ކ. އޮޅަހަލީގައި ހިންގި ލަކްސް* ނޯތު މާލެ ރިސޯޓް، ޖުމެއިރާ ގްރޫޕުން ރީބްރޭންޑުކުރުމަށް ފަހު، އަންނަ އޮކްޓޫބަރު މަހުގެ 1 ގައި ޖުމެއިރާ މޯލްޑިވްސްގެ ނަމުގައި ހުޅުވަން ތައްޔާރުވެއްޖެ އެވެ.
ޖުމެއިރާ މޯލްޑިވްސްއަކީ ރާއްޖޭގައި އެންމެ ތަފާތު ކޮންސެޕްޓަކަށް ތައްޔާރުކޮށްފައިވާ ބީޗް ވިލާތަކާއި އޯވާ-ވޯޓާ ވިލާތައް ހިމެނޭ ލަގްޒަރީ ރިސޯޓެކެވެ. ސިންގަޕޫރުގައި މައިޖާއިން ޑިޒައިންކޮށްފައިވާ މި ރިސޯޓު ޖުމެއިރާއިން ހުޅުވަނީ، މުޅި ކޮންސެޕްޓަށް ބަދަލު ނުގެނައި ނަމަވެސް، ޖުމެއިރާ ބްރޭންޑުގެ ފަރުމާތަކަށް ފައްތައިގެންނެވެ.
ޖުމެއިރާގޭ ސީއީއޯ ހޯސޭ ސިލްވާއާ ހަވާލާދީ ޔޫއޭއީގެ ހަލީޖް ޓައިމްސްގައި ރިޕޯޓްކޮށްފައިވާ ގޮތުގައި، މި ރިސޯޓުން ވެސް މެހެމާނުންނަށް ތަފާތު ތަޖުރިބާއެއް ކުރެވޭނެ ކަމަށެވެ. އަދި ފަރުމާގެ ގޮތުންނާއި ހިދުމަތުގެ ގޮތުން ބެލި ނަމަވެސް އުއްމީދުކުރާ ވަރަށް ވުރެ ފުރިހަމަ މެހެމާންދާރީއެއް އަދާކުރާނެ ރިސޯޓަކަށް ވެގެން ދާނެ ކަމަށް އޭނާ ވިދާޅުވި އެވެ.
މި ރިސޯޓުގައި ޖުމްލަ 67 ވިލާ ހުންނަ އިރު، އޭގެ ތެރޭގައި އެއް ކޮޓަރި އާއި ދެ ކޮޓަރި އަދި ތިން ކޮޓަރީގެ ވިލާތައް ހިމެނެ އެވެ. އާންމުކޮށް ހުންނަ ވަރަށް ވުރެ ޖާގަ ތަނަވަސްކޮށް ހަދާފައިވާ މިއިން ކޮންމެ ވިލާއެއްގައި އިންފިނިޓީ ޕޫލަކާއި ރޫފްޓޮޕް ޓެރަހެއް ހުރެ އެވެ. އަދި މަތީ ފަންތީގެ ރިސޯޓުތަކުން ލިބޭ ގިނަ އިން-ވިލާ ހިދުމަތްތައް ލިބެ އެވެ.
އާއިލާތަކާއި ގްރޫޕްތަކަށް އަމާޒުކޮށްގެން ފަރުމާކޮށްފައިވާ މި ރިސޯޓުން ލިބޭ އިތުރު ހިދުމަތްތަކުގެ ތެރޭގައި ވޯޓާ ސްޕްލޭޝް އޭރިއާ، ޕްލޭ އޭރިއާ، ޑައިވިން އަދި ވޯޓާސްޕޯޓްސް ހިމެނެ އެވެ. މީގެ އިތުރުން ބީޗް ސައިޑް ސިނަމާއަކާއި ދުނިޔޭގެ ފެންވަރުގެ ސްޕާއެއް ހުންނާނެ އެވެ. އަދި ޖުމެއިރާގެ މަޝްހޫރު "ކޭޓޯ" އަދި "ޝިމާސް" ރެސްޓޯރަންޓުތައް ހިމެނޭ ގޮތަށް ތިން ރެސްޓޯރަންޓާއި ކޮފީ ލައުންޖެއް ހުރެ އެވެ.
މިހާރު ޖުމެއިރާއިން ރާއްޖޭގައި އިތުރު ރިސޯޓެއް ނުހިންގި ނަމަވެސް މީގެ ކުރިން ޖުމެއިރާ ބްރޭންޑުގެ ދަށުން ރާއްޖޭގައި ދެ ރިސޯޓެއް ހިންގާފައި ވެ އެވެ. އެއީ ކ. ބޮލިފުށީގައި ހިންގި "ޖުމެއިރާ ވިޓަވެލި" (މިހާރު އޮޒެން ރިޒާވް ބޮލިފުށި) އާއި ގއ. މެރަދޫގައި ހިންގި "ޖުމެއިރާ ދެވަނަފުށި (މިހާރު ރެފްލްސް މެރަދޫ) އެވެ.
މީގެ ތެރެއިން މެރަދޫގެ މެނޭޖްމަންޓު 2017 ގައި އެމެރިކާގެ އެކޯ ހޮޓެލްސްއަށް ދޫކޮށްލާފައިވާއިރު، ޖުމެއިރާ ކުޑައިގެ ދަށުން ހިންގި ބޮލިފުށި އިންޑިއާގެ އެޓްމޮސްފިއާ ރިސޯޓްސްގެ ދަށަށް ބަދަލުވީ މިދިޔަ އަހަރު އެވެ.
