މިހާރު އަމަލުކުރާ ކުންފުންޏާ ބެހޭ ގާނޫނު އުވާލަން ނިންމައި ވިޔަފާރީގެ މާހައުލަށް ފަހި އިންގިލާބީ ބަދަލުތަކާއެކު އާ ގާނޫނީ އޮނިގަނޑެއް އެކުލަވާލައި އާންމުންގެ ހިޔާލަށް ހުޅުވާލައިފި އެވެ.

މިހާރު އަމަލުކުރާ އަންނަ ކުންފުންޏާބެހޭ ގާނޫނު އެކުލަވާލީ 2016 ވަނަ އަހަރެވެ. މީގެ 25 އަހަރު ކުރީގެ މި ގާނޫނުގެ ބަދަލުގައި، އާ ގާނޫނެއް ގެނައުމުގެ މައިގަނޑު ބޭނުމަކީ، އިކޮނޮމިކް މިނިސްޓްރީން ބުނި ގޮތުގައި، އިގުތިސޯދުގައި ވިޔަފާރިތައް ހަރަކާތްތެރިވުމަށް ފަހި ފުރުސަތުތަކެއް ހޯދުމާއި، ކުންފުނީގެ ގާނޫނީ ނިޒާމަށް ޒަމާނީ ބަދަލު ގެނެސް، އިންވެސްޓްމަންޓަށް ފަހި މާހައުލެއް ގެނައުމާއި، ކުންފުނި އުފައްދައި، ރަޖިސްޓަރީ ކުރުމާއި، ހިންގުމާއި، އުވާލުމުގެ ހަމަތަކާއި، އިޖުރާއަތްތައް ގެނައުމެވެ.

"މި ބިލަކީ ދިވެހިރާއްޖޭގެ ވިޔަފާރީގެ މާހައުލަށް އިންގިލާބީ ބަދަލެއް ގެނެސް އިންވެސްޓަރުންގެ ޝައުގުވެރިކަން ހޯދައި, ދެމެހެއްޓުމަށް އެޅޭ އެންމެ މުހިއްމު ބިންގާ. އެހެންކަމުން، މި ބިލުގެ ދާއިރާގައި ހިމެނޭ ކަންކަމަށް މާލީ، އިގުތިސޯދީ، އިޖްތިމާއީ، ގާނޫނީ އަދި ފަންނީ ނަޒަރަކުން މުރާޖައާކުރެވި އާންމުންގެ ހިޔާލު ލިބުމަކީ، ސަރުކާރުގެ މި މުހިއްމު މަސައްކަތަށް ލިބިގެންދާނެ އިތުރު ފުރިހަމަ ކަމެއް ކަމުގައި ދެކި، އާންމުންގެ ހިޔާލު ހުށަހެޅުއްވުމަށް އެދެން،" ކުންފުނީގެ އާ ގާނޫނާއެކު، އިކޮނިމިކް މިނިސްޓްރީން ހާމަކުރި ކަރުދާހުގައި ބުނެފައިވެ އެވެ.

ވިޔަފާރިތަކަށް ފަހި މާހައުލެއް އޮތް ގައުމުތަކުގެ ރޭންކިންގައި ކުރިއެރުމަށް ރާއްޖެއަށް އޮތް ހުރަސްތައް ނައްތާލުމާއި، ކުންފުނި އުފެއްދުމާއި ހިންގުމާއި އުވާލުމުގެ ކަންކަމުގައި މިހާރު ދިމާވާ ދަތިތަކަށް ހައްލުތަކެއް ހޯދުމާއި، އިންވެސްޓްމަންޓް ކުންފުނި އުފެއްދުމަށް އެކަށީގެންވާ ބާވަތެއްގެ ގޮތުގައި ޕަބްލިކް ކުންފުނިތަކުގެ ގާނޫނީ ނިޒާމު ބަދަލުކުރުމާއި، ކުންފުނީގެ ގާނޫނީ ނިޒާމު، ޒަމާނާ އެއްގޮތަށް ތަރައްގީކޮށް، ޒަމާނީ ގާނޫނީ މަފްހޫމްތަކާއި އުސޫލުތައް ގެނައުމާއި އިލެކްޓްރޯނިކް ޒަރީއާއިން ހިދުމަތަށް އެދި ހިދުމަތް ލިބިގަތުމުގައި އިތުބާރު ދެމެހެއްޓުމަކީ ވެސް އާ ގާނޫނުގެ މަގުސަދެކެވެ.

