"އިނގިރޭސި ހައި ކޮމިޝަނަރަށް ކުޅުދުއްފުށީ ކުޅި ދައްކާލުމުގެ ފުރުސަތު ލިބުމަކީ ލިބުނު ނަސީބެއް. ކަމަނާ ތި ދެއްކެވީ ރަށަށް ޒިޔާރަތްކުރާ ޑިޕްލޮމޭޓުންނަށް މިސާލެއް،"
ކުޅުދުއްފުށީގެ ބިޔަ ކުޅީގެ މިހާރު ފެންނަން އޮތް ބައިގެ މެދަށް އޮންނަ ފެންގަނޑުގައި ހައި ކޮމިޝަނަރު ކެރޮން ރޮސްލާއާ އެކު ކެނޯ އެއް ދުއްވަން އިން ފޮޓޯއެއް ހިއްްސާކުރަމުން އެރަށަށް ނިސްބަތްވާ މަޝްހޫރު ތިމާވެށި އެކްޓިވިސްޓް އާދަމް އަބްދުﷲ ކުރި ޓުވީޓުގައި ފާޅުކުރީ، ހައިކޮމިޝަނަރުގެ ދަތުރާ އެކު ކުޅުދުއްފުއްޓަށް ލިބިފައި އޮތް އުފާވެރިކަމެވެ.
މަޝްހޫރު ތިމާވެށި އެކްޓިވިސްޓް، އާދަމް އަބްދުﷲ ކެރޮން އާއި އެކު ކުޅީގައި: އޭނާނ ވަނީ ކެރޮން އެރަށަށް ވަޑައިގެން ގެންގުޅުއްވާ ހިތްތިރި ކަމަށް ތައުރީފު ކުރައްވާފައި
އެފަދަ ބޭފުޅަކު ރަށަށް ވަޑައިގެން ހަމައެކަނި ރަސްމީ ވާހަކަފުޅެއްގައި ބައިވެރިވެލައްވާފައި ވަޑައިގެންނެވުމުގެ ބަދަލުގައި، ރަށުގެ ދިރިއުޅުމާއި ގުދުރަތީ ވެއްޓާއި ގުޅި މެހިލައިފައި ދިއުމުން ލިބޭ އުފާވެރިކަމެވެ. ދައްކައިލީ، ދެބައިކުޅަ އެއްބައި ފަނާވެފައި އޮތް އެ ސިޓީގެ ކުޅީގެ އަދި ވެސް ފަނޑު ނުވެ އޮތް ފެހި ކަމާއި ރީތި ކަމެވެ.
ކައުންސިލުގެ ރަސްމީ ދައުވަތެއްގައި ކުޅުދުއްފުއްޓަށް ކެރޮން ކުރައްވާ ދަތުރު، އާންމުކޮށް އެފަދަ ޑިޕްލޮމެޓުން ރަށްރަށަށް ކުރައްވާ ދަތުރުތަކާ އެތައް ގުނައެއް ތަފާތެވެ.
ކެރޮން ކައުންސިލުގެ މަލާފަތުގައި ބައިވެރިވެލައްވަނީ
ކެރޮން ވަނީ އާދައިގެ ހެދުމުގައި ކުޅި އަށް ގޮސް، ކުޅިން ތެމިލައިގެން އެތަނުގައި ކެނޯ ވެސް ދުއްވާފަ އެވެ. އަދި ރަށުގައި އަތްތެރި މަސައްކަތްކުރާ ބައެއް ގޭގެއަށް ގޮސް އެ ގެތަކުގެ މީހުންނާ އެކު ވަގުތު ހޭދަކޮށް، އެ މަސައްކަތްތައް އަމިއްލަ އަށް ތަޖުރިބާކުރައްވަވާފަ އެވެ. އެރަށުގެ ޒުވާން ޖަމިއްޔާ ތަކާ އެކު ކޭންތަކުގައި ބައިވެރިވި އެވެ.
އެންމެ ހާއްސައީ ސިޓީގެ ކައުންސިލުން އެކަމަނާ އަށް ދެއްވި "މަލާފަތު" ގައި ދިވެހި ލިބާހާ އެކު ކެރޮން ހުންނަވަނިކޮށް ނަގާފައިވާ ފޮޓޯތަކެވެ.
ކައުންސިލުން ބުނީ، ހައި ކޮމިޝަނާ ކެރޮން އާ އެކު ކައުންސިލުން ބޭއްވި ބައްދަލުވުމުގައި ލާމަރުކަޒީ ނިޒާމާ ގުޅޭ ވާހަކަތަކާއި ރަށުގެ ތިމާވެއްޓާއި އެނޫންވެސް އެ ސިޓީގެ އެތައް ބައިވަރު ކަންކަމާ ބެހޭ ގޮތުން ވާހަކަ ދެކެވި ހިޔާލުބަދަލުކުރެވުނު ކަމަށެވެ. އެހެންކަމުން ކައުންސިލުން ދިން ދައުވަތު ގަބޫލުކުރައްވައި ރަށަށް ވަޑައިގެން، ކެރޮން ކުޅުދުއްފުއްޓަށް ގެންނެވީ މުޅި ސިޓީ ބަލައިގަންނަ ވަރުގެ އުފާވެރިކަމެކެވެ.
ކެރޮންގެ މި ދަތުރުގައި މިރޭގެ ވަގުތެއްގައި ހަނިމާދޫ އަށް ވެސް ވަޑައިގަންނަވާނެ އެވެ. ހަނިމާދޫ އަށް ވަޑައިގެން އެރަށުގައި ވެސް ތަފާތު ތަޖުރިބާތަކެއް ކުރައްވާނެ އެވެ.
