ހއ. ފިއްލަދޫއާ އިންވެގެން އޮންނަ ދައްޕަރު އަލުން ފިއްލަދޫގެ އިހުތިސާސްގެ ދަށަށް ގެނައުމަށްޓަކައި އެ ރަށު ރައްޔިތުންތަކެއް އިސްނަގައިގެން ޕެޓިޝަނެއް ތައްޔާރުކުރަން ފަށައިފި އެވެ.
މީގެ ތިން ދުވަސްކުރިން ސޮއި ކުރަން ފެށި އެ ޕެޓިޝަނުގައި 700 އެއްހާ މީހުންގެ އާބާދީއެއް އޮންނަ ފިއްލަދޫގެ 85 ޕަސެންޓް މީހުން ސޮއިކޮށްފައިވާކަމަށް ޕެޓިޝަނުގެ މަސައްކަތުގައި އިސްކޮށް އުޅުއްވާ ފިއްލަދޫ ރައްޔިތަކު "އަދަދު" އަށް ޔަގީންކޮށްދިނެވެ.
އެމީހާ ބުނި ގޮތުގައި ޕެޓިޝަން ހަދަން ނިންމީ ދައްޕަރަކީ ފިއްލަދޫ ރައްޔިތުންގެ ހިތާ ގުޅިފައިވާ ސަރަހައްދެއްކަމުން ރައްޔިތުންގެ އިސްނެގުމުގެ މަތިން ކަމަށެވެ. އެ ޕެޓިޝަނުގައި ރަށުގައި މިވަގުތު ތިބި މީހުން ސޮއިކޮށް ނިމުމުން މާލޭގައި ދިރިއުޅޭ ފިއްލަދޫ ރައްޔިތުން ސޮއިކުރުމަށް ހުޅުވާލާނެ އެވެ.
"އަޅުގަނޑުމެން މިހާރު މާލެ ކޮޅުންވެސް އެބަ ޓީމެއް ތައްޔާރުވަމުންދޭ، ޕެޓިޝަނުގައި ސޮއިކުރުމުގެ މަސައްކަތަށް. އެގޮތުން މިކޮޅުން މި ހަފްތާތެރޭ ނިންމާލައި، މާލެ ކޮޅަށް ފޮނުވާނެ ޕެޓިޝަން،" އެ މީހާ ކިޔައިދިނެވެ.
ހއ. ދައްޕަރުގެ ޑްރޯން ފޮޓޯއެއް.
ޕެޓިޝަނާ ގުޅޭ ގޮތުން ފިއްލަދޫ ކައުންސިލްގެ ރައީސް ފަތުހުﷲ ހަަސަން "އަދަދު" އަށް ވިދާޅުވީ އެއްވެސް ރަށެއްގެ ރައްޔިތަކު އެ ރަށާއި ގުޅިފައިވާ ބިމެއް އެ ރަށުން ވަކިކުރަން ނޭދޭނެ ކަމަށާއި އެގޮތުން ފިއްލަދޫގެ އިހުތިސާސްގެ ދަށަށް އަލުން ދައްޕަރު ގެނައުމަކީ ކައުންސިލާއި ރައްޔިތުން ވެސް އެދޭކަމެއް ކަމަށެވެ.
"އެއީ ދެން ބުނަންޏާ މާލޭގަ ނަމަ މާފަންނާ ހެންވޭރާ. އެގޮތަށް މާފަންނުން ހެންވޭރު ވަކިކުރާކަށް ނޭދޭނެތާ މާލޭގެ އެއްވެސް ރައްޔިތަކު. ހަމަ އެގޮތަށް މިކަންވެސް މިއޮތީ. އަޅުގަނޑުމެންގެ ކާބަފައިންގެ މަހާނަތައްވެސް އެބަ ހުރި ދައްޕަރުގައި. އެކޮޅުގަ ހުންނާނެ ސަހަރާއެއްވެސް،" އޭނާ ބުންޏެވެ.
ފިއްލަދޫގެ އިހްތިސާސުން ދައްޕަރު ނެގިއިރު ކައުންސިލުން ދިޔައީ ލޭންޑް ޔޫސް ޕްލޭންގެ ތެރެެއަށް ލައިގެން ދައްޕަރުން ނަފާ ހޯދުމުގެ މަޝްވަރާތަކެއް ކުރަމުންނެވެ.
"ދައްޕަރު އަދި ފިއްލަދޫގެ ދަށަށް ގެނެސްގެން ލިބޭނެ ފައިދާތައް އެނގޭނީ އެކަން ކުރުމަށްފަހު އޭގެ ފަހުން. ފުރަތަމަ އެކަން ކުރަންތާ ޖެހޭނީ. ކޮންމެ ބަޔަކުވެސް އެދޭނީ ބިމުގެ ގޮތުން މުއްސަނދިވުން،" ފަތުހުﷲ ވިދާޅުވި އެވެ،
ދައްޕަރަކީ ފިއްލަދޫއާ އެއް ބިމެއްގައި އަދި އެއް ފަޅެއްގައި އޮންނަ ރަށެކެވެ. ފިއްލަދޫގެ އިހްތިސާސުން ދައްޕަރު ވަކިކޮށްފައި ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އޯގަސްޓް 29 ވަނަ ދުވަހު ނެރުއްވި ގަރާރަކުންނެވެ.
އޭގެ ކުރިން މިދިޔަ އަހަރުގެ ޖުލައި މަސްތެރޭ އެ ރަށުގައި ސެކަންޑް ހޯމް ރެޒިޑެންޓް ޕައިލެޓް ޕްރޮޖެކްޓެއް ހިންގުމަށްވެސް ސަރުކާރުން ވަނީ އިއުލާންކޮށްފަ އެވެ. އެ މަޝްރޫއަށްވެސް ފިއްލަދޫ ރައްޔިތުންގެ ފަރާތުން ވަނީ ކަންބޮޑުވުންތަކެއް ފާޅުކޮށްފަ އެވެ.