އާ ގާނޫނުގެ މައިގަނޑު އިސްލާހުތައް

1. ޕްރައިވެޓް ކުންފުންޏެއް އުފެއްދުމަށް މަދުވެގެން ދެ ހިއްސާދާރުން ތިބުމަށް އޮންނަ ޝަރުތު އުވާލައި، ސިންގަލް ޝެއާހޯލްޑަ ކުންފުނި އުފެއްދުމަށް މަގުފަހިކުރުން.
2. ޕަބްލިކް ކުންފުންޏެއް އުފައްދާއިރު ވެސް މަދުވެގެން 10 ހިއްސާދާރުން ނުވަތަ ޕްރޮމޯޓަރުން ތިބެން އޮންނަ ޝަރުތު އުވާލައި، ސިންގަލް ޝެއާހޯލްޑަ ކުންފުނި އުފެއްދުމަށް މަގުފަހިކުރުން އަދި މި އޮނިގަނޑުގެ ދަށުން ހިންގާ ވިޔަފާރިތަކާއި އިންވެސްޓްމަންޓަށް ހާއްސަ ކުންފުނިތައް ރެގިއުލޭޓުކުރުމާއި ސެކިއުރިޓީޒް ދޫކުރުމުގައި އަމަލުކުރަންޖެހޭ ގަވާއިދުތައް ހަދާ ހިންގުމުގެ ބާރު މާލީ ސެކިއުރިޓީޒްއާބެހޭ ގާނޫނު ތަންފީޒުކުރާ ފަރާތައް މަތި ކުރުން.
3. ކުންފުނީގެ ޑިރެކްޓަރަކަށް ވެވޭނީ ހިއްސާދާރަކަށް ކަމަށް އޮންނަ ޝަރުތު އުނިކޮށް، ކުންފުންޏަކަށް އިންވެސްޓްކުރާ ކޮންމެ ހިއްސާދާރެއް ޑިރެކްޓަރުންގެ ބޯޑުގައި ހުންނަން ލާޒިމުނުކޮށް، ހިއްސާދާރުންގެ ފަރާތުން ކުންފުނި ހިންގުމަށް ޕްރޮފެޝަނަލް ޑިރެކްޓަރުން ޢައްޔަނުކުރުމަށް ފުރުސަތު ފަހިކޮށްދިނުން.
4. ޕްރައިވެޓް ކުންފުންޏެއްގައި ސެކްރެޓަރީއެއް ހުރުމަށް އޮންނަ ޝަރުތު އުނިކުރުން.
5. ޕްރައިވެޓް ކުންފުނީގެ ހިންގާ ގަވާއިދުގެ "މޮޑެލް ހިންގާ ގަވާއިދެއް"، ޤާނޫނުގެ ދަށުން ގަވާއިދަކުން ކަނޑައަޅައި، ކުންފުނިތަކުން "މޮޑެލް ހިންގާ ގަވާއިދު" އިޚްތިޔާރުކުރުމަށް ފުރުސަތުދީ، ކުންފުނި އުފައްދާއިރު އާއި އޭގެ ފަހުންވެސް، ވަކިން ހިންގާ ގަވާއިދެއް ކުންފުނިން ލިޔެ ތައްޔާރުކޮށް ހުށަހެޅުމަށް ލާޒިމްކޮށްފައި އޮންނަ އޮތުން އުނިކުރުން.
6. ކުންފުނީގެ އަސާސީ ގަވާއިދުގައި ކުންފުނީގެ "މަގުސަދު" ތަކުގެ ގޮތުގައި ވަކި ކަންކަން ކަނޑައެޅުމާއި، ކުންފުނީގެ ސިއްކައަކީ އިހުތިޔާރީ ކަމެއްގެ ގޮތުގައި ކަނޑައެޅުން.
7. ތިން ކުންފުނީގެ އަހަރީ ފީ އުވާލައި، ކުންފުނީގެ ފަރާތުން މިނިސްޓްރީން ހޯދާ ޚިދުމަތްތަކަށް ފީ ނެގުން.
8. ޕްރޮފެޝަނަލް ޑިރެކްޓަރުންނަށް ފުރުސަތު އޮންނަ ގޮތަށް ބަދަލު ގެނައުމާއިއެކު، މެންބަރުންގެ އިންވެސްޓްމަންޓް ހިމާޔަތްކުރުމަށްޓަކައި، ކުންފުނީގެ މެންބަރުންގެ ހައްގުތަކާއި ބާރުތައް ކަނޑައަޅައި ބަޔާންކުރުން.
9. ޗެއާޕާސަންގެ ޒިންމާ ކަނޑައަޅައި، ކުންފުނީގެ ޑިރެކްޓަރުންގެ ޝަރުތުތަކާއި، ބާރުތަކާއި، މަސްއޫލިއްޔަތުތައް ކަނޑައަޅައި ބަޔާންކުރުން.
10. ކުންފުނީގެ ހިއްސާގެ މިލްކުވެރި ފަރާތުގެ ގޮތުގައި މެންބަރުންގެ ދަފްތަރުގައި ބަޔާންކުރާ މެންބަރަކީ ފަރުދަކު ނޫންނަމަ، އެ ހިއްސާއެއްގެ ބެނެފިޝަލް އޯނަރުގެ މަޢުލޫމާތު ކުންފުންޏަށް އަންގައި، ކުންފުނީގައި ރަޖިސްޓަރީކުރަން ޖެހުން.
11. ފޮރިން އިންވެސްޓަމަންޓް ކުންފުނިތަކާއި ސަރުކާރުގެ ކުންފުނިތަކުގެ ގާނޫނީ ނިޒާމު އިތުރަށް ހަރުދަނާކުރުން.

މި ބިލު، މިހާރު ކުރިއަށްދާ ރައްޔިތުންގެ މަޖިލީހުގެ މި އަހަރުގެ ތިން ވަނަ ދައުރަށް ހުށަހެޅުމަށް ސަރުކާރުން ވަނީ ނިންމައިފަ އެވެ. ދުއިސްތަ ސާޅީސް ނުވަ މާއްދާގެ މައްޗަށް އެކުލަވާލާފައިވާ ބިލަށް، މި މަހުގެ 12 ވަނަ ދުވަހުގެ ކުރިން ހިޔާލު ހުށަހެޅުމުގެ ފުރުސަތު ހުޅުވާލައިފައިވެ އެވެ. ހިޔާލު ފޮނުވާނީ legal@trade.gov.mv އަށެވެ.