ގައުމީ 23 އަހަރުން ދަށުގެ ޓީމުން މިއަދު އަށް ވަރަކަށް ދުވަހުގެ ޓްރެެއިނިން ކޭމްޕަކަށް ޅ. އަތޮޅަށް ފުރިއިރު، މި ކޭމްޕްގެ ތެރެއިން ގިނަ ކަންތައްތަކެއް ހާސިލްކުރެވޭނެ ކަމަށާއި ފާހަގަކޮށްލެވޭ ކުޅުންތެރިއަކު ފެނިއްޖެނަމަ ޓީމުން ފުރުސަތު ދޭނެ ކަމަށް ޒުވާން ގައުމީ ޓީމުގެ އެސިސްޓަންޓް ކޯޗު ސޮބާހު މުހައްމަދު (ސޮބާ) ބުނެފި އެވެ.
ޓްރެއިނިން ކޭމްޕް ކުރިއަށް ގެންދަން ނިންމާފައިވަނީ މިއަދުން ފެށިގެން މި މަހު 12 ވަނަ ދުވަހާ ހަމައަށެވެ. ޓްރެއިނިން ކޭމްޕްގައި ޒުވާން ޓީމު މަޑުކުރާނީ ޅ. ނައިފަރާއި ހިންނަވަރުގަ އެވެ. މި ދެ ރަށުގެ ޓީމާ ކުޅުމުގެ އިތުރުން ދެން ގައުމީ ޓީމު ކުޅެން ރާވާފައިވަނީ ނ. ކުޑަަފަރީ، ނ. ހޮޅުދޫ އަދި ރ. މީދޫ ޓީމާ ދެކޮޅަށެެވެ.
ޒުވާން ޓީމަށް ކުޅުންތެރިން ނަގަން ގާތްގަނޑަކަށް ސާޅީހަކަށް ކުޅުންތެރިންގެ މެދުގައި ތިން ދުވަހުގެ މުއްދަތަށް ޓްރަޔަލްތަކެއް ކުރިއަށް ގެންދިޔައީ ދެ އެސިސްޓަންޓް ކޯޗުން ކަމަށްވާ ސޮބާ އާއި މުހައްމަދު ޝާހިދު (ޝާޑު) ބެލުމުގެ ދަށުންނެވެ.
ތޭވީސް އަހަރުން ދަށުގެ ހެޑް ކޯޗަކަށް ހުރީ ސީނިއާ ޓީމާ ވެސް މި ވަގުތު ހަވާލުވެ ހުރި ތަޖުރިބާކާރު ކޯޗު އަލީ ސުޒޭން އެވެ. ސުޒޭން މި ވަގުތު ހުސްވެ ހުރީ ސީނިއާ ޓީމުގެ ފަރިތަކުރުންތަކަށެވެ. އެއީ އަންނަ މަހުގެ 1-16 އަށް މާލޭގައި ބާއްވާ ސާފް ޗެމްޕިއަންޝިޕް އަށެވެ.
ޓްރެއިނިން ކޭމްޕަށް ފުރުމުގެ ކުރިން "އަދަދު" އަށް ސޮބާ ބުނީ އުނދަގޫ ހާލަތެއްގައި ފުޓްބޯޅަ އޮއްވައި ޔޫތު ޓީމު ކަމަށް ބުންޏަސް ހަގީގަތަކީ މި ޓީމަކީ މުސްތަގުބަލުގައި ސީނިއާ ޓީމުގައި ވެސް ތިބޭނެ އަދި މިހާރު ވެސް ތިބި ކުޅުންތެރިން ކަމަށެެވެ.
"މި ދަތުރުގެ އެންމެ މުހިއްމު ކަމަކީ ހަގީގަތުގައި ޓީމުގެ މި އިން އެއް ކުއްޖެއް އަނެއް ކުއްޖެއްގެ ރިލޭޝަންޝިޕް ރަނގަޅު ކުރުމާއި މެޗުތަކެއް ކުޅެގެން ކުޅުންތެރިންތައް ބޮޑަށް މެޗު ސިޓުއޭޝަން އަށް ހޭނޭގޮތަށް ޓީމު ސެލެކެޓް ކުރުމުގައި ކަންކަން ކުރުން،" ނިއު ރޭޑިއަންޓާއި ވެލެންސިއާ އަދި ކްލަބް ގްރީން ސްޓްރީޓްސް އަށް ފުރަތަމަ ޑިވިޝަނުގައި ކޯޗުކޮށްދިން ސޮބާ ބުންޏެވެ.
