ޑުބާއީ، ޔޫއޭއީ (ސެޕްޓެމްބަރު 5) - ޔޫއޭއީގެ އިގްތިސާދު ކުރިއެރުވުމުގެ ގޮތުން ބިދޭސީ މަސައްކަތްތެރިންނަށް ބޮޑު ލުޔެއް ލިބޭ މުޅިން އާ ވިސާއެއް ތައާރަފުކޮށްފި އެވެ.
ޔޫއޭއީގައި ދިގު މުއްދަތަށް މަޑު ކުރުމަށް ރެޒިޑެންސީ ވިސާ ހޯދުމަކީ އުނދަގޫ ކަމެކެވެ. އަދި ބިދޭސީންނަށް ޔޫއޭއީގައި މަސައްކަތް ކުރެވެނީ ވަޒީފާ ދޭ ފަރާތަކުން ސްޕޮންސާ ކުރުމުންނެވެ.
ނަމަވެސް އަލަށް ތައާރަފު ކުރި "ގްރީން ވިސާ" ގެ ދަށުން ވަޒީފާ ދޭ ފަރާތަކުން ސްޕޮންސާ ނުކުރި ނަމަވެސް ޔޫއޭއީގައި މަސައްކަތް ކުރެވޭނެ އެވެ.
އަދި "ގްރީން ވިސާ" އޮތް ފަރާތްތަކުގެ މައިންބަފައިންނަށް ވެސް ޔޫއޭއީގައި މަޑު ކުރެވޭނެ އެވެ. އޭގެ އިތުރުން އެ މީހުން ދަރިންނަށް ވެސް އުމުރުން 25 އަހަރު ވަންދެން ޔޫއޭއީގައި އުޅެވޭނެ އެވެ.
"މި ވިސާ ހާއްސަ ވަނީ ހުނަރުވެރި ފަރުދުންނަށާއި، އިންވެސްޓަރުންނާއި، ވިޔަފާރިވެރިންނާއި، ކިޔެވުމަށް މޮޅު ދަރިވަރުންނަށް،" މިނިސްޓާ އޮފް ސްޓޭޓް ފޯ ފޮރިން ޓްރޭޑް ސާނީ އަލް ޒެޔޫދީ ވިދާޅުވި އެވެ.
ގަލްފުގެ ގައުމުތަކުން އަންނަނީ ތެލަށް ބަރޯސާވުން ކުޑަކޮށް، އެހެން ގޮތް ގޮތުން އިގްތިސާދު ފުޅާކުރެވޭތޯ މަސައްކަތް ކުރަމުންނެވެ.
ކޮވިޑުގެ ބަލިމަޑުކަމާ ހެދި ޔޫއޭއީގެ ފަތުރުވެރިކަމާއި ވިޔަފާރި އަށް އަސަރުކޮށްފައި ވާއިރު، ތެލުގެ އަގު ވެއްޓެން ފެށުމުން ވެސް އިގްތިސާދު އޮތީ ހީނަރުވެފަ އެވެ.
ދެހާސް ނަވާރަ ވަނަ އަހަރު ތައާރަފު ކުރި "ގޯލްޑަން ވިސާ" އަކީ މުއްސަނދި އިންވެސްޓަރުންނާއި، ހުނަރުވެރި މަސައްކަތްތެރިންނަށް ހާއްސަކޮށް ފެށި ފުރަތަމަ ސްކީމެވެ.
ޔޫއޭއީގެ އިތުރުން ތެލަށް ބަރޯސާވެފައިވާ ސައުދީ އަރަބިއްޔާ އަދި ގަތަރު ފަދަ ގައުމުތަކުން ވެސް ވަނީ އިންވެސްޓަރުންނާޢި ހުނަރުވެރި މަސައްކަތްތެރިންނަށް ހާއްސަ ސްކީމްތައް ފަށާފަ އެވެ.
އެގޮތުން 2019 ވަނަ އަހަރުގެ ޖޫން މަހު ސައުދީ އަރަބިއްޔާ އިން ބުނީ 213،000 އެމެރިކާ ޑޮލަރު ދެއްކުމުން ދާއިމަށް އެ ގައުމުގައި އުޅެވޭނެ ކަމަށެވެ.
އޭގެ އިތުރުން އަހަރުން އަހަރަށް އާ ކުރެވޭ ރެޒިޑެންސީ ސްކީމެއް ވެސް ތައާރަފު ކުރި އެވެ. އެފަދަ ވިސާގެ ސަބަބުން ބިދޭސީންނަށް ސައުދީގައި އިންވެސްޓުކޮށް، ވިޔަފާރި ފުޅާކޮށް، ސައުދީ ސްޕޮންސަރެއް ނެތި މުދާ ގަނެވެ އެވެ.
ގަތަރުގެ ދޯހާއިން ފެށި ސްކީމުގެ ދަށުން ގެ އާއި ފިހާރަ ފަދަ ޕްރޮޕަޓީ ގަންނަ ބިދޭސީންނަށް ދިގު މުއްދަތަށް ނުވަތަ ދާއިމަށް ވިސާ ލިބެ އެވެ.
ޔޫއޭއީގެ އާބާދީގެ 10 މިލިއަން މީހުންގެ ތެރެއިން 90 ޕަސެންޓަކީ ބިދޭސީންނެވެ. އަރަބި ގައުމުތަކުގެ ތެރެއިން ސައުދީ އަރަބިއްޔާ އަށް ފަހު އެންމެ ބޮޑު އިގްތިސާދެއް އޮންނަނީ ޔޫއޭއީގަ އެވެ.
