ސައޮ ޕައޮލޯ (ސެޕްޓެމްބަރު 7) - ބްރެޒިލްގެ ލެޖެންޑަރީ ފުޓްބޯޅަ ކުޅުންތެރިޔާ ޕެލޭ ގޮހޮރުން ޓިއުމަރެއް ނަގަން ކުރި އޮޕަރޭޝަނެއް ކާމިޔާބުކަމާ އެކު ނިންމާލެވުމުން ވަރަށް ބޮޑު ހިތްހަމަޖެހުމެއް ލިބިފައިވާ ކަމަށް ބުނެފި އެވެ.
އުމުރުން 80 އަހަރުގެ ޕެލޭ ސޯޝަލް މީޑިއާގައި އިއްޔެ ޕޯސްޓްކުރި މެސެޖެއްގައި ބުނެފައިވަނީ މިދިޔަ ހޮނިހިރު ދުވަހު ކުރި އޭނާގެ ގޮހޮރުގެ ބޮޑު އޮޕަރޭޝަން ނިންމާލެވުމުން އުފާކުރާ ކަމަށެވެ. އަދި މިހާރު ރިކަވަރީގެ ކަންތައްތައް ދަނީ ރަނގަޅަށް ކަމަށް ޕެލޭ ބުނެފައިވެ އެވެ.
"އަހަރެންގެ ނަސީބުގައި އަބަދުވެސް އޮންނަ ކަމެއް ތި އެންމެންނާ އެކީ ކާމިޔާބީ ފާހަގަކުރުމަކީ، މި މެޗަށް (އޮޕަރޭޝަނާއި ރިކަވަރީ) އަށް އަހަރެން ކުރިމަތިލަނީ ހިނިތުންވުމަކާ އެކީ. އުއްމީދާ އެކީ އުފަލުގައި ދިރިއުޅުމުގެ އަޒުމުގައި. މި މެޗުން ވެސް އަހަރެން މޮޅުވާނީ ސަޕޯޓަރުންނާ އެކީގައި،" ތިން ފަހަރު ފީފާ ވޯލްޑް ކަޕް ކާމިޔާބު ކުރުމުގެ ޝަރަފް ހޯދާފައިވާ ޕެލޭ ބުންޏެވެ.
2014 ވަނަ އަހަރު ބްރެޒިލްގައި ބޭއްވި ވޯލްޑް ކަޕްގެ ޕްރޮމޯޝަން އިވެންޓެއްގެ ތެރެއިން ޕެލޭ ވޯލްޑް ކަޕް ޓްރޮފީ ހިފައިގެން.
ޕެލޭ ވަނީ 2015 ވަނަ އަހަރު ވެސް ބޮޑު އޮޕަރޭޝަނެއް ކޮށްފަ އެވެ. އެ އަށް ފަހު އޭނާގެ ހާލަތު ގޯސްވާތީ އެކި ފަހަރު މަތިން ހޮސްޕިޓަލަށް ގެންގޮސް އެޑްމިޓްކޮށްގެން ވެސް ވަނީ ފަރުވާ ދީފަ އެވެ.
މީގެ ދެ އަހަރެއްހާ ދުވަސް ކުރިން ޕެލޭ އަށް ވަރަށް ބޮޑަށް ހިނގާ އުޅެން ދަތިވުމުގެ މައްސަލަތައް ދިމާވިއިރު، ގޮހޮރުގެ އެކި ބަލިތަކަށް ވަނީ ތަކުރާރުކޮށް ފަރުވާ ހޯދައިފަ އެވެ. އެންމެ ފަހުން މިހާރު މި ވަނީ ގޮހޮރުގެ ބޮޑު އޮޕަރޭޝަނެއް ނިންމާލައިފަ އެވެ. މީގެ ކުރިން ޔޫރިން އިންފެކްޝަނެއްގެ ސަބަބުން ވެސް ޕެލޭ އަށް ވަނީ ހޮސްޕިޓަލްގައި އެޑްމިޓްކޮށްގެން ފަރުވާދީފަ އެވެ.
ބްރެޒިލަށް އެންމެ ގިނަ ގޯލު ޖަހައިދިން ރެކޯޑް އޮތް ޕެލޭ އަކީ ފުޓްބޯޅައިގައި ވެސް ބޮޑު ރެކޯޑްތަކެއް މުގުރާލާފައިވާ ތަރިއެކެވެ. ޕެލޭ ވަނީ ބްރެޒިލް ޓީމަށް ކުޅެދިން 91 މެޗުން 77 ގޯލު ޖަަހައިފަ އެވެ.
ގިނިސް ވޯލްޑް ރެކޯޑްސް އިން އާންމުކޮށްފައިވާ ތަފާސްހިސާބުތަކަށް ބަލާއިރު، ކެރިއަރުގައި ކުޅުނު 1363 މެޗުން ޕެލޭ ވަނީ 1279 ގޯލު ޖަހައިފަ އެވެ. ތަފާތު ހަތަރު ވޯލްޑް ކަޕެއްގައި ލަނޑު ޖެހި މަދު ކުޅުންތެރިންގެ ތެރޭގައި ޕެލޭ ހިމެނެ އެވެ.