ސޮބާ ބުނީ ޓްރެއިނިން ކޭމްޕަކަށް މިހާރު ދިޔަ ކަމުގައި ވިޔަސް މިއީ އަދި ޓީމު ފައިނަލްވުމެއް ނޫން ކަމަށާއި ރަށްރަށުން ފާހަގަކޮށްލެވޭ ކުޅުންތެރިއަކު ޓީމުން ޖާގަ ހައްގުވާވަރުގެ ކުޅުމެއް ދައްކައިފިނަމަ އެ ކުޅުންތެރިއަކަށް ވެސް ފުރުސަތު ދޭނެ ކަމަށެވެ.
"މިއީ އަދި ޓީމު ފައިނަލްވީއެއް ނޫން. މި ޓްރެއިނިން ތަކުގައި ރަށްރަށުން ރަނގަޅު ކުއްޖެއް ފެނިއްޖިއްޔާ ފުރުސަތު ހަމަ ކޮންމެ ކުއްޖަކަށް ވެސް އޮންނާނެ. މިއީ ރާއްޖޭގެ ނެޝަނަލް ޓީމު. މިިއީ ހަަމައެކަނި މާލެ އިން ހޮވާލާ ޓީމެއް ނޫން،" ސޮބާ ބުންޏެވެ.
ޅ. އަތޮޅު ޓްރެއިނިން ކޭމްޕަށް ފުރި 30 ކުޅުންތެރިންގެ އިތުރުން ގައުމީ ޓީމުގެ އޮފިޝަލުން ފޮޓޯ އަކަށް ހުއްޓިގެން.-- ފޮޓޯ: ހުސެއިން ޝަޔާހު/ އަދަދު
ސޮބާ ބުނީ ފުޓްބޯޅައިގެ ޑިވެލޮޕްމަންޓަށް ބަލާއިރު އެންމެ މުހިއްމު ކަމަކީ 23 އަހަރުން ދަށް ވިޔަސް 19 އަހަރުން ދަށް ވިޔަސް ގިނަ މެޗުތަކެއް ކުޅުން ކަމަށެވެ. އަދި މިގެ ހާއްސަ ކަމެއް ދޭންވީ ޔޫތު ލެވަލުން ފެށިގެން ކުޅުންތެރިންނަށް ހާއްސަ އަހައްމިއްޔަތު ކަމެއް ދީގެން މެޗު ކުޅެވޭނެ މަގުފަހިކޮށްދިނުން ކަމަށެވެ. .
ޒުވާން ގައުމީ ޓީމުން ތައްޔާރުވަމުން އަންނަނީ އަންނަ އަހަރު އުޒްބެކިސްތާނުގައި އޮންނަ 23 އަހަރުން ދަށުގެ އޭޝިއަން ކަޕް ކޮލިފައިންގައި ވާދަކުރާށެވެ. އަންނަ އޮކްޓޫބަރު މަހު 23 އިން 31 އަށް އޮންނަ ކޮލިފައިންގައި ރާއްޖެ ހިމެނެނީ އިރާގް، ބަހުރޭން އަދި އަފްގާނިސްތާނާ އެއް ގްރޫޕެއްގަ އެވެ.
ސޮބާ ބުނީ ޓްރެއިނިން ކުރިއަށް ގެންދަނީ ކޮލިފައިންއާ ހަމައަށް ދާއިރު، ކަންތައްތައް ވީ އެންމެ ރަނގަޅަށް ގެންގޮސް ރަނގަޅު ނަތީޖާއެއް ނެރެވޭނެ ކަމުގެ އުއްމީދުގައި ކަމަށެވެ.
"އެންމެ ރަނގަޅު 23 ކުޅުންތެރިން ގޮވައިގެން ދާނީ. މިހާރު މި ދަނީ 30 ކުޅުންތެރިން ގޮވައިގެން ކޭމްޕަށް. އެކަމަކު ބަހުރޭނަށް ދާއިރު (އެހާތަނަށް) ފެންނަ އެންމެ ރަނގަޅު 23 ކުޅުންތެރިން ގޮވައިގެން އަޅުގަނޑުމެން ދާނީ. މިސާލަކަށް މި ދަނީ (ކޮޅަށް ވަންނަ) ލަނޑު މަދުކުރާކަށް ވެސް ނޫން. ﷲ އިރާދަކުރެއްވިއްޔާ ރަނގަޅު ކާމިޔާބެއް ހޯދަން ޓާގެޓެއް އެބައޮތް،" ސޮބާ ބުންޏެވެ.
ޅ. ޓްރެއިނިން ކޭމްޕަށް ދިޔަ 30 ކުޅުންތެރިންގެ ތެރޭގައި ފުރަތަމަ ޑިވިޝަނުގެ ކްލަބްތަކަށް ގިނަ މެޗުތަކެއް ކުޅެފައިވާ ކުޅުންތެރިން ހިމެނެ އެވެ. އަދި ސީނިއާ ގައުމީ ޓީމުގައި މެޗުތަކެއް ކުޅެފައިވާ ކުޅުންތެރިން ވެސް ހިމެނެ އެވެ.
