އެޗްޕީއޭން ކަނޑައެޅި މިންގަނޑަށް ވެކްސިން ފުރިހަމަ ކުރި 28 ރަށަކަށް ޕީސީއާރް ޓެސްޓަކާ ނުލާ ދަތުރު ކުރުމުގެ ހުއްދަ ދީފި އެވެ.
ރާއްޖޭގައި ކޮވިޑް ފެތުރުމާއެކު، މާލޭން ރަށްރަށަށް ދިޔުން ހަރުކަށިކޮށް، 14 ދުވަހުގެ ކަރަންޓީނު މުއްދަތެއް ތައާރަފުކުރި އެވެ. އޭގެފަހުން ވެކްސިން ޖަހަން ފެށުމުން އެ ކަރަންޓީނަށް ލުއި ދިނެވެ.
އެގޮތުން ވެކްސިންގެ ދެ ޑޯޒު ފުރިހަމަ ކޮށްފައިވާ ފަރާތްތަކަށް މިހާރު ކަރަންޓީނުވުމެއް ނެތި ރަށްރަށަށް މާލޭން ދަތުރު ކުރެވެ އެވެ. ނަމަވެސް، އެގޮތަށް ދަތުރު ކުރެވެނީ 72 ގަޑިއިރު ނުވާ ނެގެޓިވް ޕީސީއާރް ޓެސްޓް ނަތީޖާއަކާ އެވެ.
އެޗްޕީއޭން ކަނޑައަޅާފައި އޮތީ މި މަހުން ފެށިގެން ވެކްސިން ޖެހުމުގެ އާބާދީގެ 90 ޕަސެންޓް މީހުން ވެކްސިންގެ ދެ ޑޯޒު ފުރިހަމަކޮށްފައިވާ ރަށްރަތަކަށް ޓެސްޓް ހެދުމަކާ ނުލާ ދަތުރު ކުރެވޭނެ ގޮތަށެވެ.
އެގޮތުން އެ މިންގަނޑަށް ވާސިލްވެފައިވާ 28 ރަށެއް އެޗްޕީއޭން މިއަދު ވަނީ އާންމުކޮށްފަ އެވެ. މި ރަށްތަކުގެ 12 އަހަރުން މަތީގެ އާބާދީގެ 90 ޕަސެންޓް މީހުން ވެކްސިން ފުރިހަމަ ކޮށްފައިވާއިރު، 65 އަހަރުން މަތީގެ މީހުންގެ 90 ޕަސެންޓް މީހުން ވެސް ވެކްސިން ފުރިހަމަކޮށްފައިވެ އެވެ.
އަދި، މީގެތެރެއިން ގެސްޓްހައުސްތައް ހުންނަ ރަށްރަށުގެ ގެސްޓްހައުސްތަކުގެ މުވައްޒަފުންގެ 95 ޕަސެންޓް މީހުން ވެސް ވަނީ ވެކްސިންގެ ދެ ޑޯޒު ފުރިހަމަކޮށް، 14 ދުވަސްވެފަ އެވެ.
އާބާދީގެ 95 ޕަސެންޓް ފުރިހަމަކުރި ރަށްތައް
ހއ. އުލިގަމް
ހއ. މުރައިދޫ
ހދ. ހިރިމަރަދޫ
ހދ. ނެއްލައިދޫ
ރ. މަޑުއްވަރީ
ރ. މީދޫ
ރ. އަލިފުށި
ބ. ފެހެންދޫ
ބ. ފުޅަދޫ
ބ. ދޮންފަން
ބ. ކިހާދޫ
ބ. އޭދަފުށި
ބ. މާޅޮސް
ބ. ކަމަދޫ
އއ. މަތިވެރި
އދ. ދިގުރަށް
އދ. ފެންފުށި
އދ. ދިއްދޫ
ވ. ރަކީދޫ
ވ. ފުލިދޫ
ފ. މަގޫދޫ
ފ. ދަރަންބޫދޫ
ފ. ފީއަލި
ލ. ހިތަދޫ
ގއ. ދެއްވަދޫ
ގދ. ރަތަފަންދޫ
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ ރާއްޖޭގައި ވެކްސިން ޖެހޭ އާބާދީގެ ތެރެއިން 18 އަހަރުން މަތީގެ 85 ޕަސެންޓު މީހުން ވެކްސިންގެ ފުރަތަމަ ޑޯޒް ޖަހާފައިވާ ކަމަށެވެ. އަދި 12 އަހަރާއި 17 އަހަރާއި ދެމެދުގެ 84 ޕަސެންޓު ކުދިން ވެކްސިންގެ ފުރަތަމަ ޑޯޒް ޖަހާފައިވާ ކަަމަށެވެ.
މަބްރޫކް ވިދާޅުވީ މިހާރު ވެކްސިންގެ އެއްވެސް ޑޯޒެއް ނުޖަހާ މީހުންގެ ތެރެއިން ގިނައީ ރާއްޖެއިން ބޭރުގައި ދިރިއުޅޭ މީހުންކަމަށެވެ. އެގޮތުން ވެކްސިންގެ އެއްވެސް ޑޯޒެއް ނުޖަހާ ގާތްގަނޑަކަށް 30,000 މީހުން އެބަތިބިކަމަށް މަބްރޫކް ހާމަކުރެއްވި އެވެ.
މިހާރު ލިބިފައިވާ ވެކްސިންގެ މުއްދަތު އަންނަ ނޮވެމްބަރު މަހުގެ ތެރޭގައި ހަމަވާއިރު، ސަރުކާރުގެ އަމާޒަކީ އޭގެ ކުރިން އެންމެން ވެކްސިންގެ ދެ ޑޯޒު ފުރިހަމަ ކުރުމެވެ. އެކަމަކު ރާއްޖެ އަށް ވެކްސިންގެ ނަސީބު ލިބިފައިވާ އިރު ވެސް އެކަމުގައި ފަރުވާކުޑަކުރަމުން ދިއުމަކީ ސިއްހީ ދާއިރާގެ ކަންބޮޑުވުމެކެވެ.
އެޗްޕީއޭއިން އެންމެ ފަހުން އާންމުކޮށްފައިވާ ތަފާސްހިސާބުތަކުން ދައްކާ ގޮތުން، އިއްޔެއާ ހަމައަށް ރާއްޖޭގައި 383،620 މީހުން ފުރަތަމަ ޑޯޒް ޖަހާފައިވާއިރު، އޭގެ ތެރެއިން 302،182 މީހުން ވަނީ ވެކްސިން ފުރިހަމަކޮށްފަ އެވެ.
