ބެއިޖިން، ޗައިނާ (އޯގަސްޓު 31) - ޗައިނާގެ ސްކޫލުތައް ހުޅުވިފައި އޮންނަ އިރު ކުދިންނަށް އޮންލައިން ގޭމް ކުޅެވޭނީ ހަފުތާއަކު ތިން ގަޑިއިރު އެކަނި ކަމަށް ސަރުކާރުން ކަނޑައަޅައިފި އެވެ.
ދުނިޔޭގެ އެންމެ ބޮޑު ގޭމިން މާކެޓު އޮންނަނީ ޗައިނާ ގަ އެވެ. އެ ގައުމުގެ ޓެކު ކުންފުނިތަކާ ދެކޮޅަށް ގިނަ ފިޔަވަޅުތަކެއް ސަރުކާރުން އަންނަނީ ފަހަކަށް އައިސް އަޅަމުންނެވެ.
ދައުލަތުގެ ޝިންހުއާ ނިއުސް އެޖެންސީން ބުނީ އުމުރުން 18 އަހަރުން ދަށުގެ ކުދިންނަށް އޮންލައިން ގޭމް ކުޅެވޭނީ ކޮންމެ ހަފުތާއެއްގެ ހުކުރު، ހޮނިހިރު އަދި އާދީއްތަ ދުވަހުގެ ރޭ އަށަކުން ނުވަޔަކަށް ކަމަށެވެ.
އެ ނޫހުން ބުނީ އެފަދަ ފިޔަވަޅެއް އަޅަން ނިންމީ ގޭމް ކުޅުމަށް ދެވިހިފާ މިންވަރު މަދު ކުރުމުގެ ގޮތުން ކަމަށެވެ. ގޭމު ކުޅޭ ކުދިންގެ އުމުރު ޔަގީން ކުރުމަށް އައިޑީ ކާޑު ބޭނުންކޮށްގެން ރަޖިސްޓްރީ ކުރަން ޖެހެ އެވެ.
ސްކޫލު ޗުއްޓީ ދުވަސްތަކުގައި ހަފުތާގެ ކޮންމެ ދުވަހަކު ވެސް 60 މިނެޓު ވަންދެން ގޭމު ކުޅެވޭނެ އެވެ.
"ގޭމަށް ދެވިހިފުމުން ކިޔެވުމާއި އާއްމު ދިރިއުޅުމަށް ދަނީ އަސަރު ކުރަމުން... އަދި ގިނަ މައިންބަފައިން ދިރިއުޅެމުން ދަނީ އެކަމުގެ ހިތްދަތި ކަމުގައި،" ނޭޝަނަލް ޕްރެސް އެންޑް ޕަބްލިކޭޝަން އެޑްމިނިސްޓްރޭޝަނުގެ ބަޔާނެއްގައި ބުންޏެވެ.
ސަރުކާރުން ކަނޑައަޅާފައިވާ ގަޑީގެ އިތުރަށް ކުޑަކުދިންނަށް ގޭމު ކުޅުމުގެ ހިދުމަތް ފޯރުކޮށްދިނުން ކުންފުނިތަކަށް ވަނީ މަނާކޮށްފަ އެވެ. އެއާ ހިލާފަށް އަމަލު ކުރާ ނަމަ އަޅާނެ ފިޔަވަޅު ހާމަކޮށްފައެއް ނުވެ އެވެ.
މީގެ ކުރިން ވެސް ސަރުކާރުން ވަނީ މިފަދަ ބައެއް ފިޔަވަޅުތައް އަޅާފަ އެވެ. އެގޮތުން 2019 ވަނަ އަހަރުން ފެށިގެން ދަންވަރު ގޭމް ކުޅުން މަނާކޮށް، ހަފްތާ ދުވަސްތަކުގައި ދުވާލަކު 90 މިނެޓު އަދި ހަފްތާ ބަންދާއި ޗުއްޓީގައި ދުވާލަކު ތިން ގަޑިއިރަށް ގޭމު ކުޅެވޭ ވަގުތު ލިމިޓު ކުރި އެވެ.
