ބެއިޖިން، ޗައިނާ (ސެޕްޓެމްބަރު 2) - ޒުވާނުންނަށް މަގު އޮޅެމުންދާ ކަމަށް ބުނެ "ޕޮޕް ކަލްޗާ" އާ ދެކޮޅަށް ޗައިނާ ސަރުކާރުން ފަށާފައިވާ މަސައްކަތުގެ ދަށުން ރިއަލިޓީ ޓެލެންޓު ޝޯތައް މަނާކޮށް، ފިރިހެނުން "ފިރިހެންވަންތަކޮށް" ދެއްކުމަށް ޓީވީ ޗެނެލްތަކަށް އަންގައިފި އެވެ.
ޒުވާން ބައިވެރިންނާއެކު އެކި ކަހަލަ ޓެލެންޓު ހަރަކާތްތައް ހިންގާ، އާއްމުންގެ ވޯޓު މެދުވެރިކޮށް އެންމެ މޮޅު ބައިވެރިއަކު ހޮވާ ޓެލެންޓު ޝޯތަކަށް ޗައިނާގައި ބޮޑު މަގްބޫލުކަމެއް އޮވެ އެވެ. އެފަދަ ޝޯތަކުން ފެންނަ ބައެއް ޒުވާނުންގެ ފަރާތުން ނުރަނގަޅު ސިފަތައް ފެނުނު ނަމަވެސް، ފޭނުން ތިބެނީ މޮޔަވެފަ އެވެ.
"ބްރޯޑްކާސްޓް އަދި ޓީވީ ސްޓޭޝަންތަކުން ރިއެލިޓީ ޝޯ އާއި ވެރައިޓީ ޝޯ އަދި އައިޑަލް ޝޯތައް ދެއްކުމަކީ މަނާކަމެއް،" ޗައިނާގެ ބްރޯޑްކާސްޓް ރެގިއުލޭޓަރު، ނޭޝަނަލް ރޭޑިއޯ އެންޑް ޓެލެވިޝަން އެޑްމިނިސްޓްރޭޝަނުން ނެރުނު އާ އުސޫލުގައި ބުންޏެވެ.
ބްރޯޑްކާސްޓަރުންނަށް އަންގާފައި ވަނީ "ޗައިނާގެ ސަގާފަތާއި އާދަކާދަ އާލާކޮށް، ސޯޝަލިސްޓު ސަގާފަތް ދިރުވުމަށް ވީހާވެސް ބޮޑަށް" މަސައްކަތް ކުރުމަށެވެ.
ޗައިނާގެ ކަމާ ބެހޭ ފަރާތްތަކުން މީގެ ކުރިން ވަނީ "ފިރިހެންވަންތަ" ފިރިހެނުން އުފެއްދުމަށް ކަމަށް ބުނެ ހާއްސަ ޖިމް ކުލާސްތައް ހިންގައި، ދެކުނު ކޮރެއާގެ ޕޮޕް ތަރިންގެ ސިފަ އާއި ސްޓައިލް ކޮޕީ ކުރާ ރައްޔިތުންނަށް ފާޑުކިޔާފަ އެވެ.
ޗައިނާގެ މަޝްހޫރު ބްލޮގަރު ފެންގް ޒިއައޮޔީގެ ޑޫޔިން އެކައުންޓު މިދިޔަ ހަފުތާގައި ސަސްޕެންޑު ކުރީ "ނުރަނގަޅު އާދަތައް ޕްރޮމޯޓު ކުރާ" ކަމުގެ ޝަކުވާ ލިބުމުންނެވެ. ޑޫޔިން އަކީ ޗައިނާގެ ރައްޔިތުން ބޭނުން ކުރާ ޓިކޮޓޮކް ޕްލެޓްފޯމެވެ.
އޭގެ އިތުރުން ވީޑިއޯ ސްޓްރީމް ކުރާ ސައިޓު އައިކިޔީ އިން މިދިޔަ ހަފުތާގައި ބުނީ އައިޑޮލް ޓެލެންޓު ޝޯތައް ކެންސަލު ކުރަން ނިންމާފައިވާ ކަމަށެވެ.
