ހއ. ފިއްލަދޫ އިހުތިސާސްގެ ތެރެއިން ދައްޕަރު ވަކިކުރި ނަމަވެސް ރައްޔިތުންގެ ވިސްނުމާ ދެކޮޅަށް އެ ރަށުގައި އެއްވެސް މަސައްކަތެއް ނުކުރާނެ ކަމުގެ ޔަގީންކަން ސަރުކާރުން މިއަދު ދީފި އެވެ.
ފިއްލަދޫއާ އެއްފަސްގަނޑެއްގައި އޮންނަ ދައްޕަރު އެ ރަށު ކައުންސިލުގެ އިހުތިސާސުން ވަކިކޮށް ރިސޯޓެއްގެ ގޮތުގައި ކަނޑައެޅީ، ސަރުކާރުން އަލަށް ފަށާ ސެކަންޑް ހޯމް ރެޒިޑެންސީ މަޝްރޫއަށެވެ. ސަރުކާރުގެ ވިސްނުމަކީ މި މަޝްރޫއުގެ ދަށުން ދައްޕަރުގައި ހޮލިޑޭ ހޯމްތަކެއް އެޅުމަށް ފަހު ބިދޭސީންނަށް ވިއްކުމެވެ.
އެކަމަކު އާ ލާމަރުކަޒީ ގާނޫނުގެ ދަށުން، ފިއްލަދޫ ރައްޔިތުން ދައްޕަރުން ނަފާ ހޯދުމަށް ތައްޔާރުވެފައި ތިއްބާ މަޝްވަރާ ކުރުމެއްނެތި އެ ރަށުގެ އިހްތިސާސުން ދައްޕަރު ވަކި ކުރުމުން ރަށު ކައުންސިލުން ވަނީ ކަންބޮޑުވުން ފާޅުކޮށްފަ އެވެ.
އެހެން އެކަން އޮއްވާ ދިއްޕަރު މައްސަލައިގައި ސަރުކާރުގެ ވިސްނުން ސާފުކޮށްދެއްވަމުން ހަމްދާން ސޯޝަލް މީޑިޔާގައި ވިދާޅުވީ އެ މައްސަލައިގައި އެދެވޭ ވަރުގެ ހައްލެއް ހޯދައިދޭނެ ކަމަށާއި މިހާރު ކައުންސިލާ އެކަމުގައި މަޝްވަރާ ކުރަމުންދާ ކަމަށެވެ.
"ރަށު ކައުންސިލް އަދި ރައްޔިތުންގެ ކަންބޮޑުވުމަށް ސަރުކާރުން ހައްލު ހޯދައިދޭނެ. ކައުންސިލް އަދި ރައްޔިތުންގެ ވިސްނުމާ ދެކޮޅަށް ސަރުކާރުން ކަންކަން ކުރިޔަށް ނުގެންދާނެ،" ޓުވިޓާގައި ހަމްދާން ލިޔުއްވި އެވެ.
ފިއްލަދޫ ކައުންސިލުން ބުނީ އިހްތިސާސުން ވަކިކުރިއިރު ކައުންސިލުން މަސައްކަތްކުރަމުން އައީ ދައްޕަރުން އެ ރަށު ރައްޔިތުނަށް ނަފާ ލިބޭނެ ފަދަ ގޮތަކަށް ލޭންޑް ޔޫސް ޕްލޭން އެކުލަވާލަމުން ކަމަށެވެ. އަދި ސަރުކާރުގެ ނިންމުމާ ގުޅިގެން އެ ރަށު ރައްޔިތުންނަށް ގެއްލުންތަކެއް ވާނެ ކަމަށް ބުނެ ކައުންސިލުން ވަނީ އެ ނިންމުން ބަދަލުކޮށްދޭން ވެސް އެދިފަ އެވެ.
ދައްޕަރު މައްސަލައިގައި ފިއްލަދޫ ރައްޔިތުން އަންނަނީ އެ މަޝްރޫއުގެ މަސައްކަތްތައް ހުއްޓާލަން ގޮވާލާ ޕެޓިޝަނެއްގައި ވެސް ސޮއިކުރަމުންނެވެ. އެގޮތުން ރައްޔިތުންނަށް އެންމެ ފައިދާ ބޮޑު ގޮތަށް ފިއްލަދޫ ކައުންސިލުގެ އިހުތިސާސްގެ ތެރޭގައި އެ ރަށް ބޭއްވުމަށް ޕެޓިޝަނުގައި ބުނެފައިވެ އެވެ. އަދި ކައުންސިލުގެ އިހުތިސާސްގެ ތެރޭގައި ބާއްވައިގެން ވެސް އެ ރަށުގައި ޓޫރިޒަމް ތަރައްގީކުރުމުގެ ފުރުސަތު ދިނުމަށް ވެސް ރައްޔިތުން ބޭނުންވެ އެވެ.
ފިއްލަދޫގެ އިހްތިސާސުން ދައްޕަރު ވަކިކުރިއިރު ލާމަރުކަޒީ ގާނޫނުގައި ބުނެފައި ވަނީ އެ ރަށެއްގެ އިހްތިސާސްގައި ހިމެނޭ ފަޅު ރަށްތަކުން ކައުންސިލަށް ނަފާ ހޯދޭނެ ކަމަށެވެ. އަދި އެއަށް ގާނޫނީ ބާރު ދިނުމުގެ ގޮތުން ފަޅު ރަށްތަކާ ބެހޭ ގާނޫނު އިސްލާހު ކުރުމަށް މިހާރު އޮތީ ރައްޔިތުންގެ މަޖިލީހަށް ވެސް ހުށަހަޅައިފަ އެވެ.
ފިއްލަދޫގެ މީހުން ދިރިނޫޅޭ ސަރަހައްދު ވަކިކޮށް އެއީ ފަޅު ރަށެއްގެ ގޮތުގައި ކަނޑައެޅީ 2010 ވަނަ އަހަރެވެ. އެއިރު ސަރުކާރުގެ ވިސްނުމުގައި ހުރީ ހއ. އަތޮޅުގެ ފަސް ރަށެއްގައި ހައުސިން ޔުނިޓު އަޅައިދޭ ބަޔަކަށް ދައްޕަރުގައި 50 ލަގްޒަރީ ވިލާ އެޅުމަށް ދިނުމެވެ.
އެ މަސައްކަތް ނުފެށި އުޅެނިކޮށް މި ސަރުކާރުން ޖުލައި، 2020 ގައި އިއުލާން ކުރީ ދައްޕަރުގައި އަގުބޮޑު ގެތަކެއް އެޅުމަށްފަހު އެ ގަންނަ ބިދޭސީންނަށް ރެސިޑެންސީ ވިސާ ދޫކުރުމުގެ ވިސްނުމެކެވެ. ނަމަވެސް އެ ޕްލޭން ވެސް މިހާތަނަށް ތަންފީޒުކޮށްފައެއް ނުވެ އެވެ.
ސެކަންޑް ހޯމް ރެޒިޑެންޑްޓް ޕައިލެޓް ޕްރޮޖެކްޓު އިކޮނޮމިކް މިނިސްޓަރު ފައްޔާޒް އިސްމާއިލް ޖުލައި މަހު އިއުލާން ކުރިއިރު ރައީސް ސޯލިހުގެ ގަރާރަކުން ދައްޕަރު އޮތީ މާޗް، 2020 ގައި ފިއްލަދޫގެ އިހްތިސާސުގައި ރަސްމީކޮށް ހިމަނައިފަ އެވެ.
