އަންނަ މަހު ސާފް ޗެމްޕިއަންޝިޕާ ކުރިމަތިލާއިރު އިންޑިއާ އަށް ޕްރެޝަރެއް އޮތްތޯ ކުރި ސުވާލަށް އިންޑިއާގެ ކޯޗު ކްރޮއޭޝިއާގެ އީގޯ ސްޓިމަކް ފިނި ޖަވާބެއް ދީފި އެވެ.
އިންޑިއާ އިން ވަނީ ސާފް ޗެމްޕިއަންޝިޕަށް ތައްޔާރުވާން ނޭޕާލާ ދެކޮޅަށް ދެ މެޗެއް ކުޅެފަ އެވެ. ކަތުމަންޑޫގެ ދަސްރަތު ސްޓޭޑިއަމްގައި ކުޅުނު ފުރަތަމަ މެޗުގައި މިދިޔަ ބުރާސްފަތި ދުވަހު ވަނީ 1-1 އިން އެއްވަރުވެފަ އެވެ. އިއްޔެ ކުޅުނު ދެ ވަނަ މެޗުން އިންޑިއާ މޮޅުވީ 2-1 އިންނެވެ. ސުނިލް ޗެތުރީ އާއި ފާރޫކް ޗޯދުރީ އިންޑިއާ އަށް ދެ ގޯލުގެ ލީޑެއް ނަގައިދީފައިވަނިކޮށް ނޭޕާލްގެ ގޯލު ޖެހީ އޭރިއާ ބޭރުން ފޮނުވާލި ބާރު ޝޮޓަކުން ތޭޖު ތަމަންގް އެވެ.
މި ފަހަރުގެ ސާފް ޗެމްޕިއަންޝިޕަށް އިންޑިއާ އިން ސީިނިއާ ޓީމެއް ފޮނުވަން ނިންމި އެންމެ ބޮޑު އެއް ސަބަބަކީ ދާދި ފަހުން ނިމުނު ފީފާ ވޯލްޑް ކަޕް ކޮލިފައިންގައި އެ ޓީމުން ބޭނުންވި ނަތީޖާ ނުނެރެވޭތީ އާއި ކުރިއަށް އޮތް އޭޝިއަން ކަޕް ކޮލިފައިންގެ ކުރިން ރަނގަޅު ވާދަވެރި މެޗުތަކެއް ކުޅުމަށެވެ.
އިންޑިއާ މީޑިއާތަކުން ތުހުމަތުކުރާ ގޮތުގައި ސާފް ޗެމްޕިއަންޝިޕަށް ސީނިއާ ޓީމެއް ފޮނުވަން އިންޑިއާ އިން ނިންމި އެންމެ ބޮޑު ސަބަބަކީ ސްޓިމަކަށް އޮތް ޕްރެޝަރު ކަޑުވާލުމަށެވެ. ސްޓިމަކް މަގާމުން ދުރުކުރަން އިންޑިއާގެ ގިނަ ފުޓްބޯޅަ ސަޕޯޓަރުން އަންނަނީ އަޑުއުފުލަމުންނެވެ.
ނޭޕާލާ ދެކޮޅަށް އިއްޔެ ކުޅުނު މެޗަށް ފަހު ސްޓިމަކް ގާތުގައި އިންޑިއާ އަށް ޕްރެޝަރެއް އެބައޮތްތޯ ސުވާލުކުރުމުން އޭނާ ބުނީ އިންޑިއާ އަކީ ސަރަހައްދުގެ ޗެމްޕިއަންކަން ގިނަ ފަހަރުތަކެއް ހޯދާފައިވާ ޓީމަށް ވާތީ އެ ޕްރެޝަރު އެބައޮތް ކަމަށެވެ.
"ޔަގީނުން ވެސް އަހަރެމެންގެ ފެންވަރުގައި ކުޅެން ބޭނުންނަމަ މިހާރަށް ވުރެ ރަނގަޅަށް ކުޅެން އެބަޖެހޭ. އެކަން އަހަރެން ކުރާނަން ކުރިއަށް އޮތް މުބާރާތުގައި (ސާފް ޗެމްޕިއަންޝިޕްގައި) ވެސް. ޕްރެޝަރަކީ ފުޓްބޯޅައިގައި ކޮންމެވެސް ސިފައެއްގައި އަބަދުވެސް އޮންނާނެ ކަމެއް،" ސްޓިމަކް ބުންޏެވެ.
އޭނާ އަށް އޮތް ޕްރެޝަރާ ބެހޭގޮތުން ސްޓިމަކް އިތުރަށް ވާހަކަ ދައްކަން ބޭނުމެއް ނުވި އެވެ.
