ހަނޮއި، ވިއެންޓާމް (ސެޕްޓެމްބަރު 7) - ވިއެޓްނާމުގައި ކޮވިޑް ކޮންޓްރޯލް ކުރަން އަޅާފައިވާ ފިޔަވަޅުތަކާ ހިލާފުވެ، އެހެން މީހުންނަށް ވައިރަސް ފަތުރަމުން ދިޔަ މީހަކު ފަސް އަހަރަށް ޖަލަށް ހުކުމްކޮށްފި އެވެ.
ވިއެޓްނާމް ނިއުސް އެޖެންސީ (ވީއެންއޭ) އިން ރިޕޯޓް ކުރި ގޮތުގައި އުމުރުން 28 އަހަރުގެ ލެ ވަން ޓްރީ ގެ މައްޗަށް ސާބިތުވީ "ނުރައްކާތެރި ގައިން ގަޔަށް އަރާ ބައްޔެއް ފެތުރި" ކަމަށެވެ.
ކޮވިޑް ކޮންޓްރޯލް ކުރުމުގައި މިހާތަނަށް އެންމެ ކާމިޔާބު އެއް ގައުމަކީ ވިއެޓްނާމެވެ. އެ ގައުމުގައި އެއް ފަހަރާ ގިނަ ބަޔަކު ޓެސްޓު ކުރުމާއި، ކޮންޓެކްޓް ޓްރޭސް ކުރުމާއި، ހަރުކަށި ކަރަންޓީނު އަދި ބޯޑަރު ބެލެހެއްޓުމުގެ ފިޔަވަޅުތައް ދަނީ އަޅަމުންނެވެ.
ނަމަވެސް މިދިޔަ އޭޕްރިލް މަހުގެ ފަހުކޮޅުން ފެށިގެން ބަލީގެ އާ ކްލަސްޓާތައް ދަނީ ފެންނަމުންނެވެ.
"ޓްރީ ވަނީ ހޯ ޗީ މިން ސިޓީން ކާ މައު އަށް ދަތުރުކޮށް، 21 ދުވަހު ކަރަންޓީނުގައި ހުންނަން ޖެހޭ އުސޫލާ ހިލާފުވެފައި،" ވީއެންއޭ އިން ބުންޏެވެ.
"ޓްރީގެ ސަބަބުން އަށް މީހަކަށް ބަލި ޖެހުނު އިރު، އޭގެ ތެރެއިން އެކަކަށް އެއް މަސް ވަންދެން ފަރުވާ ކުރުމަށް ފަހު ވަނީ މަރުވެފައި."
ވިއެޓްނާމުގެ އެންމެ ދެކުނުގައި އޮންނަ ކާ މައު ޕްރޮވިންސުން މިހާތަނަށް ފެނިފައި ވަނީ މި ބަލީގެ އެންމެ 191 ކޭސް އެވެ. އޭގެ ތެރެއިން މަރުވީ ދެ މީހުންނެވެ. އެއާ ހިލާފަށް ހޯ ޗީ މިން ސިޓީން 260،000 ކޭސް ފެނިފައި ވާއިރު، 10،685 މީހުން މަރުވެފައި ވެ އެވެ.
މުޅި ވިއެޓްނާމުން މިހާތަނަށް ފެނުނީ 536،000 ކޭސް އެވެ. އަދި މަރުވެފައި ވަނީ 13،385 މީހުންނެވެ.
