ޖެނީވާ، ސްވިޓްޒަލޭންޑް (ސެޕްޓެމްބަރު 1) - މި އަހަރުގެ ޖެނުއަރީ މަހުން ކޮލޮމްބިއާ އިން ފެނުނު ކޮވިޑް ވައިރަހުގެ އާ ވޭރިއެންޓެއް މޮނީޓާކުރަމުންދާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
"މޫ" ނުވަތަ ބީ.621.1 ގެ ނަން ދީފައިވާ އެ ވޭރިއެންޓަކީ "ޝައުގުވެރިކަން ހުރި" ވޭރިއެންޓެއްގެ ގޮތުގައި ޑަބްލިއުއެޗްއޯ އިން ވަނީ ކަނޑައަޅާފަ އެވެ.
ޑަބްލުއިއެޗްއޯ އިން ބުނީ އެ ވޭރިއެންޓުގެ މިއުޓޭޝަންތަކުގެ ތެރޭގައި ވެކްސިނަށް ނުގުޑާ ފަދަ އަސަރެއް ކުރުން އެކަށީގެންވާ ކަމަށާއި އެކަން ބެލުމަށް އިތުރު ދިރާސާތައް ކުރަން ޖެހޭ ކަމަށެވެ.
ދުނިޔޭގައި ކޮވިޑް ކޭސްތައް އިތުރުވަމުންދާ މި ދަނޑިވަޅުގައި ވައިރަހުގެ އާ މިއުޓޭޝަންތައް ފެނުމުގެ ނުރައްކާ ބޮޑެވެ. މި ވަގުތު އެންމެ ބޮޑަށް ފެންނަނީ ހަލުވިކަމާއެކު ފެތުރޭ ޑެލްޓާ ވޭރިއެންޓެވެ. އެ ވޭރިއެންޓުގެ ނުރައްކާ ބޮޑީ ވެކްސިން ނުޖަހާ ތިބި މީހުންނާއި ރައްކާތެރިކަމުގެ ފިޔަވަޅުތަކަށް ލުއިދީފައިވާ ހިސާބުތަކުގަ އެވެ.
ކޮންމެ ވައިރަހެއް ވެސް ގިނައިން ފެތުރޭ ވަރަކަށް މިއުޓޭޓްވެ، އާ ވޭރިއެންޓުތައް އުފެދެން މެދުވެރިވެ އެވެ. ބައެއް މިއުޓޭޝަންތަކުގެ ސަބަބުން ވައިރަހުގެ އަސަރު ކުރާ ގޮތާއި ފެތުރޭ ހަލުވި މިނަށް އަދި ވެކްސިނަށް ގުޑާ މިންވަރަށް ބަދަލު އާދެ އެވެ.
މި ވަގުތު "ކަންބޮޑުވާން ޖެހޭ" ވޭރިއެންޓުގެ ގޮތުގައި ޑަބްލިއުއެޗްއޯ އިން ފާހަގަކޮށްފައި ވަނީ ހަތަރު ވޭރިއެންޓެކެވެ. އޭގެ ތެރޭގައި ހިމެނޭ އަލްފާ ވޭރިއެންޓު 193 ގައުމަކުން ފެނިފައި ވާއިރު، ޑެލްޓާ ފެނިފައި ވަނީ 170 ގައުމަކުންނެވެ.
މޫ ހިމެނޭ ގޮތަށް ފަސް ވޭރިއެންޓެއް އޮތީ މޮނީޓާ ކުރާ ކެޓެގަރީގަ އެވެ. ކޮލޮމްބިއާ އިން އެންމެ ފުރަތަމަ ފެނުނު އެ ވޭރިއެންޓު މިހާރު ވަނީ ދެކުނު އެމެރިކާގެ ގައުމުތަކާއި ޔޫރަޕަށް ފެތުރިފަ އެވެ.
