސް އެ ރަށަށް ގޮސް ޓްރެއިނިން ކޭމްޕެއް ފުރިހަމަ ކޮށްލެވޭނެ ފެންވަރު އެބަހުރިކަން ސޮބާ ވަނީ ފާހަގަކޮށްފަ އެވެ.
މިއަދަކީ ޒުވާން ގައުމީ ޓީމުގެ ރިކަވަރީ ދުވަހެކެވެ. ޓްރެއިނިން ކޭމްޕްގައި ބާކީ އޮތް ތިން މެޗު ފަށާނީ މާދަމާ އެވެ. ފުރަތަަމަ މެޗުގައި މާދަމާ ހަވީރު ޅ.ހިންނަވަރު ދަނޑުގައި އެ ޓީމާ ދެކޮޅަށް ކުޅޭނެ އެވެ. އެ އަށް ފަހު ދެން އޮތް ދެ ދުވަހު ކުޅޭނީ ރ. މީދޫ އާއި ޅ. ކުރެންދޫއާ ދެކޮޅަށެވެ.
