ނިއު ޔޯކް، ޔުނައިޓެޑް ސްޓޭޓްސް (ސެޕްޓެމްބަރު 4) - އަރަމުން އަންނަ އިނގިރޭސި އަންހެން ޓެނިސް ތަރި އެމާ ރަޑުކާނީ އަށް ވިމްބަލްޑަން ޓެނިސް މުބާރާތުގައި ދިމާވި ކަންތައްތަަކުން އަރައިގަނެ، މިހާރު ކުރިއަށްދާ ޔޫއެސް އޯޕަން ޓެނިސް މުބާާރާތުގައި ތަފާތު ދައްކައިފި އެވެ.
މިދިޔަ ޖުލައި މަހު ވިމްބަލްޑަންގެ ގަދަ 16 ކުޅުންތެރިންގެ ބުރުގެ މެޗުގެ ތެރެއިން އުމުރުން 18 އަހަރުގެ އެމާ އަށް ނޭވާލާން އުނދަގޫ ވެގެން މެޗު ދޫކޮށްލަން ޖެހުނީ ރެލީތައް ދިޔަ ގޮތުންނެވެ. މެޗު ހުއްޓާލަން ޖެހުނުއިރު، އޮސްޓްރޭލިއާގެ އައިލާ ޓޮމިއާނޮވިޗާ ދެކޮޅަށް އެމާ އޮތީ 4-6 0-3 އިން ފަހަތުގަ އެވެ. ފުރަތަމަ ސެޓުގެ ތެރެއިން އެމާ އަށް ނޭވާލާން އުނދަގޫތަކެއް ދިމާވި އެވެ. ދެ ވަނަ ސެޓު ފެށިގެން އޭމާ އަށް ނޭވާލުމުގައި އިތުރަށް ދަތިތަކެއް ދިމާވެ، ޓްރެއިނަރަށް ގޮވާލި އެވެ. އަދި ވަގުތުން ފަރުވާ ދޭން ފެށި އެވެ.
އެމާ އަށް އެހެން ދިމާވުމުން ކޯޓުގެ ބެންޗު އޭރިއާގެ ގޮނޑިމަތީގައި ބައިންދައިގެން ތަކުރާރުކޮށް ފަރުވާދިނެވެ. އަދި އެ ގޮތަށް އިރުކޮޅަކަށް ފަހު ބެލި ބެލުމުގައި އެމާގެ ހާލަތު ރަނގަޅުނުވާތީ އެންމެ ފަހުން ނިންމީ މެޗު ދޫކޮށްލާށެވެ.
ދާދި ފަހުން އޭ ލެވަލް ޓެސްޓްތައް ހަދައި ހިސާބާއި އިކޮނޮމިކްސް އިން މަތީ މާކްސް ހޯދި އެމާ ޕްރޮފެޝަނަލް ޓެނިހަށް އަލަށް ނުކުމެ ޓެނިހުގެ ގްރޭންޑް ސްލޭމް މުބާރާތެއްގައި އަލަށް ވާދަކޮށް ވިމްބަލްޑަންގައި ތަފާތު ދެއްކި އެވެ.
ނަމަވެސް އޭނާ އެ މުބާރާތުން ވަކިވާން ޖެހުނު ގޮތުން ޕްރޮފެޝަނަލް ލެވަލްގެ ޕްރެޝަރާ އެމާ އަށް ކުރިމަތިލެވިދާނެތޯ ގިނަ ބަޔަކު ސުވާލު އުފެއްދި އެވެ. އެ ކަންކަމަށް އެމާ ވަނީ ޖަވާބުދީފަ އެވެ. އެމާ ވަނި މިހާރު ކުރިއަށްދާ ޔޫއެސް އޯޕަންގައި މިހާތަނަށް ކުޅުނު ކޮލިފައިން ތިން މެޗާއި މެއިން ޑްރޯގެ ދެ މެޗުން ސެޓެއް ވެސް ގެއްލުވާނުލައި ހުރިހާ މެޗަކުން މޮޅުވެފަ އެވެ.
"އަހަންނަށް ފުރަތަމަ މުބާރާތުގައި (ވިމްބަލްޑަންގައި) ދިމާވި ކަންތައްތަކުގެ ސަބަބުން އަލުން ފަށަން ވަރަށް އުނދަގޫވި. އެކަމަކު ފަސޭހަވީ އަހަންނަށް ޓެނިހުގެ ދުނިޔެއިން ދިން އެއްބާރުލުމުން. މި ފަހަރު ޔޫއެސް އޯޕަންގައި މިހާތަނަށް ކުޅުނު ފަސް މެޗަށް ބަލާއިރު، މެޗަކަށް ފަހު މެޗެއްގައި އަހަންނަށް ޕްރެޝަރަށް ހޭނި ކޮންފިޑެންސާ އެކު ކުޅެލަން އެބަ ހިތްވަރު ލިބޭ،" އެމާ ބުންޏެވެ.
މި ފަހަރުގެ ޔޫއެސް އޯޕަންގައި އެމާ ދެ ވަނަ ބުރުގައި ކުޅުނު މެޗުން މޮޅުވީ ޗައިނާގެ އެއް ވަނަ ކުޅުންތެރިޔާ ޒޭން ޝުއާއީ އަތުންނެވެ. ތިން ވަނަ ބުރުގައި މިއަދު ނުކުންނާނީ ސްޕެއިންގެ ސޭރާ ސޮރީބޯ ޓޯމޯއާ ދެކޮޅަށެވެ.
ޓޯމޯއާ ދެކޮޅަށް ކުޅޭ މެޗުން އެމާ މޮޅުވެއްޖެނަމަ އޭނާ އަށް ދުނިޔޭގެ ރޭންކިންގެ ގަދަ 100 ގެ ތެރެއަށް ވަދެވޭނެ އެވެ. އެމާ މި ވަގުތު އޮތީ 150 ވަނައިގަ އެވެ. މިދިޔަ ޖުލައި މަހު ވިމްބަލްޑަން އަށް ނުކުތްއިރު އެމާގެ ރޭންކިން އަކީ 338 ވަަނަ އެވެ.