ނޭޕާލްގެ ތަމަންގް (ކ) ކައިރިން އިންޑިއާގެ ޗެތުރީ ބޯޅަ ހިފައިގެންދަނީ.-- ފޮޓޯ: އޭއެފްޕީ
ނޭޕާލްގެ ކޯޗު ކުވޭތުގެ އަބްދުﷲ އަލްމުތައިރީ ބުނީ އިއްޔެގެ މެޗަށް ނުކުތްއިރު އިންޑިއާ އޮތީ ވަރަށް ބޮޑަށް މޯޓިވޭޓްވެފައި ކަމަށެވެ. އޭގެ ސަބަބަކީ ސޯޝަލް މީޑިއާ އިން އިންޑިއާ އަށް ކުރިމަތިވަމުން އައި ފާޑުކިޔުންތަކާއި ޕްރެޝަރުގެ ސަބަބުން ކަން މުތައިރީ ފާހަގަކުރި އެވެ.
"އިންޑިއާ ފުޓްބޯޅައާ ބެހޭގޮތުން ވަރަށް ވަރުގަދަ ހޭޝްޓެގަކާ އެކު މެޗުގެ ކުރިން ކަންކަން ޓްރެންޑްވި. އެއީ ހަގީގަތުގައި މެޗަށް އެ މީހުން އެ (ތަފާތު) ރޫހުގައި ނުކުތް ސަބަބު،" އިންޑިއާގެ ކޯޗު ސްޓިމަކް ވަކިކުރަން އެ ގައުމުގެ ފުޓްބޯޅަ ސަޕޯޓަރުން ސޯޝަލް މީޑިއާގައި ކުރަމުންދާ ކެމްޕެއިނަށް އިޝާރާތްކޮށް މުތައިރީ ބުންޏެވެ.
މުތައިރީ ބުނީ ނޭޕާލް އިއްޔެ ކުޅުނު މެޗުން ބަލިވި ކަމުގައި ވިޔަސް މެޗަށް ނުކުމެ، އެ ޓީމުން ރޭވި ގޮތަށް ރަނގަޅަށް ކުޅުނު ކަމަށާއި ފުރަތަމަ ގޯލެއް ޖެހުނުނަމަ ޕްލޭނާ އެއްގޮތަށް ހުރިހާ ކަމެއް ދިއުމުގެ ފުރުސަތު ބޮޑުވާނެ ކަމަށެވެ.
މެޗުން ބަލިވި ކަމުގައި ވިޔަސް އެއީ މާ ބޮޑު ކަމަކަށް ހަދައިގެން ނޫޅޭނެ ކަމަށާއި މި މެޗުގައި ފެނުނު ޕޮޒިޓިވް ކަންތައްތަކަށް ބަލައި ޓީމު އިތުރަށް މަސައްކަތް ކުރާނެ ކަމަށް މުތައިރީ ބުންޏެވެ.
"އެކުވެރިކަމުގެ މެޗުތަކުގެ ނަތީޖާ އަށް އަހަންނެއް ނުބަލަން. މާދަމާ (މިއަދު) އަހަރެން ހޭލާއިރު ވިސްނުމުގައި އޮންނާނެ ކަމަކީ އަހަރެންނާ އެކު ސާފް ޗެމްޕިއަންޝިޕަށް ތައްޔާރުވާން ވަރަށް ވަރުގަދަ ރޫހެއްގައި ތިބި 25 ކުޅުންތެރިން ތިބިކަން،" މުތައިރީ ބުންޏެވެ.
ސާފް ޗެމްޕިއަންޝިޕްގެ ފުރަތަމަ މެޗުގައި ނޭޕާލް ނުކުންނާނީ އަންނަ މަހުގެ އެއް ވަނަ ދުވަހު ރާއްޖެއާ ދެކޮޅަށެވެ. ސާފް ޗެމްޕިއަންޝިޕް ހަތް ފަހަރު ކާމިޔާބުކޮށްފައިވާ އިންޑިއާ އިން މި ފަހަރުގެ މުބާރާތުގައި ކުޅޭ ފުރަތަަމަ މެޗުގައި އަންނަ މަހު ހަތަރު ވަނަ ދުވަހު ކުޅޭނީ ބަންގްލަދޭޝްއާ ދެކޮޅަށެވެ. ކިރްގިސްތާންގައި ކުޅޭ ތުރީ ނޭޝަންސް ކަޕްގައި އިއްޔެ ބަންގްލަދޭޝް ވަނީ 2-0 އިން ފަލަސްތީން އަތުން ބަލިވެފަ އެވެ.