ޗައިނާގެ މުނިފޫހިފިލުވުމުގެ ދާއިރާއާ ގުޅޭ ގާނޫނާ ހިލާފު އަމަލުތައް އިތުރުވަމުންދާތީ ފަހަކަށް އައިސް ކަމާ ބެހޭ ފަރާތްތަކުން ވަނީ ހަރުކަށި ފިޔަވަޅު އަޅަން ފަށާފަ އެވެ.
އެގޮތުން ޓެކްސް ނުދައްކާކަން ފަޅާ އެރުމުން މިދިޔަ ހަފުތާގައި އެކްޓްރެސް ޒެންގް ޝުއާންގް 46 މިލިއަން ޑޮލަރުން ޖޫރިމަނާކުރި އެވެ. އޭގެ އިތުރުން ކުރީގެ އައިޑޮލް އަދި ޗައިނާ އާއި ކެނެޑާ އަށް ނިސްބަތްވާ ޕޮޕް ތަރި ކްރިސް ވޫ ވަނީ ރޭޕުގެ ތުހުމަތުގައި ހައްޔަރުކޮށްފަ އެވެ.
ޗައިނާ ޒުވާނުންގެ މެދުގައި މަގްބޫލުވެފައިވާ ޝޯތަކުން ފެންނަ ތަރިންނަށް ސަޕޯޓު ކުރާ ފޭނުން "މޮޔަވެފައި" ތިބޭތީ ރެގިއުލޭޓަރުން ދަނީ އެކަން ހުއްޓުވުމަށް ވެސް ފިޔަވަޅު އަޅަމުންނެވެ.
އެގޮތުން "ޔޫތު ވިތު ޔޫ 3" މިދިޔަ މޭ މަހު ދެއްކުން މަނާކުރީ ތަރިންނަށް ވޯޓު ހޯދުމުގެ ގޮތުން ސަޕޯޓަރުން އެއް ފަހަރާ ގިނަ އަދަދެއްގެ ޔޯގަޓު ގަނެ، އުކަން ފެށުމުންނެވެ.
މިފަދަ ޝޯތަކުގައި ތަރިންނަށް ވޯޓު ހޯދައި ދިނުމުގެ ގޮތުން އާއްމު ގޮތެއްގައި ފޭނުންނަށް ޖެހެނީ ޝޯގެ ސްޕޮންސަރެއްގެ މުދާ ގަންނާށެވެ. ބްރޯޑްކާސްޓު ރެގިއުލޭޓަރު އަލަށް އިއުލާނު ކުރި އުސޫލުގެ ދަށުން އެކަން މަނާވާނެ އެވެ.
ޗައިނާ ސަރުކާރުން އަންނަނީ ގައުމުގެ ރައްޔިތުންގެ މެދުގައި ހުރި ނުރަނގަޅު ކަންކަން އިސްލާހު ކުރުމަށް ގިނަ ފިޔަވަޅުތަކެއް އަޅަމުންނެވެ. އެގޮތުން ގޭމު ކުޅުމަށް ކުދިން ދެވިހިފާ މައްސަލަ ހައްލު ކުރުމަށް 18 އަހަރުން ދަށުގެ ކުދިން ހަފުތާއަކު ތިން ގަޑިއިރަށް ވުރެ އިތުރަށް އޮންލައިން ގޭމް ކުޅުން ވަނީ މަނާކޮށްފަ އެވެ.
އޭގެ އިތުރުން އިމްތިހާން ހަދަން ޖެހޭތީ ދަރިވަރުންނަށް ކުރާ ޕްރެޝަރު ކުޑަ ކުރުމުގެ ގޮތުން ގްރޭޑް އެކެއްގެ ކުދިންނަށް އިމްތިހާން ދިނުން މަނާކޮށް، ހޯމްވޯކް ދިނުން ވެސް މަދު ކުރަން ވަނީ އަންގާފަ އެވެ. ހަމައެއާއެކު ފައިދާ އަށް ޓިއުޝަން ނަގައިދިނުން ފަދަ ކަންކަން ވެސް މިހާރު ވަނީ މަނާކޮށްފަ އެވެ.
